Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

TULA’I AOTELEGA MAE’A FAIA TUI PUIPUIA COVID-19 - 68.7%

 

I le taimi nei, ua tula’imai le aotelega o le aofai o e uma ua mae’a faia tui puipuia o le Covid-19 i le tatou atunuu i le 68.7%, e pei ona fa’ailoa i se pepa o fa’amatalaga.

 

I le taimi nei ua mae’a ai le ofoina atu o le $100. ia i latou uma lava e faia tui puipuia o le Covid-19 i le aso Faraile ua te’a, peita’i, e fa’aauau pea lava ona faia tuiga mo i latou e le’i faia tui puipuia nei i le atunuu.

 

O le tula’i mai o le aotelega o le atunuu ua mae’a tuia nei tui puipuia i le 68.7%, e le o maua lava e maka sa manatu le malo e ao ina oo i ai le faitauga lea, o le 80% ma sili atu, lea sa fa’atutu i ai le manatu ia ausia o e uma ua mae’a faia tui puipuia o le Coronavirus.

 

Ua fa’aauau pea ona tatala nofoaga tumau mo le fa’atautaia o tui puipuia nei mo le mamalu e le’i faia lava tui ina ia o ane i ai mo lea tautua. O le DYWA i Pago Pago ma Tafuna, o le fama’i i Tafuna i le aso Gafua, Aso Lulu mai le itula e 8:00 i le taeao seia pa’ia le 12:00 i le aoauli.

 

O falemai a le Matagaluega o le Soifua Maloloina i Faga’alu, Amouli ma Leone i aso uma lava mai le 8:00 i le taeao seia pa’ia le 12:00 i le aoauli e tatala ai pea lava mo tuiga nei.

 

TAOFIA LE AU TAUFAASESE I GALUEGA I FAFO I SAMOA

 

I se lipoti mai Samoa, ua fa’ailoa e to’alua ni tagata sa molia i le taufa’asese o tagata e to’atele ma ua la’ua fa’asainia nisi e tatalia ai avanoa e faigaluega i avanoa faigaluega i fafo, ua taofia nei pea e le fa’amasinoga ina ua fa’ailoa mai e le tamaitai loia a le Malo, “o lo’o i ai isi moliga e fa’asaga ia i la’ua nei, ona sa faia muamua fo’i e i la’ua nei taufa’asese faapea muamua.”

 

Ua lipotia mai e nisi o le aufa’asalalau i Samoa, o Joseph Lafaele mai Togafu’afu’a ma Falelatai ma le sui ua la’ua to’alua i lenei taufa’asese o Viliamu Leavasa Fa’aleleiga o lo ua mae’a saisaitia mai e tali i o la’ua moliga e 10 ua fa’asaga ia i la’ua ona o lo la’ua taliaina o tupe e talosaga ai avanoa faigaluega i fafo mo ni tagata i le masina o Setema 2021.

 

Na saisaitia mai e leoleo i la’ua nei e tusa o le lua vaiaso ua te’a ma ua fa’aulu fo’i e le Matagaluega o Fefa’atauaiga ma le Leipa MCIL a le Malo o Samoa ia i la’ua nei e tusa o lenei polokalama mo avanoa faigaluega i fafo mo nisi e fia talosaga mai Samoa e tusa ma le toa 20 o i latou.

 

Ua fa’ailoa mai, o nisi o nei tagata sa fa’aseseina, na oo lava i le aso na fa’atulaga e malaga ese atu ai, na  o ane lava ua mae’a tapena mo le malaga i fafo i le aso na tuupoina, ma iloa ai e le o moni lea fo’i avanoa ua fa’aseseina ai i latou.

 

O le loia o tula’i mo le Malo o Samoa, Fuifui Ioane, sa talosagaina le toe tolopo o le aso o le ulua’i iloiloga o nei sui, se’i mua’i toe faatautaia le isi suesuega ua alia’i nei, e le o le taimi muamua lenei ua faia ai e nei sui taufa’asese fa’apenei i tagata lautele.

 

O le talosaga a le tamaitai Loia ina ia mautu lelei le latou suesuega i moliga uma sa fa’asaga i nei sui mo le latou fa’amasinoga e fa’asaga ia i la’ua e tusa o moliga tuai ma moliga fou ua tula’i mai nei.

 

Ua talia e le alii fa’amasino Fepulea’i Ameperosa Roma le talosaga a le Loia a le Malo, ma ua fa’ailoa mai, e le tatalaina lava i tua le to’alua lenei, ae o le a toe fa’ailoa mai se aso ua mae’a ai suesuega uma a le Loia a le Malo, ona toe fa’atulaga lea o le aso mo lea ulua’i iloiloga o sui nei e tusa o la’ua moliga.

 

AVEA CHUCK LEOTA MA PULESILI O LE ASTCA

 

Ua fa’ailoa e le Ofisa o le Kovana, i se pepa o fa’amatalaga, le tofia Komiti Fa’afoe o le ASTCA le susuga Chuck Leota e avea ma pulesili o le ASTCA.

 

O le tele o le tomai o lenei ali’i sa ia mauaina mai le 13 tausaga o tautua ile BlueSlky Communications ma le na’o le 4 tausaga o tautua ai i le ASTCA.

O le tofiga o le susuga Leota, ua fa’ato’a toe tula’i ai lea o se tasi e avea ma Pulesili o le ASTCA talu ona faatulaia ese le tamaitai sa pule ai, Fala Sualevai i le amataga o lenei tausaga.

 

Sa mua’i avea Leota ma pule sili o le itu tau Maketi a le ASTCA ona toe tofia lea e avea ma Sui Pulesili mo sina vaitaimi.

 

Sa fa’atalia lava le toe taliu mai ole afioga Kovana Lemanu Mauga ona faatoa fa’alauiloa mai lea o lenei filifiiga a le Komiti Fa’afoe o le ASTCA mo lea tofiga taua tele. O Oketopa 04, 2021 na fa’ato’a fa’alauiloa mai ai se tusi fa’asalalau fa’alaua’itele a le afioga le Kovana Sili Lemanu PS Mauga, ma ua ia fa’alauiloa aloa’ia ai fo’i lona agaga fiafia ua mae’a lea filifiliga taua ma ua tu’uina atu le faatuatuaga atoa o le Malo ia Leota, Chuck o le a ia tautuaina le malo ma ona tagata fa’apea ma pisinisi e ala i feso’ota’iga ua gafatia e le ASTCA ona fa’atautaia.

 

O sana toe fa’amanatu, “Tau ina ia tatou manatuaina pea i taimi uma, o i tatou o e tautuaina le mamalu lautele o tagata uma o alaala ma soifua i Amerika Samoa, pisinisi ma le Malo.”

 

Ua fa’afetaia fo’i e le kovana le Taitaifono ma le Komiti Fa’afoe a le ASTCA ona o le latou galuega maeaea sa latou faia ina ia maua se agavaa aua lenei tofi taua. “Ia tatou tuuina atu foi ia Leota le tatou fesoasoani e tatau ai, ina ia mautinoa ua aluga lelei mea uma aua ituaiga o feso’ota’iga eseese ua ia pulea ma fa’atautaia mai fa’atasi ai ma e faigaluega uma fa’atasi ma ia i le tatou matagaluega o feso’ota’iga.”