Ads by Google Ads by Google

Pu’e faapagota ni ali’i se toalua ma molia i le talepe fale ma le gaoi


[ata: SN]
ausage@samoanews.com

Pago Pago, AMERIKA SAMOA

 

O le masina na te’a nei na pu’e fa’apagota ai e Leoleo ni ali’i se to’alua ona o tu’uaiga i lo la auai lea i le osofaiga o se Faleoloa i Tafuna i le 2 masina talu ai.

 

O ali’i e to’alua ua molia nei e aofia ai Soo Kalapu ma Malaki Aiga. O le faaiuga o le masina na te’a nei na tutula’i ai i laua nei i luma o le Fa’amasinoga Fa’aitumalo mo le la ulua’i iloiloga. 

 

O loo molia Kalapu i moliaga mamafa e 2 e aofia ai le talepe fale i le tulaga lua ma le moliaga o le gaoi, o le vaega C lea o solitulafono mamafa, lea e mafai ona fa’asala se tasi i le toese mo le umi e le silia i le 7 tausaga, pe faasala fo’i i le salatupe e le silia i le $5,000, poo le fa’asala fo’i i fa’asalaga uma ia e lua, faapea ai  ma le moliaga o le umia faasolitulafono o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atui le $20,000.

 

O Aiga o lo o tu’uaia i moliaga e 2 o le talia lea o oloa na ave faagaoi faapea ai ma le tete’e atu i Leoleo ao taumafai e pu’e fa’apagota o ia, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, pe faasala fo’i i faasalaga uma ia e lua, atoa aima le moliaga o le umia faasolitulafono o vaega o le laau faasaina o le mariuana, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atui le $20,000.

 

E $10,000 lea ua fatulaga e tatala ai i tua Kalapu, ae $5,000 e tatala ai i tua Aiga. Afai ae mafai ona tatala i laua i tua mai le toese i Tafuna, ua fautuaina i laua e le Fa’amasinoga ina ia tausisi i soo se tulafono a le malo, e le mafai fo’i ona la taumafai e tuua le atunuu se’i vagana ua tuuina atu se poloaiga a le Fa’amasinoga.

 

E le mafai ona la taumafai e faafesoota’i molimau a le malo i soo se auala, e aofia ai ma i latou o lo o a’afia i lenei mataupu.

 

O le aso Tofi o le vaiaso fou i le itula e 10:30 lea ua fa’atulaga e faia ai le ulua’i iloiloga o lenei mataupu.

 

Na teena e le Fa’amasinoga le talosaga na faaulu e le loia a i laua ua molia, mo se avanoa e mafai ai ona fa’aitiitia le tupe e tatala ai i tua i laua. Na talosaga le ali’i loia fautua o loo fautuaina i laua ua molia ina ia faaitiitia le tupe e tatala ai Kalapu i le $2,000, ae faaitiitia le tupe e tatala ai i tua Aiga i le $1,000.

 

Na taua e le Loia Fautuat e fa’apea, o i laua nei ua molia, e le o ni tagata e ono masalomia le sosola ese ma le atunu’u, e le o ni tagata fo’i e ono lamatia ai le saogalemu o tagata lautele. O Kalapu ma Aiga e pei ona finau le la Loia Fautua i le Fa’amasinoga, o ni ali’i o lo o galulue mo le tausiga o la aiga, o le ulua’i taimi fo’i lenei ua molia ai i laua i ni solitulafono.

 

Na tete’e le loia a le malo i le talosaga a le itu tete’e. Na taua e le loia a le malo e fa’apea, o le tupe ua faatulaga e tatala ai i laua nei, ua talafeagai mo le mamafa o solitulafono o loo molia ai i laua. Na taua atili fo’i e le itu a le malo e fa’apea, o gaioiga sa faia e i laua nei i le taimi o le solitulafono, na atagia mai ai le avea o i laua ma tagata e ono lamatia ai le saogalemu o tagata lautele.

 

I le mae’a ai ona iloilo e le Fa’amasinoga o faafinauga a itu e lua, na tuuina mai ai loa le faaiuga e teena ai le talosaga ina ia faaitiitia tupe e tatala ai i laua i tua. E talitonu le Fa’amasinoga, o lo o talafeagai pea lava vaega tupe ua mae’a ona fa’atulaga ma le mamafa o solitulafono o lo o tu’uaia ai i laua.

 

TAGI A LE MALO

 

E pei ona taua e le malo i le latou tagi e fa’apea, i le amataga o le masina na te’a nei na logoina ai e le pule o le Faleoloa a le Kim Store i Tafuna le Ofisa o Leoleo mo se fesoasoani, i le mae’a ai lea ona ia iloaina o se faaletonu i totonu o lona Faleoloa.

 

Na taua e le pule o le Faleoloa i Leoleo e faapea, ina ua usu mai i le taeao o le aso 4 o o Aperila e tatala lona faleoloa, sa ia maitauina ai le faitoto’a pito i tua ua malepe, atoa ai fo’i ma le faamalama ua tatala ese luva e 5. Sa ia maitauina fo’i i le vaega e teu ai oloa le tele o pusa oloa ua aveesea mai le nofoaga sa i ai.

