Apia - SAMOA

Ua i luma nei o le faamasinoga i Samoa ia se tagi na fa’aulu e le afioga ia Aiono Dr. Alec Ekeroma, le Faatonusili o le Minisita o le Soifua Maloloina a le malo o Samoa, e faasaga i le ofisa a le Samoa Observer.

O lo’o ua taofi le itu tagi, ua lomia ma faasalalauina e le nusipepa Samoa ia ni faamatalaga ua taufa’aleaga ai lona suafa, ina ua lomia e le Samoa Observer ia ripoti o nonogatupe sa totogi e le SNPF (Samoa National Provident Fund).

E $300,000 le tagi a Aiono ona o tulaga ua faaleagaina talu ai le lomiga a le nusipepa Samoa ia Fepuari 27, 2024 ma Fepuari 29, 2024, lea na foliga mai ai, o le itu tagi, o se tasi o nonogatupe e tolu pito sili ona tele, lea sa pasia mai e le SNPF.

Ma o lo’o finau mai Aiono, sa foliga mai i le lomiga a le Samoa Observer, o ia sa taulimaina tupe o le nonogatupe mai i le SNPF, ae o lana kamupani (Ekeroma Properties Limited) lea o lo’o avea ai o ia ma faatonusili ma sea, e ana le nonogatupe.

O lenei kamupani o lo’o faafoeina ia faletalimalo ma se falema’i tuto’atasi i Moto’otua.

O lo’o ua taofi foi Aiono, o nonogatupe mai i le SNPF, e fa’afoliga mai ai ua iai ni uiga faapito na faia, ma sa solia e le itu tagi ia ni tulafono, e maua mai ai nei nonogatupe, faatasi ai ma se faaupuga e faapea, ua lusi tupe a lana kamupani ma ua le mafai ona toe totogi mai le nonogatupe.

Ma ua avea nei tusitusiga ma lomiga, e pei ona ta’ua e le itu tagi, ua avea ma tulaga ua ta’uleagaina ai o ia ma fai atu ai tala faifai ia te ia, aemaise ai le a’afia tele o lona tofiga faalegaluega.  Ua avea ma tulaga maasiasi ma le mataga i le afioga i le faatonusili.

E tusa ai ma le ripoti a le Samoa Observer, o lo’o faamoemoe ia Aiono i le faavae, e le i fa’amaonia e le nusipepa ia le moni o tusitusiga ae e le’i lolomia ma o lo’o taofi foi le itu tagi, sa mafua ona faia nei lomiga ona o lagona taufa’aleaga.

I le talifuaitau mai a le Komiti Faafoe o Tusitusiga a le Samoa Observer, o lo’o lagolagoina malosi ai la latou faaiuga e lomia lea ripoti.  E $67 miliona se vaegatupe na nono atu i ni tagata po o pisinisi e ono, i le va o masina e iva.

Ae o le taimi lea o lo’o to’atele nisi o le atunu’u o lo’o tagi mai i le taofia o nonogatupe mo le mamalu lautele ia Ianuari 2024, ae o lea na nonoina e le to’aono ia ni tupe e faitau miliona.

O se tasi o lomiga o lo’o aofia i lenei tagi, o faamaumauga ia sa maua mai e le Samoa Observer o lo’o fa’ailoa mai ai le pasiaina e le komiti faafoe a le SNPF ia ni nonogatupe tetele, i ni faalapotopotoga e to’atolu, na aofia ai le Ekalesia Aso Fitu (SISDAC), o le faletalimalo a le Sheraton Samoa Aggie Grey faapea ma le afioga ia Aiono.

O le susuga i le loia ia Leinafo Taimalelagi Strickland o lo’o tula’i mo le nusipepa a le Samoa Observer.