Ads by Google Ads by Google

Pu’e faapagota le alii na faaoolima i lana uo tamaitai i le 2 tausaga talu ai


[ata: SN]
ausage@samoanews.com

Pago Pago, AMERIKA SAMOA - O le ali’i lea na tau saili e Leoleo i le fa’alavelave lea na ia faaoolima ai i lana uo tamaitai i le 2 tausaga talu ai, e ala i lona toso faamalosi o ia i totonu o le ta’avale ma faaoolima ia te ia, ua taofia nei o ia i totonu o le Toese i Tafuna i le mae’a ai lea ona pu’e faapagota o ia e Leoleo i le masina na te’a nei. 

 

Ae ina ua saili e Leoleo le tino o le susuga a Winston Toleafoa i le taimi na pu’e faapagota ai o ia i le masina na te’a nei, na maua ai e Leoleo vaega o fualaau fa’asaina i totonu o lona ofu.

 

TAGI A LE MALO

 

O lenei mataupu na tofu atu i le Ofisa o Leoleo i le aso 11 o Fepuari, 2018, ina ua talosagaina e se Tina se fesoasoani mo si ona tei, o se tama’ita’i e 25 tausaga le matua na faaoolima i ai lana uo tama ma taumafai e toso faamalosi i totonu o se ta’avale. 

 

Na taua e le Tina i Leoleo, ua laki le vave o gaioiga a se tasi fo’i o alii talavou o le latou aiga e ala i lona taumafai e tatala faamalosi le faitoto’a o le ta’avale ae aumai i fafo le tamaitai na aafia, ae semanu e alu le ta’avale ma ave lea tamaitai i se isi nofoaga e faaauau ai le fasiga o ia.

 

Na maua e Leoleo i le latou suesuega, o le alii ua molia ma le tamaitai na aafia, e faia sa laua faigauo, peita’i ua manatu le tamaitai e faaselemutu lea mafuaga, ina ua ia mautinoa ua fa’aaoga e le ua molia fualaau fa’asaina. O le tamaitai na aafia sa nofo i le fale o le tuafafine a lona Tama i Iliili, ona o loo malaga i fafo ona matua mo a laua talavai.

 

Na taunuu Leoleo ma amata loa a latou suesuega, ma mafai ai ona fesiligia ni isi o molimau e faatatau i lenei fa’alavelave. 

 

Na taua e le aunty o le tamaitai na aafia i Leoleo e fa’apea, o le taimi lava na faamamulu ai e Toleafoa le lima o le tamaitai na aafia, na vaaia ai loa le tamo’e ese atu o Toleafoa i le isi itu o le auala ma piki ai loa o ia e le isi taavale pikiapu lanu uliuli ma aga’i ese atu ai loa mai le nofoaga na tula’i mai ai le fa’alavelave. 

 

Na maua le avanoa e fesiligia ai e Leoleo le tamaitai na aafia e tusa ai o lenei fa’alavelave. Sa ia taua e fa’apea, na faatoa uma lava ona momoli atu o ia e ona tausoga tamaitai e to’alua i luma o le latou fale i le taeao lea, ae tula’i mai loa le fa’alavelave ina ua savali atu Winston ma fesiligia o ia i le mafua’aga na musu ai e tali lana telefoni i le po atoa na vilivili atu ai. Sa ita fo’i Winston ma fesiligia o ia i le mafua’aga na alu ese ai ma le fale a lona aunty ae alu ma eva i ana uo e aunoa ma le faailoaina atu ia te ia.

 

Na taua e le tamaitai na aafia i Leoleo e fa’apea, a o la fetalia’i ma le ua molia i luma o le faitoto’a e ulufale ai i totonu o le lotoa o le latou fale, sa ia vaaia le sui o foliga o Winston, e le gata ua ita ae ua foliga mai fo’i o loo tagofia e ia fualaau fa’asaina.

 

Na faafuase’i ona savali atu le ua molia i le vaega o loo tu mai ai lana uo tamaitai ma taitai faamalosi mai lona lima ma savavali aga’i atu i luma o le alatele. O iina na faafuase’i ai loa ona faaoolima le ua molia i lana uo tamaitai ma taumafai e toso faamalosi i le vaega o loo tu mai ai se pikiapu e le mamao ese lava ma luma o le fale o le aunty a le tamaitai na aafia.

