Pago Pago - AMERIKA SAMOA

LAPATAIGA MAI I LE OFISA O AOGA I IMELI E FA’ALEAGAINA AI KOMIPIUTA

Ua salalau nei se lapata’iga mai i le Ofisa o Aoga a Amerika Samoa (ASDOE), e tusa ai ma ni imeli, o lo’o taumafai e fa’aleagaina ia a latou imeli.  O nei imeli, ua faapea ona salalau solo, ma e tasi lona faamoemoega, o le fa’aseseina lea o tagata ae a’afia ai a latou masini ma fa’amaumauga.

Ua faapea ona fautuaina ai e le pulega a le DOE ia le aufaigaluega atoa, ina ia nofouta ma mataala e tusa ai ma so’o se imeli, e latou te mauaina.  O a ni ata po o ‘attachments’ e maua, ia nofo uta, i le tatala vave, aua e mafai ona a’afia ai a latou komipiuta ma ona polokalama.

I le masina ua mavae, sa fa’asalalauina ai foi e le Ofisa a le Loia Sili, ia se lapataiga tali tutusa faapea, na toe faamamafa mai ai le taua le alo’ese mai i le faasoa atu o ni faamatalaga po o faamaumauga, e le tatau ona fa’asoa atu i luga o le initeneti.

$35.9 MILIONA FAITAU AOFAI O LE TUPE FA’AAOGAINA MO SIAKI O LAFOGA

E tusa ai ma se ripoti, sa fa’asoa atu e le Pule le tumau, o le Ofisa o Lafoga, le susug aia Tim Mauga, i afioga i Faipule, i le vaiaso ua tuanai, sa fa’aalia ai e faapea, o le aofaiga o le tupe atoa, ua fa’aaogaina e totogi ai lafoga a tagata, ua atoa le $35,941,007.

Ma na fa’ailoa atu foi e le susuga Mauga i sui o le Komiti o Tulafono a le Maota o Sui, mai i lea fuainumera, e $32,023,856 sa aumai mai i le Ofisa o Tupe a le Iunaite Setete, ae $3,915,151 sa totogia  e le malo.

E 6,467 siaki o lafoga ua mae’a ona tufatufaina, i taimi ua mavae, ae e 869 na tufatufaina, i l e aso Faraile o le vaiaso ua mavae.