Apia - SAMOA

FILIFILIA “COUNCIL OF DEPUTIES” FOU

Ua maea nei ona filifilia totino e tolu o le “Council of Deputies”,e pei ona sa faaleoina I totonu o le Palemene i le taeao o le aso Lua i le mae’a ai o tausaga mo totino tuai.

O sui filifilia fou e toatolu, ua aofia ai le Afioga

i le Tui Atua Tupua Tamasese Efi, Malietoa Moli II ma Le Laulu Tiatia Mapesone Mapusua. 

O le Afioga i Le Mamea Ropeti Mualia ua faaauauina nei lona tofiga, lea sa amataga mai ia Fepuari 2016.  E pei ona sa fofogaina e le Afioga i le Fofoga Fetalai ia Papalii Lio Masipau, ina ua toe tatalaina aloaia toe tauaofiaga a le Maota Fono mo le Tausaga 2024.

Na saunoa Papalii, o le a aloaia ia Ianuari o le Tausaga Fou.

O le Afioga Tui Atua na avea ma Ao o le Malo mai i le 2007-2017, i se faaiuga na faia e le Faigamalo Tuai lea sa o latou palotaina ai se Ao

Fou o le Malo, Tuimalealiifano Vaaletoa II. 

O lea suiga fou sa pasia e le Faigamalo tuai, na limiti ai ia tausaga e avea ai se tasi ma Ao o le Malo, i le na’o le lua tausaga.

O le sui e tolu a’i sui o le “Council of Deputies”, o le afioga Malietoa Moli II, le alo o le afioga Malietoa Tanumafili II, lea foi na avea ma Ao o le Malo.

Sa faae’eina le Suafa Malietoa i le alo o Malietoa Tanumafili II ina ua silia ma le 10 tausaga talu ona le toe nofoia le tofi.

O le Afioga i Le Laulu, e malaga mai i le afioaga o Gataivai, Savaii ma o se alo o se tasi o sui faitulafono mai Palauli, le afioga Mapusua Malo, lea na filifilia e avea ma Faipule, i le 1967 a’o 47 totino o le Maota Fono.

TEENA E SE ALII 21 TAUSAGA IA TUUAIGA O LE AVE FAAMALOSI

O le susuga ia Willow Faisauvale, mai Faleatiu, na molia i le faamalosia o se tamaitai e 17 tausaga le matua ma ua na ia te’ena ona moliaga i luma o le Faamasinoga Maualuga.

E tolu moliaga ua tu’uaia ai Faisauvale, e aofia ai ma le Faamalosi Teine.

O le tamaitai Loia ia Lucy Sio Ofoia sa tulai mo le ua molia, i luma o le Faamasinoga i le Aso Gafua, ma ua mae’a ona toe tatalaina o ia, e faatalitali ai lona faamasinoga.

O lenei mataupu na taunuu i luma o leoleo, Ina faauluina e le aiga sa latou ripoti, e faapea, na faatalanoaina e le ua molia ia le tamaitai ua aafia, ina ua toe foi mai le tamaitai mai i le faleoloa.

E tusa ai ma le tagi a le aiga o le tamaitai, sa aveina  faamalosi e le ua molia ia le tamaitai ma le faia iai o ni uiga mataga.

Sa faapea ona tau sailia e leoleo ia le tamaitai, na aofia ai ma le faia o se faasalalauga faalauaitele.

Ae peitai na faasalalauina e le ua molia ma sana uo ia se faaaliga e tete’e i faamatalaga ma o la faalauiloa atu i le mamalu lautele, na o le tamaitai ma Faisauvale i le malie lava o lona loto.  Ma na ta’ua e le ua molia, o ia o se tagata lotu ma valaauina le tamaitai e toe fo’i mai e toe faalelei le la mafutaga.

O se taimi mulimuli ane na pu’eina ai le ua molia e leoleo ma molia i le tulafono.

FAASA ONA FAAAOGA TUPE PEPA E GAOSI AI FAASOLO

Ua lapata’iina le mamalu lautele ina ia ‘alo ‘ese ma le faaaogaina o tupe pepa, ina ia aua ai ne’i faaleagaina tupe pepa a le atunuu.

O se faaaliga lea mai i le Faletupe Tutotonu o Samoa a’o sauniuni le atunuu, e le gata mo faau’uga ae faapea ia aso fiafia.

O tupe pepa o se vaega taua o le tamaoaiga, e pei ona faalauiloa mai e le faletupe.  Ma ua iai foi faasalaga ua mae’a ona faatulagaina mo i latou, e le usita’ia nei tulafono.

Na faalauiloa mai foi e le Faletupe e faapea, o le faaaogaina o tupe pepa mo le gaosia o faasolo po o nisi lava teuga, e faaleagaina ai le tupe pepa, o se solitulafono lea.

E faapena foi i le tusitusi i luga o le tupe pepa, e le gata o le a sala tupe ai se tagata, ae faapea foi faafalepuipuiina ai, e o’o atu i le lua tausaga.