Ads by Google Ads by Google

Su’esu’e pea mataupu i fualaau fa’asaina na maua i le malaga MV Pago Pago


MV Pago Pago [ata: SN]
ausage@samoanews.com

Pago Pago, AMERIKA SAMOA - O lo o fa’agasolo pea lava i le taimi nei suesuega a Leoleo Suesue mai le Vaega e Suesueina mataupu tau i Fualaau Fa’asaina e le Matagaluega o Leoleo, faasaga i le mataupu lea o lo o tu’uaia ai le maua o se vaega tele o fualaau fa’asaina i totonu o le va’a a le MV Pago Pago i lana malaga mai Manu’a i le vaiaso na te’a nei.

 

E ese mai ai i lea mataupu, i le vaiaso e tasi i tua atu a o le i tula’i mai le mataupu i fualaau fa’asaina na maua i luga o le va’a a le MV Pago Pago, na pu’e faapagota ai e Leoleo fa’aaupegaina a le malo se ali’i Tonga e aumau i Ofu, Manu’a, ao ia sauni e tu’u va’a atu mo Manu’a e ala i se va’a alia ma se vaega tele o fualaau fa’asaina sa ia te ia.

 

E pei ona taua i se ripoti, o le po o le aso Tofi o le vaiaso na te’a nei, Me 28, 2020 na maua ai e Sui o le Tiute faapea ai Leoleo ma ta’ifau sosogi se uta mariuana e silia i le 200 i totonu o le Fale Taele o le MV Pago Pago.

 

Na taua e se molimau faatuatuaina i le Samoa News e faapea, ao galulue ai le Ofisa o Leoleo e tau tuu faatasi faamatalaga e faatatau i fualaau faasaina o lo o auina atu i Tutuila nei i Manu’a, atoa ai ma fualaau faasaina o lo o masalomia le aumai i Manu’a mo Tutuila nei, na amata ai loa ona mataalia Leoleo Suesue e mata’itu i latou o lo o masalomia le aafia i nei gaioiga.

 

O le malaga a le MV Pago Pago mai Manu’a mo Tutuila i le vaiaso na te’a nei, na manatu ai loa Leoleo Suesue ma sui o le Tiute, o le a aga’i atu e siaki le va’a ina ia mautinoa e le o aumaia ai fualaau fa’asaina. 

O Leoleo Suesue ma sui o le Ofisa o Tiute, faatasi ai ma Ta’ifau sosogi ua mae’a ona aoaoina i lenei matata (K-9) na i ai uma i luga o le uafu i Fagatogo e faatali ai le taunu’u mai i le va’a mai Manu’a. Na taunu’u le va’a ma aga’i atu ai loa ali’i Ofisa ma latou Ta’ifau e fa’atino le latou galuega, ma maua ai se ato i totonu o le Fale Taele o lo o i ai le silia i le 200 sikaleti mariuana ua mae’a ona taai ma le fa’amoemoe e tulei ma faatau atu i Tutuila nei.

 

E le i maua poo ai na malaga mai ma fualaau faasaina sa maua i luga o le va’a. O le aso Faraile na sosoo ai, na amata fesiligia ai loa e Leoleo Suesue sui o le auva’a atoa ai ma nisi o le pasese, e aofia ai ma ni isi o lo o masalomia lo latou aafia i lenei taumafaiga.

 

Na taua i se ripoti e fa’apea, e i ai masalosaloga a Leoleo Suesue, na vaai mai loa le tagata na sau ma le uta o fualaau faasaina i Leoleo ma Ta’ifau o lo o faatali atu i luga o le uafu, tia’i loa e le tagata na sau ma ia fualaau fa’asaina i totonu o le Fale Taele a le va’a.

 

Talu mai le aso ananafi, e leai se tasi ua molia pe taofia faapagota e Leoleo ona o lona sootaga i lenei mataupu. O lo o faagasolo pea lava suesuega e faatatau i fualaau faasaina na aumai i luga o le va’a, ae poo ai fo’i na sau ma ia.

 

O le va’a a le MV Pago Pago e pulea e se tasi o Tamalii Faipisinisi i le atunu’u, susuga Papalii Laulii Alofa. 

 

Na taua e le Leitio Faasalalau a le KHJ Radio e faapea, ina ua latou fesiligia Papalii e faatatau i lenei mataupu, na saunoa ai Papalii e faapea, o ia na faatonuina le Ofisa o Leoleo ina ia faia se suesuega e faatatau i le va’a, e mafua mai i ni ripoti ua ia maua e uiga i fualaau fa’asaina o lo o masalomia le aumai i luga o le va’a.

O le MV Pago Pago, o lo o fa’aaoga e la’u ai mea faigaluega o lo o faaaoga mo le toe faaleleia atoa ai ma le toe faaloloto atili o le uafu i Faleasao, lea o loo fausia e le Kamupani a le Paramount Builders.

 

O loo la’u mai ai fo’i e le MV Pago Pago uta ma tagata mai Manu’a e aunoa ma se totogi o lana tautua.

