Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

PELE HUNKIN - TUSITALA I LONA SOIFUA TAUTUA I FA’AMAUMAUGA

 

O le tamaitai Samoa o Fa’apepele Hunkin, sa tautua i le vaega au, USArmy, litaea mai i le 19 o tausaga o tautua ona o ni ona manu’a ua agava’a ai i le 100% o penefiti uma e mafai ona ausia e so’o se fitafita tiute, ua a’afia lona tino poo le mafaufau i le tautua, lea ua avea nei ma Tusitala o tusi e tolu sa tuufa’atasia i South Carolina.

 

Peita’i o tusi na e tolu, o lo’o tusia to’atolu e i latou ma nisi o ana pa’aga sa latou fa’atautaia le siufofoga fa’asalalau ma alaata o televise i lea lava setete. Ae o lo’o ua fa’atulaga lana lava tusi e 4 i ai tusi o lo ua ia tusia lava e ia, lea e tatala fefa’atauaiga ma lona fa’alauiloaga ia Fepuari 2022.

 

O lana tusi lea e loma nei ona tatalaina le fa’atauga, o lo ua tusia to’atasi, ua ia faailoa ai nisi o a’afiaga o le soifua fa’afitafita ma le tala’aga fo’i o lona soifua a’e i lona aiga i Nuuuli Amerika Samoa, se isi vaega o lona olaga sa ola a’e ai ma tausia e lona tina matua i Vaiusu, Samoa.

 

“O se avanoa ua tuulima mai e le Atua ina ia faia ai se isi fo’i galuega lelei. Ia le aoga mo a’u ma le fanau, ae ia aoga i se isi fa’amalosi’au, le fa’asoa atu fo’i i fitaituga o le galuega fa’afitafita, ae maise o ala lasi a le Atua e fa’auia mai ai fa’amanuiaga mo i tatou uma,” o sana lea fa’asoa mai e tusa o lenei taumafaiga ua fa’ai’ui’u ma ua mae’a lelei.

 

Ona o le polokalama sa avea ai o ia o se tasi e fa’atautaia mo tina iloga uma i so’o se matata i South Carolina, ina ia fa’ailoa ma fa’ataua fo’i le taumafaiga a tina o so’o se ituaiga o lo’o alaala i lea setete, na mafua ai ona oo le soifua galue o Pele Hunkin i galuega tau fa’asalalau ma fa’amaumau.

 

Peita’i ua oo atu i ai, ua sasa’a mai fo’i le tele o sosia tau fa’amaumauga ma ua fa’afaigofie ai lava ona latou tutu fa’atasi ma nei tina iloga tautua i so’o se matata i lea setete, ma latou aga atu loa ina ia tusia tusi, e tusa ai o soifua galulue o nei tina sa latou fa’atalanoaina latou tautua ma tiute fai i alaata o le televise i South Carolina lava.

 

Ina ua mae’a ai ona latou fa’alauiloa le to’atele o tina ua iloga i so’o se matata, ua fa’afaigofie lava ona tusia e i latou tusi e fa, e tolu o ia tusi ua mae’a i ai se sao o le Tusitala Samoa Pele Hunkin i totonu. O le ala lea ua fa’asalalauina fa’alauiloaga o nei tusi e tolu, ma o le ulutala lava o lana vaega i nei tusi e tolu, e fa’atatau i tamaitai sa ia fa’alauiloa ma fa’atalanoa i le polokalama a le fa’atelevise i South Carolina.

 

Peita’i, ua avea lea ma mea, ua tuufa’atasia ai loa e Pele Hunkin sana tala auiliili i lona olaga mai le soifua a’e i Nuuuli se’ia oo lava i lana tautua ma lona aumau tumau ai ma le fanau i South Carolina. O lea galuega o le a silamio i ai le mamalu o le atunuu pe a oo ina tatala fa’atauga i luga o ala tafailagi poo le tusi fo’i ua mae’a lomia, lea e mae’a lelei i lea vaitau o le tausaga fou.

 

“Pe afai e tuuina mai le ala i ou luma, o le fesili masani, pe ete avea ma se ala o le manuia, pe o le a e tu’u ai pea lena fa’asinomaga e pasi loa oe? Ina ua maua le avanoa, opogi loa ma fa’aaoga tatau, a le aoga tele ia te a’u ma le fanau, ae i ai se sao o lenei foi sui fitafita tuai i se olaga o se to’atasi lava o alo o le tatou atunuu, e fa’aosofia ai i ni mea lelei o le olaga ma le lumana’i,” o se isi lea ana fa’amatalaga e tusa ai o le taumafaiga ma lona tau amata mai.

 

I le taimi nei ua alaala tumau Pele Hunkin ma le fanau i South Carolina, ua maliu le tama o le aiga sa faigaluega savili fo’i i le USArmy.

 

E to’afa si ana fanau o tausia lava e ia ma o lo ua tau fa’amae’a latou a’oa’oga maualuluga i Aoga Maualuga ma Kolisi i South Carolina lava: Nicole, Dean Jr. ma Victoria ma Isabella.