 

Na taumafai le tamaitai na aafia e una’i ese le ua molia ina ia mafai ai ona sola peita’i sa malosi tele le ua molia ma fa’aauau pea ona ia toso faamalosi le tamaitai na aafia ma una’i i totonu o le ta’avale.

 

Sa i ai se alii sa tu i luma o le faitoto’a o le pa e ulufale ai i totonu o le fale o le aunty a le tamaitai na aafia, o ia lea o le tausoga o le tamaitai na aafia. Sa iloa atu e lenei ali’i le faalavelave ma le taumafai o le alii o Toleafoa e ave faamalosi le na aafia i totonu o le ta’avale, o lea na ia tamo’e atu ai loa ma taumafai e tatala le faitoto’a ae aumai i fafo le tamaitai na aafia.

 

Na fesiligia e Leoleo isi molimau e to’alua e uiga i lenei faalavelave, o le tausoga o le tamaitai na aafia ma se tasi o alii e nofo i le aiga tuaoi, ma la faailoa ai fo’i i Leoleo gaioiga sa faia e le ua molia faasaga i le tamaitai na aafia i le taimi na tula’i mai ai le fa’alavelave. 

 

Sa maitauina e Leoleo manu’a i foliga o le tamaitai na aafia, faapea ai fo’i ma ona lavalava ma masaesae i le taimi na tafiti ai ao taumafai le ua molia e toso faamalosi o ia i totonu o le ta’avale. 

 

O le mae’a ai ona fesiligia e Leoleo o molimau, na aga’i atu ai loa i le fale a le ua molia i Tafeta ma le faamoemoe e pu’e faapagota mai o ia, peita’i na faailoa ane i ai e lona aiga, o Toleafoa o loo tafao i le fale o lana uo tamaitai i Iliili. E lei toe mafai e Leoleo ona maua le ua molia talu mai lava lea aso.

 

Ae i le masina na te’a nei, na vaaia ai e se alii Leoleo Satini le ua molia o loo nofonofo i se fale faatali pasi i Pago Pago. Na logo e le alii Leoleo Satini ofu savili le Ofisa o Leoleo ma aga’i atu ai loa Leoleo ma pu’e faapagota le ua molia i lalo o se poloaiga mai le Fa’amasinoga ma auina atu ai loa o ia i le Ofisa mo suesuega. 

 

Na muamua saili e Leoleo le tino o le ua molia mo ni aupega mata’utia, ae maua ai fualaau fa’asaina o le aisa ma le mariuana i totonu o le taga o lona ofu sa faia. 

 

Na musu le ua molia e talanoa i Leoleo ina ua fesiligia o ia e tusa ai o le fa’alavelave e pei ona tula’i mai.

 

O le masina na te’a nei na tula’i ai Toleafoa i luma o le Fa’amasinoga Faaitumalo.

 

E 2 tagi tusitusia ua faila e le malo fa’asaga ia Toleafoa. I le tagi muamua, ua tu’uaia ai o ia i le moliaga mamafa o lona taofia faamalosi o se isi tagata i se auala e le tusa ma le tulafono, faapea ai ma le moliaga e tasi o le taumafai e ave faamalosi se tamaitai i ni gaioiga e aofia ai sauaga i totonu o aiga, o le vaega C lea o solitulafono mamafa, lea e mafai ona fa’asala ai se tasi i le Toese mo le umi e le silia i le 7 tausaga, pe fa’asala i le salatupe e le silia i le $5,000, pe faasala foi i faasalaga uma ia e 2.

 

I le tagi lona lua faasaga ia Toleafoa, ua molia ai o ia i le moliaga o lona umia faasolitulafono o vaega o le pauta faasaina o le aisa, faapea ai ma le moliaga e tasi o lona umia faasolitulafono o vaega o le laau faasaina o le mariuana, o ni solitulafono mamafa e mafai ona fa’asala ai se tasi si le Toese mai le 5 e oo atu i le 10 tausaga, pe fa’asala foi i le salatupe e oo atu i le $20,000.

 

E $30,000 lea ua faatulaga e le Fa’amasinoga e tatala ai i tua Toleafoa.