Pago Pago - AMERIKA SAMOA

O le aso muamua o Oketopa, 2024, na fa’afeso’ota’i ai e se tamaitai faiaoga o se ‘au ta’alo (coach) ia le Ofisa a Leoleo i Tafuna, ma ripotia iai le sauaina o se tasi o tamaititi o lana ‘au, e 16 tausaga le matua, e se tamaitai matua (adult).

Na agai atu leoleo i le malae ta’alo sa faia ai ta’aloga ma faasino ifo iai e le ‘coach’ ia le tamaitai na o’o lona lima i le tamaititi ta’alo.  

Sa faapea loa ona ave faapagotaina e leoleo ia Hezed Leifi ma molia i le Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le falepuipui i aso e sefululima, po o se sala tupe e $300; po o faasalaga uma e lua.

Na fa’atalanoaina e se tasi o sui malu o le malo ia le ‘coach’ i le malae ta’alo ma sa ia ta’ua e faapea, e na te le’i iloa le sauaina e le tamaitai o lana tamaititi ta’alo, ae na fa’ato’a ta’u atu e lana ‘au i se taimi mulimuli ane.

Ma ua ia viliina leoleo mo se fesoasoani ona e le’i fia talanoa i le na fa’ao’olima i le tamaititi o lana ‘au.

Sa faapea foi ona fa’atalanoaina e sui malu o le malo ia le tamaititi na a’afia, i le malae ta’alo.

Ma na fa’amatala e le tamaititi e faapea, sa le fiafia Leifi ona o lona (tamaititi) taufa’alilii i le ‘au soka a Tonga.  Ma sa fa’atonuina o ia (tamaititi) e Leifi e aua le toe pisa, ae le’i sau e po o ia.  Sa ta’ua e le na a’afia, sa na’o le ata ma fa’aauau ona matamata i le ta’aloga, ae fa’ate’ia o ia ina ua tu mai i luga Leifi ma po lona alafau, ma tu’i lona manava.

Sa ta’ua foi e le tamaititi na a’afia le to’atele o lana ‘au sa iai i le taimi na tupu ai le faalavelave.

Na fa’atonuina e leoleo ia le ‘coach’ e ave atu uma lana ‘au ta’a’alo faatasi ma le tamaititi na a’afia i le Ofisa a Leoleo i Tafuna se’i fa’atalanoaina uma ai i latou ma sa fa’atonuina foi e leoleo ia le ‘coach’ ina ia fa’afeso’ota’i le tina a le tamaititi na a’afia

Sa faamatalaina e se molimau, po o se tasi o tamaitai 17 tausaga, a’o latou matamata i le ta’aloga, sa ia faalogoina se tasi o tamaitai matua (adult female) o fai i se tasi o le au maimoa e mafaufau i tagata matutua o lo’o matamata.  Ma na tu mai i luga se tamaitai matua (adult female) ma tatu’i se tasi o tamaititi sa matamata i le ta’aloga.

Na fa’ailoa foi i le taimi o le faatalanoaga le pu’eina e seisi tamaitai 15 tausaga, ia le mea sa tupu, i luga o lana telefoni.  Ma sa tu’uina atu lea ata vitio i leoleo. 

Ina ua taunu’u le tamaititi na a’afia, i le ofisa a leoleo, sa logoina le vaega a le EMS ina ia togafitia ona manu’a.  Ma na toe faatalanoaina ai o ia i luma o lona tina.

E tusa ai ma le faamatalaga a le na a’afia, a’o latou matamata i le taaloga, sa fai ni ana tala malie e tusa ai ma le ‘goalkeepr’ a leisi ‘au.  Ae fa’atonu mai o ia e se fafine e aua le pisa ae matamata.  Sa ata le alii na a’afia, ae fa’ate’ia o ia ina ua tu mai i luga le fafine ma fesili mai ia te ia, po o le a lana faatonuga lea na fai mai ai.  Ona po lea o lona gutu e le fafine ma tatu’i faatolu lona manava.  O le taimi lena na oso atu ai se tasi o ana uo ma taofiofi le fafine.

Na fa’atalanoaina foi e leoleo ia le tamaitai 15 tausaga lea na pu’eina le ata o le faalavelave.

Sa faamaonia e Leifi le o’o o lona a’ao i le tamaititi, ona o lona le fiafia tele i lona le mafaufau i le ta’aloga.  Ae na ta’ua e Leifi, e na’o na ia po ina o le tamaititi, e na te le’i tu’iina.