 

Na siaki e le Pule o le Faleoloa le masini pu’eata ma maua ai gaioiga sa mafai ona pu’eina i le itula e 3:43 i le vaveao o le aso lava lea, o se tagata e fusi atoa lona ulu o loo fealua’i i totonu o le faleoloa.

 

Na tuuina atu e le Pule o le Faleoloa i Leoleo le kopi o le ata sa pu’eina e le masini a le Faleoloa, ina ia mafai ai ona fesoasoani ia latou sueseuga.

 

E pei ona taua i suesuega a Leoleo, e tele naua oloa na aveese ma gaoia mai i totonu o le Faleoloa. O nisi o ia oloa e aofia ai pusa saimini e 10, lea e ova i le $80 le tau aofa’i; e 2 pusa ga’o o le ituaiga o le Wesson oli e tusa ma le $165 lona tau aofa’i; 2 pusa o pepa ‘ai e taua o le ‘onion rings’ e tusa ma le $92.40 le tau aofa’i; faapea ai ma le tele o mea’ai tupu apa e silia ma le $250 lo latou tau aofa’i.

 

A o galulue Leoleo i le tau sailia o ni fa’amatalaga e uiga i lenei fa’alavelave, sa fa’afuase’i ona aga’i atu se tagata ma ia faailoa i Leoleo, o lo o i ai ni fa’amatalaga o lo o ia te ia e ono fesoasoani i le latou suesuega o lo o fa’agasolo e uiga i lenei mataupu.

 

Na taua e le molimau lea e fa’apea, i se tasi o aso ao faia le latou inugapia ma ana uo i le fale o se tasi o ana uo, na faafuase’i ai ona alu atu Kalapu ia te ia ma fesili atu, pe mana’o e fa’atau sana pusa ga’o fai mea’ai o le ituaiga o le ‘Wesson oil’.

 

Na taua e le molimau lea i Leoleo e fa’apea, e tusa ai o le fa’amatalaga a Kalapu ia te ia, e 2 pusa ga’o na o atu ma ona matua mai le maliu a le latou aiga sa faia, o pusa ga’o sa fa’atau atu e kuka ai mea’ai o le maliu, peita’i ua le uma ona fa’aaoga, o le mafua’aga lea na tufa ai loa i le aiga pusa sa totoe.

 

Na aga’i atu Leoleo ma latou pikiina mai Kalapu mai lona fale, ae auina atu i le Ofisa o Leoleo i Tafuna mo suesuega. Ina ua fesiligia o ia, sa ia ta’utino ai i Leoleo ma faamaonia lona osofaia o le Faleoloa o Kim Store ae gaoia le tele o oloa sa i ai.

 

Na taua atili e Kalapu i Leoleo e fa’apea, o le tele o oloa sa ia gaoia sa ia tuuina atu lea i le ali’i o Malaki Aiga, o ia fo’i lea e ana le ta’avale na fa’aaoga e la’u ese mai ai oloa mai le taimi na gaoia mai ai.

 

O oloa uma sa gaoia e pei ona taua e Kalapu, o lo o i ai uma i le fale o Aiga. 

 

E 2 aso talu ona tuana’i le fa’atalatalanoaina e Leoleo o Kalapu, ae latou aga’i atu loa ma piki mai le susuga a Aiga.  Ina ua taumafai Leoleo e loka lima o Aiga, sa tafiti solo o ia ma taumafai e tete’e atu i Leoleo. Mulimuli ane, sa mafai lava ona loka e Leoleo ona lima ma taofia ai loa o ia i lalo o le vaavaaiga a Leoleo.

 

Ina ua fesiligia o Aiga, sa ia ioeina ai le fa’aaogaina o lana ta’avale a la’u ese mai ai oloa sa gaoia mai e Kalapu mai le nofoaga o loo i ai le Faleoloa na a’afia, ae la’u uma atu i lona fale. Sa ia taua atili fo’i e fa’apea, o nisi o oloa sa mafai ona fa’atau ma la vaelua ai ma Kalapu i le tupe, ae o isi oloa sa teuina lava i lona fale mo le fa’amoemoe e fa’aaoga mo ia ma lona aiga.

 

A o lei auina atu Kalapu ma Aiga i le Ofisa o Leoleo i Tafuna mo suesuega, na saili e Leoleo i laua poo i ai ni aupega mo le saogalemu o susuga i ali’i Leoleo. Na saili e Leoleo le susuga a Kalapu ma maua ai se paipa tioata o loo i ai vaega ole pauta faasaina o le aisa. Ae ina ua sailia le tino o Aiga, na maua i ai se pepa iila o loo tumu i lau mamago o le mariuana. 

 

Ina ua fesiligia e Leoleo i laua nei e tusa ai o fualaau faasaina na maua ia te i laua, sa la ta’utino ai e faapea, o fualaau faasaina na la faatauina mai i se ali’i ave pasi ma le faamoemoe e ula ma fa’aaoga mo i laua lava.