Pago Pago - AMERIKA SAMOA

LOKA SE ALII I LE FAAMISA I TOTONU O SE FALEKALAPU

O le vaveao o Setema 29, 2024 na agai atu ai leoleo i se falekalapu i Tafuna, e tali se valaau na o’o mai i le Ofisa Leoleo, mo se fesoasoani ona o se alii ua fiu e fa’afilemu.

E taunu’u atu leoleo o lo’o tau taofiofi mai le susuga ia Tanielu Afuola, lea ua molia i le tulafono, e sikulaki o le falekalapu.

Sa le gata i le fiu o sikulaki e taofiofi Afuola, ae o le solo palauvale mai i le ua molia, agai i sikulaki, ua le malolo.

Ua molia nei Afuola i moliaga, e aofia ai;

Faitauga 1:  Faatupu vevesi i nofoaga faitele, o se vaega ‘B’ o solitulafono mama, e mafai ona loka ai i le ono masina, po o se sala tupe e $500; po o faasalaga uma e lua.

Faitauga 2:  Tete’e atu i leoleo a’o faatino a latou tiute faaletulafono, o se vaega ‘A’ o solitulafono mama, e mafai ona loka ai mo le tausaga atoa, po o se sala tupe e $1,000; po o faasalaga uma e lua.

E $5,000 se vaegatupe sa faatulagaina, e mafai ona tatalaina ai le ua molia mai i le falepuipui, e faatalitali ai lona faamasinoga.

O lo’o ta’ua foi i faamaumauga a le malo, le taumafai o lenei alii e tu’i ia se leoleo ma palauvale iai, a’o latou taumafai e lokaina mai o ia.

E le gata i lea, sa ta’ua le malosi o le manogi pia o sau mai le ua molia.

FA’ASA MAI I LE FALE O LONA TUAFAFINE, AE MAUA LONA ATA I LUGA O LE MASINI PU’E ATA

O le aso 24 o Setema, 2024 na fa’afeso’ota’i atu ai e se tamaitai ia le Ofisa a Leoleo i Tafuna, ma ripotia ai lona tuagane, na masalomia i le osofaia o lona fale.

E 69 tausaga o le soifua a le susuga ia Sivanu Tunoa, lea ua molia i le tulafono.

O lo’o ta’ua i faamaumauga a le malo le agai atu o leoleo i le maota o le tuafafine a Tunoa ae na fa’afetaui mai leoleo e seisi tamaitai, e to’alua ai i la’ua o lo’o a’afia i lenei mataupu.

Na faamatala e le tamaitai lea, o le fale lea o lo’o la faamautu ai ma lona uso lea na valaau atu i le ofisa a leoleo, o le fale a le la tuagane laititi.  Ma o le fale o lo’o iai ni masini pu’eata, lea e feso’ota’i ma a la telefoni, i so’o se taimi e ga se ai i se gaioiga.

Ma o le 7:19 i lena afiafi na tatagi ai lana telefoni e fa’ailoa atu ai le iai o le tagata i luma o le fale.  Ma ina ua ia siakiina lana telefoni, na va’aia ai le ave’esea e Tunoa o masini pu’eata e lua.

O Sivanu Tunoa, e pei ona ta’ua e le tamaitai sa talanoa ma leoleo, o le la tuagane matua, ma e ‘ese lona ia fale.

Sa ta’ua foi e le tuafafine a Sivanu le tupu so’o o lenei faafitauli, o le osofaia o lo la fale e lo la tuagane, lea ua molia, ma ave ni a la meatotino.  Ma o le mafuaaga lea ua o la faasaina ai le ua molia mai i lo la fale, ae peitai, e le o usitaia lava e le ua molia ia lea tulaga.

Na fa’amaonia e le tamaitai lea na valaau i le ofisa a leoleo ia le faamatalaga a lona uso.

Ma ina ua matamata leoleo i ata vitio o le fale, sa va’aia ai le ulufale atu o le ua molia, i totonu o le fale, mai i le faitoto’a pito i luma, ona ia tago lea ua se’i ese se masini pu’eata sa i totonu o le potu malolo.

Ona toe alu lea i fafo le ua molia ma tatala mai se faamalama o se potu moe, ma toe se’i ‘ese foi seisi masini pu’eata na i totonu o le potu moe.

Ona sola lea o Sivanu ma masini pu’eata.

O se taimi mulimuli ane, na fa’afeso’ota’i ai e le tuafafine a le ua molia ia le Ofisa a Leoleo i Tafuna ma ripotia ai le toe fo’i ifo o le ua molia, i lo latou fanua ma toe agai atu foi i le fale lea o lo’o la faamautu ai, e pei lava e leai se mea o tupu.

Ina ua taunu’u leoleo i le nofoaga na tupu ai le faalavelave, sa avefaapagotaina le ua molia.

Ma ina ua faatalanoaina o ia e leoleo, sa faamaonia e Sivanu lona se’i eseina o masini pu’eata ona e le mana’o e pu’e lona ata.  Ma sa ia fa’amaonia foi le fa’asaina o ia e ona tuafafine i totonu o le fale, e aunoa ma se faatagana.  Ae peitai, sa ta’ua e le ua molia, o le fale a lona tua’a.

Sa ta’ua e le ua molia lona togiina o masini pu’eata i fafo o le taavale, a’o ia agai atu i lona fale.  Ae peitai, na maua e leoleo ia masini pu’eata i totonu o le taavale a le ua molia.

Ua molia nei Sivanu i moliaga e aofia ai;

Faitauga 1:  Solivale o fanua e aunoa ma se fa’atagana, o se vaega ‘B’ o solitulafono mama, e mafai ona nofosala ai mo masina e ono, po o se sala tupe e $500; po o faasalaga uma e lua.

Faitauga 2:  Gaoi, o se vaega ‘C’ o solitulafono mamafa, e mafai ona loka ai mo le fitu tausaga pe lalo ifo, po o se sala tupe e i le va o le $5,000 ma le $20,000; po o faasalaga uma e lua.

E $20,000 se vaegatupe ua faatulagaina e mafai ai ona tatalaina mai le ua molia, e faatalitali ai lona faamasinoga.