Ads by Google Ads by Google

Tala mai le Fono Faitulafono


[ata: foa'i]
ausage@samoanews.com

Pago Pago, AMERIKA SAMOA

 

PASIA E LE FONO SUI FOU O LE KOMITI FAAFOE O LE ASEDA

 

Ua pasia e le Fono Faitulafono i le vaiaso na te’a nei sui fou e to’atolu na tofia ma filifilia e le afioga i le ali’i Kovana ia Lemanu Peleti S. Mauga e avea ma totino o le Komiti Faafoe e iloiloina gaioiga o le atina’e o le malo (ASEDA), ina ua pasia e maota e 2 i latou e aunoa ma se toe fesiligia o a latou agava’a.

 

O le aso Tofi o le vaiaso na te’a nei na pasia ai e le Senate i latou nei e to’atolu e ala i le palota e 12-0 a le tagata e to’atasi. 

 

O i latou nei e aofia ai le Faatonusili o le Matagaluega o Galuega Lautele a le malo ia Faleosina Voigt; o le Faatonusili o le Ofisa o Oloa ma Fefaatauaiga a le malo, le susuga i le Foma’i ia Ti’alemasunu Dr. Mikaele Etuale, ma le Faatonusili o le Matagaluega o Fefaatauaiga ma Alamanuia a le malo, susuga Petti Matila.

 

I le iloiloga a le Senate e fesiligia ai agava’a o i latou nei, sa maua ai le avanoa e momoli atu ai fautuaga a afioga i Senatoa ina ia faatino o latou tiute ma le faamaoni mo le manuia o le malo ma tagatanu’u. Sa faailoa e afioga i Senatoa i molimau lo latou faatuatuaina o i latou aemaise ai le tele o le latou agava’a mo le faatinoina o galuega e manuia ai le malo.

 

I le Maota o Sui, o le aso Tofi na faatino ai le iloiloga mo le faamaonia o i latou nei ae o le aso Faraile na sosoo ai na faia ai le palota ma fulisia ai finagalo o afioga i Faipule e pasia tofiga a le Kovana e ala i le palota e 12-0 mo le tagata e to’atasi o i latou uma nei e to’atolu e aofia ai Ti’alemasunu, Voigt ma Matila.

 

O le Komiti o le Paketi a le Maota o Sui, i lalo o le taitaiga a le afioga i le ali’i Faipule ia Vailiuama Steve Leasiolagi o le ta’ita’i komiti na taitaia le iloiloiga. A o le i amataina le iloiloga, na faamanatu e le afioga a Vailiuama i le Komiti le autu o le iloiloga, ua na o le faamaoniaina lava o molimau, ae i ai le taimi latou te toe feiloa’i ai mo le tuuina atu o fesili e tusa ai o le tulaga o le Pone a le malo i le taimi nei.

 

Ina ua faatoa amata le iloiloga, o le afioga i le Sui Fofoga Fetalai o le Maota ia Fetu Fetui Jr na ia faatula’i le mau e fa’aagafua le molimau e aunoa ma le faia o ni fesili, ae sauni le Komiti male Maota mo latou faaiuga. Na fulisia uma sui o le Komiti sa i ai i le mau ma pasia ai loa e aunoa ma se Faipule na saunoa i se fesili.

 

I le aso Faraile na te’a nei, na tuuina atu ai loa suafa o i latou nei e to’atolu mo le palota, ma pasia ai loa e ala i le palota siilima ae le o le palota faalilolilo e pei ona masani ai, ma pasia ai loa le avea o i latou nei ma totino o le Komiti o le ASEDA.

 

I lana tusi i taitai o le Fono Faitulafono i le masina o Mati o le tausaga nei, na taua ai e le afioga i le ali’i Kovana ia Lemanu lona talitonuina o i latou nei e avea ma totino o le Komiti o le Tamaoaiga o le malo. 

 

Mo le susuga a Ti’alemasunu, na taua e Lemanu e faapea, o lona tulaga o le Faatonusili o le Ofisa o Oloa a le malo, atoa ai ma le silia i le 20 tausaga o lana auaunaga i le malo o Amerika Samoa, ua agava’a ai le avea o ia ma totino o lenei Komiti.

 

O le Tamaitai Faatonusili ia Voigt, e le gata o loo ia umia faailoa maualuluga e aloaia ai lona avea ma Inisinia mo galuega tetele a le malo, ae sa avea muamua fo’i o ia ma totino o lenei Komiti i le 2017 ina ua filifilia o ia e le Kovana na faatoa mavae atu nei, le Tofa Lolo M. Moliga.

 

Mo le susuga i le Fa’atonusili ia Matila, na saunoa Lemanu i lana tusi i taitai o le Fono Faitulafono ma ia taua lona talitonuina o Matila e avea ma totino o le Komiti Faafoe o le Tamaoaiga, e le gata i lona tomai e pei ona avea ai o ia ma Faatonusili o le Ofisa o Fefaatauaiga a le malo, ae o faailoga fo’i o loo ia umia.

 

O nei tofiga uma e mae’a lo latou aoga i le aso 30 o Iuni 2025.

 

PILI E FAASA AI ONA FA’AAOGA TELEFONI FEAVEA’I AO FAAFOE SE TA’AVALE

 

Ua i luma o le Fono Faitulafono se pili mo se tulafono tau faaofi mai le Faigamalo a Lemanu ma Talauega, e faasa ai le fa’aaogaina e soo se ave ta’avale o telefoni feavea’i ao faafoe se ta’avale i luga o le alatele a le malo. 

