Pago Pago - AMERIKA SAMOA

LOKAINA SE ALII 18 TAUSAGA NA ALU FA’ASUAAVA I LE A’OGA

O le 2:10 i le aoauli o le aso 12 o Fepuari, 2025, na fa’afeso’ota’i ai e se aoga maualuga ia le ofisa a leoleo i Tafuna, ona o se alii e 18 tausaga, na alu atu i le a’oga, ae o lo’o fa’asuaava.

Na faapea ona agai atu leoleo i le aoga ma fa’atalanoaina se tasi o le au ofisa a le aoga ma sa ia faamatalaina i leoleo, le alu atu o le na molia ma fa’atupu vevesi i totonu o potu a’oga a’o faia vasega a fanau a’oga.

Ina ua fesiligia le na molia po o fea na alu ai, ae tali mai, na alu atu e va’ai lana uo teine.  O le mea lea na aveina ai loa lea alii i le ofisa a le aoga, ma valaauiloa ai loa leoleo.  Sa ta’ua e le ta’ita’i o le a’oga le malosi o le manogi pia o le na molia.

Sa faapea loa ona lokaina mai e leoleo le na molia ma aveina atu i le ofisa a leoleo mo le fa’atalanoaina.

Na ia fa’ailoa atu i leoleo e faapea, o le mae’a ona ia taumafaina o ni apa pia se fa, na ia alu ai loa i le a’oga, ona sa manao e tafao ma lana uo teine.

Ua molia nei lenei alii talavou i moliaga o le tagofia o ava malolosi i lalo o tausaga faatulafonoina, o se vaega ‘B’ i solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E $500 le vaegatupe na fa’atulagaina, e mafai ona tatalaina ai le na molia mai i le falepuipui, e faatalitali ai lona faamasinoga.

LOKA SE ALII NA MASALOMIA I LONA UMIA O FUALAAU FAASAINA

Ua molia nei le susuga ia Kolby Feliua’i i le umiaina o se vaega o fualaau faasaina, ina ua taofia e leoleo lana taavale i le po o Tesema 24, 2024, i luga o le alatele i Nu’uuli ma maua ai se vaega o fualaau faasaina, o le Aisa.

Na mafua ona taofia le ta’avale a Feliua’i ona ua ‘expire’ le laisene o lana taavale.

Ina ua taofia e leoleo ia le taavale a Feliua’i, ma tapaina lana laisene, sa iloa ai e leoleo, e leai se laisene po o se ID a Feliua’i.  Ma na faapea loa ona aveina o ia e leoleo, i le ofisa a leoleo i Tafuna mo le faia o a latou su’esu’ega, ae toso lana taavale i le ofisa a leoleo.

Ae na tu’uina e leoleo ia le pasese e to’alua a Feliua’i, e malaga i o la aiga, ina ua mae’a ona su’esu’eina i la’ua.

Ina ua taunu’u leoleo ma Feliua’i i le ofisa a leoleo, sa faapea ona tu’uina iai lana sala mo le le to aoga o le laisene o lana taavale faapea ma le leai o sona laisene aveta’avale, ma o le mafua’aga lea na taofia ai e leoleo ia lana taavale.

Ae le’i tu’uina atu Feliua’i e malaga i lona aiga, na mua’i su’esu’eina e leoleo lana taavale ma o iina na maua ai e leoleo ia se tamai koneteina lanu meamata i lalo o le foeuli o le taavale, na iai ia se paipa mata’eta’e (lea e fa’aaoga e ula ai le Aisa), ma ni vaega o le Aisa i totonu.

Sa faapea ona mauaina ai ma se tamai taga pepa i’ila, o iai totonu ni ‘straws’, e tumu i le Aisa, o pepa ta’ai ma se afi (lighter).

Ina ua fesiligia e leoleo ia Feliua’i e tusa ma nei mea sa maua i totonu o le taavale, sa tali le na molia, e na te leiloa po o ai e ana.

Na mafai ona su’esu’eina e le vaega a le ofisa a leoleo e gafa ma fualaau faasaina, ma mafai ona fa’amaonia, o ni vaega o fualaau faasaina, o le Aisa.

O moliaga na tu’ua’ia ai Feliuai, na aofia ai lona Umi fa’asolitulafono o se vaega o fualaau faasaina, o se solitulafono mamafa, e mafai ona nofosala ai i le falepuipui i le va o le lima ma le 10 tausaga, po o se sala tupe e i le va o le $5,000 ma le $20,000; po o fa’asalaga uma e lua.

O lona moliaga lona lua, o le Umia o se vaega o fualaau faasaina ma le fa’amoemoe e fa’atauina atu, o se solitulafono mamafa, e mafai ona nofosala ai i le falepuipui, i le va o le lima ma le 10 tausaga, po o se sala tupe i le va o le $5,000 ma le $20,000; po o faasalaga uma e lua.

E $10,000 se vaegatupe na fa’atulagaina e mafai ona tatalaina ai le ua molia, e faatalitali ai lona faamasinoga.