VAEGA 112

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 112.

********************************************

Ua nofo ifo i lalo ia le alii fomai o Taki ma faapea atu i le tamaloa o Alesana ma lona toalua o Eseta ma si a la fanau teine o Ruta ma Naomi e faapea, na ia tu’ua le falemai ma lona ita tele i le latou aiga.  Ma na alu lava ma lana fuafuaga ina ia molia i latou i le tulafono.

Ae ina ua alu atu i lona aiga ma lona tina, sa faatonuina o ia e lona tina ina ia fa’amagalo Alesana ona sa mulimuli pe usita’ia le fa’atonuga a lona tama.

Sa ta’ua e Taki, na tete’e lona loto i le manaoga a lona tina ma sa umi lava se taimi o atu lona mafaufau i lenei mataupu, ona o le tiga o lona loto i lona le maua o lona tama, ae toe faaopoopo atu iai ma le mafuaaga ua igoa ai le tamaloa o Alesana i le igoa a lona tama.

Na fa’apea atu foi Taki, “Ae i lena taimi atoa o pogisa lo’u mafaufau i lo’u ita ma lo’u le mau manatu, sa ou toe mafaufau lava i le faamatalaga a lo’u tina, lea na ia faapea mai, a ou faia se tulaga ia te oe (Alesana), e leai lava ma se ‘ese’esega o lo’u faia o lea tulaga i lo’u tama moni.”

O le taimi na va’aia ai le maligi o loimata o le tamaloa o Alesana, a’o fa’aauau pea le faamatalaga a le alii fomai.

“Ma a’o tuia lo’u loto i le faamatalaga lea a lo’u tina, na ou toe manatua le vaitaimi sa ou nofo ai iinei i le tou fale.  Sa ou toe manatua le fa’alogona o le alofa ma la outou tausiga lelei ia te a’u.  Ma sa a’e se manatu ia te a’u e faapea, atonu o lea sa taunu’u le mea na ou sau ai, o le saili o lo’u tama.  Aua afai e moni le mafana o le lua mafutaga ma lo’u tama sa iai, ua o’o ai lava ina ona ia fa’amalosia oe e sui lou igoa i lona igoa, o lona uiga, ua ou maua lo’u tama.”

E mae’a ifo le faamatalaga a le alii fomai o Taki, ua leai seisi o le tamaloa o Alesana ma le fafine o Eseta ma le la fanau teine o Ruta ma Naomi, na toe matu mata, i le sisina fa’apaipa ki, le maligi o latou loimata.

“O le mea lea ua ou sau ai e fa’ato’ese atu ia te outou, aemaise lava oe Alesana.  Ma afai ae tou te malilie ai, ua ou toe fia fo’i mai i le tatou aiga,” o le tala lea a Taki.

[E FAIA PEA]