VAEGA 111

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

******************************************************

Sa gata mai le tatou Fagogo i le vaiaso ua mavae, i le toe tepa i tua i le mafuaaga na o’o mai ai le alii fomai o Taki i totonu o le aiga o le tamaloa o Alesana ma le fafine o Eseta ma le la fanau o Ruta, Iakopo ma Naomi.

Ina ua nofo malamalama le alii fomai o Taki, e le o lona tama ia le tamaloa o Alesana, faapea ai ma le fa’aaogaina e Alesana o le igoa o lona tama, o Tanielu, sa matua’i le fiafia lava le alii fomai ma ia fuafua ai e fa’aulu sana tagi e faasaga ia Alesana ma le latou aiga.

O le mafua’aga foi lea na fa’amavae ai le alii fomai mai i lana galuega i le falemai lea o lo’o faigaluega ai foi ma Naomi ma toe foi i lona atunu’u.

Ae peitai, sa matua’i fa’ate’ia le aiga ina ua toe fo’i mai le alii foma’i i lena afiafi ma ia talosagaina ia Alesana ma le fafine o Eseta, faapea le fanau, ina ia faamagaloina o ia e tusa ai ma lona le fiafia sa fa’aalia.

Na matua’i tete’i ia le tamaloa o Alesana ma lona to’alua, aemaise ai ia le la fanau teine o Ruta ma Naomi, i le faamatalaga a Taki.

O le taimi lea o lo’o alu ia Iakopo e vaai po o le a le mea ua le toe tali mai ai e lana teine o Salome ia lana telefoni, ae na alu le aso o tu’u vilivili Iakopo e fia talanoa ia Salome.  Ae o le taimi lena o lo’o tagi lotulotu Salome i le fale, ma tau mafaufau po o le a lana mea o le a fai e tusa ai ma le folafolaga a Ruta lea na fai atu ia te ia.

Ae se’i tu’u ai le to’alua lena iina, ae fa’aauau pea le tatou faitala ia Taki ma lana fa’ato’esega lea ua fai.

Ua va’aia le maligi o loimata o le tamaloa o Alesana ma ia faapea atu ia Taki, “E leai, e matou te matua’i fa’asa’oa lava lou to’atama’i.  E le o se mea faigofie lou taliaina o le tulaga ma la’u faai’uga sa faia.”

Sa ta’ua e le tamaloa o Alesana, “E ui lava na ou iloa sa mafua ona ou faia lenei tulaga ona o le augani mai a si ou tama, si a’u uo po o se uso foi ia te a’u, ae peitai, sa ou iloa lava, ua leva ona pasi le taimi sa tatau ona fa’asa’oina ai lenei sese.”

[E FAIA PEA]