Ads by Google Ads by Google

Tala o le Lalolagi


[ata: foa'i]

Pago Pago, AMERIKA SAMOA

 

PASIA E FUIAVA BERT FUIAVA - KOSI TA’ITA’I LUMANA’I O LAUFANUA FA’ASAO

 

O  le susuga Fuiava Bert Fuiava o Faleasao Manu’a ma Utulei ua avea ma se tasi ua pasi ma ua taua’aoina lona tusi pasi e fa’ailo ai o ia o se tasi o Ta’ita’i o le Lumana’i i tulaga tau Pulega o le Laufanua Fa’asao o le Iunaite Setete.

 

O le polokalama na fa’atulaga ina ia su’ea ai nisi e fa’asolo atu i tofiga tau ta’ita’i, sa fa’atautaia ma ua mae’a fa’ailoa mai ai le pasia lelei e le susuga Fuiava Bert lea kosi taua.

 

O ia sa lotolotoi fo’i i le vasega o Park Rangers na filifili e su’ea lea suega fa’apitoa i le aso Faraile na te’a, ma o le latou fa’au’uga sa fa’atulaga e ao ina faia lea i Atlanta, ae ona o le Covid-19 ma ona fa’asa, lea ua fa’ataunuu ai e ala i feso’ota’iga tau Upega Tafailagi faa-vetuale.

 

O Fuiava ua atoa lelei le 13 tausaga o lana tautua i le National Park Services o Amerika Samoa, sa faigaluega mai lava i le Ofisa Autu o le NPS i Pago Pago.

 

O le polokalama e tausailia ai nisi taitai fou e tapena mo le lumana’i o lea fo’i tautua e muamua lava uia e nisi ua i ai le fa’anaunauga e fa’aauau le latou auaunaga ma ulua’i avea ma supevaisa a’o le’i faasolo atu ina avea ma Ta’ita’i i le aotelega o tautua uma i soo se Ofisa Taiulu o le NPS i setete ma teritori ua i ai Laufanua Fa’asao.

 

E tusa ma le 10 masina o faia mai suesuega ma koleniga fa’apitoa mo Fuiava, ma e aofia ai tiute ma kosi i totonu o le Ofisa, tele suesuega e ao ina faia e tapena ai mo le suega lenei, ae maise lava i ala uma e tatau ma se supavaisa ma ta’ita’i mulimuli ane ai. E i ai vasega o le aoaoga lea e faia i potu a’oga ae maise o le Ofisa lava i Pago Pago, ae o isi e feso’ota’i ai i luga o le Initeneti ma isi i le WebEx lea e i ai lava ona faia’oga fa’apitoa ua fa’atulaga mo na vasega uma.

 

Sa fa’au’u Fuiava mai le Manu’a High ona aoga lea i le ASCC ma le UH Manoa mo lona fa’ailoga Bachelors in Biology ae sailia ai lona fa’ailoga Masters in Resource Management mai le Virginia  Tech.

 

I le taimi nei o lo’o avea o ia ma Manu’a District Ranger mo le National Park o Amerika Samoa. Ua fa’aipoipo atu o ia ia Kimberly Lutu Fuiava ma e to’a fa o la’ua alo.

 

AUINA HAWAII SUEGA TAGATA MALAGA FA’AMAONI I LE COVID-19

 

E tusa ai ma le fa’amatalaga a le Matagaluega o le Soifua Maloloina, ua fuafua i latou e auina atu i Hawaii mo isi suesuega, le suega a le tagata malaga lea ua fa’amonia i le Covid-19. O lea tagata malaga na taunu’u mai i Amerika Samoa i le malaga a le Hawaiian Airlines i le aso 13 o Setema. 

 

I se feiloaiga ma le vasega o e fa’asalalau i le aso Lua na fa’ailoa ai e Dr. Aifili Tufa e fa’apea, talu ai o le limiti o malaga a va’alele i le va ma Hawaii, o lea o lo’o tau fa’atulaga ai se malaga e auina atu ai lea suesuega i Hawaii. Ma e le’i mautinoa le va’alele ma le aso o se malaga, ae o lo’o tagai le matagaluega i le va’alele cargo i le aso Toana’i po’o le malaga a le Hawaiian Airlines i le aso 27 o Setema. 

 

I le taimi nei o lo ua fa’aauau pea lava ona faia tuiga o tui puipuia mai le Covid-19 i le DOH i Faga’alu, ua le faia nei i le falema’i i Tafuna ona ua tulata lea i le nofoaga o lo’o ua taofia mau ai le sui ua fa’amaonia lana suega ua maua i le covid-19.

 

Ua tula’i mai le aotelega o e ua mae’a le lua tui o le Pfizer poo le Morderna pe tasi le tui o le Jassens i le 61.6%, ae o lo’o fa’aauau pea lava ona faia tui ma o lo ua totogia fo’i le tai $100. mo le sui e faia ona tui i le taimi nei.

 

O le aotelega lea e moomia e le DOH ona maua e 80% o le aotelega o le faitauga o le atunuu o se aofai e moomia lava ona ausia. E ese mai nofoaga ua mae’a fa’atulaga e faia ai tuiga ua toe fa’atulga ma le tuiga e faia i le Malaeva’alele i le aso Toona’i e avatu ai tagata i ta’avale e faia tui puipuia, mai le itula e 7:00 i le taeao se’ia pa’ia le 1:00 i le aoauli. Manatua o le totogi ta’i $100. mo e fai tui puipuia e fa’auma lea ia Oketopa 15, 2021.