 

O lenei pili taa faaofi ua taoto atu i le Komiti o le Puipuiga o le Saogalemu Lautele a le Maota o Sui, i lalo o le ta’ita’iga a le afioga i le ali’i Faipule ia Avagafono Vaimaga Maiava, o se tasi na malolo litaea mai i le Ofisa o Leoleo i le tausaga na te’a nei i le tulaga o le Sui Komesina o Leoleo.

 

E pei ona taua i le folasaga o le tulafono tau faaofi le avea o telefoni feavea’i o se tasi o mafua’aga e tutupu ai faalavelave tau taavale i luga o le alatele i Amerika Samoa, e mafua mai pe afai o loo faafoe e le ave ta’avale le ta’avale ma talanoa i luga o le telefoni, ona fai lea ma faalavelave ia te ia.

 

I suesuega sa faia ua faamaonia ai, o le talanoa o le ave taavale i le telefoni feavea’i ma ave le ta’avale, o le isi lea mafua’aga ua faatupulaia ai le lamatia o soifua o tagata ma tutupu ai le tele o faalavelave, ma ua atagia mai ai le tutusa o lea ituaiga gaioiga ma le tagofia lea e le ave ta’avale o le ‘ava malosi ma faafoe le ta’avale i luga o le alatele.

 

Ua fausia ai i lalo o lenei tulafono tau faaofi le Vaega 22.0335 o Tulafono i luga o le Alatele i le Tusi Tulafono toe Teuteu a Amerika Samoa e faapea, “Fa’aaogaina o se telefoni feavea’i ao faafoe le ta’avale”.

 

E le faatagaina i zoo se tagata na te faafoeina se ta’avale i luga o le alatele i Amerika Samoa ona ia fa’aaogaina se telefoni feavea’i, e pei o le uu i lona lima o le telefoni ma faapipi’i i lona taliga poo se isi fo’i gaioiga e fesoota’i ai le telefoni ma lona tino, peita’i, e mafai e le ave ta’avale ona talanoa i le telefoni feavea’i pe afai o loo faaaoga ni mea faalogo poo le faamau fo’i o le telefoni i se vaega o le taavale e faigofie ai ona talanoa ma ave pea le ta’avale.

 

E le o faatagaina fo’i i lalo o le Vaega faaopoopo o le Tulafono le fa’aaoga e le ave ta’avale o se telefoni feavea’i e momoli ai se tusi poo se feau faapitoa tau fesootaiga (text), poo se imeli fo’i i se isi tagata ao faafoe le ta’avale, peita’i, e mafai e le ave ta’avale ona fa’aaoga le telefoni feavea’i e momoli ai se feau pe afai e fa’aaoga le leo e momoli ai se feau, poo le fa’aaoga o le telefoni feavea’i i se isi lava auala tau fesootaiga, e ese mai i le fa’aaogaina o ona aao ao ave le ta’avale.

 

E le aofia ai i le tulafono le fa’aaoga e le ave ta’avale o le telefoni e logo ai se fesoasoani mo se faalavelave tau ta’avale, o se mu, fesoasoani o se tasi ua moomia se lavea’i, poo le taumafai fo’i e faailoa ni gaioiga tau solitulafono tula’i mai i se nofoaga ao ia faafoe le ta’avale.

 

E le aofia ai foi i lenei tulafono e gafa ma galuega a le malo epei o tagata galulue conkarate, poo tagata faigaluega fo’i o loo tali atu i se manaoga tau eletise ua faaletonu, poo i latou foi o loo galulue i le faamalosi tulafono, pe tali atu foi i se faalavelave e tupu faafuase’imai.

 

E mafai e i latou nei ona fa’aaoga le telefoni pe afai e tu le ta’avale i se nofoaga ta’alaelae e le avea ma itu e poloka ai femalagaaiga o ta’avale i luga o le alatele. O lenei pili o le a aloaia e avea ma tulafono i le tuana’i ai o aso e 60 talu ona mae’a le Tauaofiaga a le Fono Faitulafono na pasia ai.

 

TEUTEUGA O LE TULAFONO MO TOTINO KOMITI FAAFOE OFISA FEMALAGAAIGA

 

Ua i luma nei o le Fono Faitulafono se pili mai le faigamalo a Lemanu ma  Talauega mo se tulafono tau faaofi, e faia ai teuteuga i le tulafono e avea ai se tasi ma totino o le Komiti Faafoe o le Ofisa o Femalagaaiga.

 

E to’a 7 totino o le Komiti Faafoe o le Ofisa o Femalagaaiga a le malo o lo o i ai, o i latou uma nei e tofia mai e le afioga i le ali’i Kovana. 

 

Soo se tasi e filifilia e avea ma totino o le Komiti Faafoe o le Ofisa o Femalagaaiga, e le tatau i lea tagata ona avea o ia ma se tasi na te sponsor ina tagata mai fafo e ulufale mai i le atunu’u. 

 

Afai ua filifilia e le Kovana se tasi e avea ma totino o le Komiti Faafoe o Femalagaaiga ae o loo sponsor e lea tagata ni tagata mai fafo, e tatau loa i lea tagata ua filifilia e avea ma totino o le Komiti Faafoe ona faaleaoga le toe avea o ia ma sponsor i totonu o le 60 aso na filifilia ai o ia.

Na taua e nisi o afioga i Faipule i le Samoa News, le leva lea na tatau ona taofia lea tulaga ina ia mautinoa le malu puipuia o tulafono tau femalagaaiga a le malo.