 

O le tamaitai lenei sa fa’au’u mai Fa’asao High ma lona Tipiloma mai i a’oga maualuluga i Amerika Samoa, ma amata ai loa lana tautua i le Militeri, peita’i i le 19 tausaga o lana tautua i le USArmy, e le’i toe tauavea e ia se kosi tau a’oa’oga i lea taimi umi. O lana tautua i le USArmy na mae’a lea ia Oketopa 2013 ina ua mae’a le 19 tausaga ma masina o lana tautua, ma o lona tulaga na litaea mai ai o le Sergeant First Class.

 

Peita’i na toe fa’aaogaina tatau lava e ia lana penefiti tau a’oa’oga a le militeri ma ua fa’ai’u manuia mai ai lana taumafaiga ma le fa’ailoga Masters i le Kosi a leHealth Care Administration.

 

Ua fa’aaogaina tatau lona tusi pasi lea e taumafai ai ona fesoasoani atili i so’o se tasi i Columbia South Carolina ua avea ai o ia ma se tasi e tuufa’atasia polokalama fa’apitoa e ‘auga i taumafaiga e fa’aleleia ai le soifua o nisi, e ala i latou agava’a ma mea ua mafaia ona latou fa’atinoa.

 

Na se’ei fo’i o ia i le nofoa iloga mo tamaitai mai Asia ma le Atu Motu o le Pasefika i le Setete o South Carolina poo le South Carolina Commission Minority Affairs 2021. Sa taua’aoina fo’i mo ia le fa’ailoga taua South Carolina Asian Pacific Heritage Month 2021.

 

Ua ia fa’ailoa mai fo’i, “O le tele o manuia o le Atua e tuulima mai lava ala i ou luma, o lau filifiliga e te tago atu ai ma fa’ataunuu, ma toe fa’auia ane oe i le isi soso’oga o lena tautua, o ala lava ia e faia ai lau filifiliga pe tuu pe fai. Ae a mae’a, e fa’afetaia le ta’ita’iga a le Atua i le soifua vaivai ma le taumafai, e toe tatala mai fo’i se isi avanoa fou, ae faia lava le tiute masani fa’atina, tausia lelei le fanau, ia lava le taimi e fa’aalu mo fanau ma fa’asinosino i latou ia iloa ona fa’alogo lelei, mata’i mamao se ala o fa’asino a’ao mai e le Atua, ae le soifua i  le lumana’i.”

 

“A maua le musumusuga i galuega lelei, aua le alo ae tago atu ma opogi le avanoa ua maua, aua amuia oe o e maua le fa’asinomaga e te fa’atino ai se galuega o finagalo i ai le Atua. E faigofie lava mea uma pe a soifua fiafia, mata’alia ma ia tumau i le naunau atu i le ola tautua, e tele ala o manuia o le Atua mo i tatou uma lava,” o sana tala lea. Website: peleinspire.com Email: pelehunkin03@gmail.com

 

SILIA 3,000 TAGATA FAIGALUEGA MALO MAE’A TUI PUIPUIA COVID-19

 

O Ianuari 15, 2022 lea ua toe suia mai i ai le aso atofa mo le aufaigaluega uma a le Malo, ia oo atu i ai, ae ua mae’a fa’ao’o atu le fa’amaoniga o le faia o ou tui puipuia o le Covid-19, poo se fa’atagaga mai le DOH e fa’ailoa ai ua le tatau ona faia ni ou tui puipuia Covid-19 ona o a’afiaga o ou gasegase ua mae’a togafitia ai oe, poo se mafuaga tatau fo’i mai lau Ekalesia e afua ai ona le mafai ona faia sou tui puipuia nei.

 

Afai o le a misia lava oe ma nei tusi fa’ailo, o lona uiga ua le agaga oe e usita’ia le tulafono a le Malo mo ana tagata faigaluega, ina ia mafuli e autasi mo le faia o tui puipuia Covid-19, ina ne’i a’afia le malo ma ona tagata uma o alaala ai, pe a oo mai lea fa’ama’i, ae le’i mua’i nofo puipuia le atunuu atoa.

 

O le aso na atofa muamua o le aso 15 Tesema 2021.

 

Fa’ailoa i fa’amaumauga a le Matagaluega o Tagata Faigaluega a le malo i le fonotaga a le koviti-19 ua silia nei ma le 3,000 i latou o le aufaigaluega a le Malo ua mae’a faia o latou tui e lua e puipuia mai ai le Covid-19, peita’i o lo’o i ai le isi 142 o i latou ua mae’a tuia le tui muamua ma ua fa’asolo ane e toe faia latou tui lona lua, ona lisia fo’i lea i le faitauga o i latou ua puipuia a’ia’i mai le Covid-19.

 

O le aotelega o le aufaigaluega galulue a le Malo e 5,019 i latou uma. 1931 ua mae’a faia tui puipuia e lua i le taimi o le lipoti nei.