Pili a le Senate e fa’alauaitele ai agava’a mo i latou e ao ona pasiaina e le Fono Faitulafono
Pago Pago - AMERIKA SAMOA
O le amataga o lenei vaiaso, sa fa’aulufaleina ai e le afioga i le Senatoa ia Togiola T.A. Tulafono, ia se pili taufa’aofi “e suia ai manaoga ma tu’utu’uga mo Faatonusili o galuega faakapeneta ma Fa’auluuluga o vaega o Ofisa ma Matgaluega, i lalo o le Ofisa a le Kovana”.
I le fa’atomuaga o lenei pili, ua ta’ua ai e faapea, “o le lelei ma le talitonuina o le taitaiga i totonu o matagaluega a le malo, e tumutumu lea i le faamautinoaina o le lelei o auaunaga ma le agai i luma o le soifua manuia o le atunu’u”.
“Ona o lea, e taua ona faavae o se Gagana manino faifaipea e iloa ai po o fea tonu faatonusili e tatau ona faamaonia e le Fono Faitulafon, atoa foi ma tu’utu’uga o le tofia o faatonusili. O le faamaninoina ma le faauigaina o mea ia e lua, e mautinoa ai o lo’o umia e faatonusili uma e tofia tu’utu’uga e tatau ona iai, o lo latou naunau e fai faamaoni le galuega, ma le talitonuina o i latou i le tauaveina o la latou matafaioi.”
Ua faapea foi ona ma’oti mai i totonu o lenei pili #39-03 ia le avea o Faatonusili ma “Sitiseni po o Nesionale o le Iunaite Setete, e tupuga Amerika Samoa, e mautino ai foi o i latou ua tofia e loloto la latou sootaga ma le naunautaiga e faia mea mo le atunu’u.”
Sa faamanino atili mai e le pili e faapea, “O le moomia o faatonusili ina ia fai ma tagata nonofo mau i Amerika Samoa mo le 12 masina, ae le’i o’o ia fa’amaoniaina, e una’ia ai se ta’ita’iga ua masani ma silafia lelei mataupu o lo’o feagai ai ma mana’oga i totonu o le lotoifale, ina ia fesoasoani tele lena i le tauaveina o la latou foi taitaiga”.
Ma ua ta’ua ai i le pili e faapea, “O nei suiga, e tu’umavaevae mai ai agavaa e tatau mo matafaioi a faatonusili. E ave’ese ai le fa’aluafesasi ma mautino ai le mulimulita’i ma le fa’aaogaina o le Tulafono”.
Ma “o lenei fa’amaninoga e taua tele i le tausia ma le faatuatuaina o taualumaga faalemalo e le mamalu lautele o le atunu’u”.
Ua faapea foi ona ma’oti mai i totonu o le pili tu’utu’uga, e pei o le ‘le tatau i se tasi na faamaonia se solitulafono ona fai ma faatonusili, e fa’ailoa le manaoga ina ia tausia le tulaga maualuga ma le faatuatuaina i le malo”.
Ma “o le manaoga lea e mautinoa ai le fa’aalia e i latou o lo’o ta’ita’i, le fa’atuatuaina ma le fa’amaoni i galuega”.
“O suiga nei i le Tulafono, e fa’ailoa ai lo tatou tiute ma le matafaioi e fa’aleleia le tulaga o lo tatou malo. E matua taua lava le agava’a, fa’amaoni ma ta’ita’iga lelei mo le fa’agaoioia o ni pulega fa’atuatuaina.”