 

Pe tusa o le vaiaso e tasi ao le i tula’i mai le fa’alavelave e pei ona maua ai fualaau fa’asaina i luga o le va’a i le vaiaso na te’ a nei, na pu’e faapagota ai e Leoleo se ali’i Tonga e aumau i Ofu, Manu’a, a o ia sauni e folau ese atu ma Tutuila nei mo Manu’a e ala i se va’a Alia, fa’atasi ai fo’i ma nisi o tagatanu’u o Manu’a.

 

O le ali’i na pu’e faapagota e Leoleo e suafa ia Mataele Toke, poo Mike Toke fo’i e pei ona iloa ai o ia e le to’atele, o se tagatanu’u o Tonga ae aumau i Ofu i Manu’a. 

 

A o le i aga’i atu Leoleo e pu’e faapagota Toke, na muamua talosagaina se poloaiga a le Fa’amasinoga, mo se faatanaga faaletulafono e saili ai le tino o Toke ma ana meatotino, ina ua masalomia lona umia faasolitulafono o fualaau faasaina ma le fa’amoemoe e tulei ma fa’atau atu i isi tagata, e aofia ai ma le auina atu o fualaau fa’asaina mai Tutuila nei i le motu o Manu’a.

 

O le mae’a ai ona sainia e le Faamasinoga o le poloaiga e sailia ai le tino o Toke faapea ai ma ana meatotino o loo ia te ia i soo se taimi lava, na aga’i atu ai loa Leoleo Suesue i le aoauli o le aso Tofi, Me 21 pe tusa o le 1:00 mo le faatinoina o le poloaiga a le Fa’amasinoga.

 

Na taunu’u Leoleo ma latou vaaia ai Toke ua i ai o ia i luga o le va’a Alia faatasi ai ma nisi o tagatanu’u o Manu’a, ua sauni e tu’u va’a atu atu mo Man’ua. Na faailoa e Leoleo ia Toke le poloaiga a le Fa’amasinoga, ma latou toe malaga atu ai loa i le Ofisa autu o Leoleo i Fagatogo ma faatino ai le sailia o le tino a le ua molia.

 

I totonu o le taga o le ofu o Toke sa faia, na maua ai e Leoleo se paipa tioata o lo o i ai vaega o le pauta paepae o le aisa. O lea pauta na faia i ai se suega ma faamoania ai, o vaega ia o le pauta faasaina o le aisa. Sa maua ai fo’i i totonu o le taga o le ofu a Toke sa faia se tinoitupe e $135.

 

Na maua fo’i le avanoa e saili ai e Leoleo le ato fa’afafa a amo i le papatua o Toke. I totonu o lea ato faafafa sa maua i ai e Leoleo pepa iila feololo e 2 o loo tutumu i vaega o le pauta pa’epa’e. Sa maua ai fo’i se i le isi tama’i ato sa i totonu o le ato faafafa se fana o le ituaiga o le 22 revolver hand gun faapea ai pulufana o le ituaiga fana o le 22 caliber. 

 

Na faia se suega faapitoa i vaega o le pauta pa’epa’e na maua i totonu o le ato fa’afafa ma faamaonia ai, o vaega ia o le pauta faasaina o le aisa. I suesuega a Leoleo Suesue e faatatau i fualaau faasaina sa maua ia Toke, na faamaonia ai, o nei fualaau fa’asaina e le mafai ona fa’aaoga mo se tagata se to’atasi, ae o fualaau fa’asaina e fa’amoemoe e tulei ma fa’atau atu i isi tagata.

 

O le vaiaso na te’a nei na tula’i ai Toke i luma o le Fa’amasinoga Faaitumalo mo lana ulua’i tula’i. O le ali’i Loia Fautua lagolago ia Bob Stuart na tula’i mo ia, ae o le tama’ita’i Loia Sili lagolago ia Laura Garvey na tule’i mo le itu a le malo. 

 

Ua molia nei Toke i le moliaga o le umia faasoltulafono o vaega o le laau faasaina o le mariuana; tasi le moliaga o le umia faasolitulafono o le vaega o le pauta faasaina o le aisa; faapea ai ma le moliaga e tasi o le umia faasolitulafono o le pauta o le aisa ma le faamoemoe e tulei ma fa’atau atu i isi tagata; o vaega ia o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e mafai ona oo atu i le $20,000, poo le faasala foi i faasalaga uma ia e lua.

 

O lo o molia fo’i Toke i le moliaga mama e tasi o lona umia faasolitulafono o se a’upega, o le vaega A o solitulafono mama, lea e mafai ona faasala ai se tasi i le Toese mo le umi e le silia i le tausaga, pe faasala foi i le salatupe e le silia i le $1,000, pe faasala foi i faasalaga uma ia e lua.

 

E $20,000 le tupe lea ua faatulaga e tatala ai i tua Toke. 

 

O le aso na tula’i ai Toke mo lana ulua’i tula’i, na malie ai Toke e tu’u sa’o atu loa lana mataupu i luma o le Fa’amasinoga Maualuga.

 

O le aso Lulu o le vaiaso na te’a nei na tula’i ai Toke i luma o le Faamasinoga Maualuga, o le aso 27 o Iulai lea ua faatulaga e faia ai lana ulua’i iloiloga i luma o le Fa’amasinoga Maualuga.