Pago Pago - AMERIKA SAMOA

TOLOPO LE  FAAMASINOGA A LE TAMAITAI SA GALUE I LE FALETUPE I LE TAUSAGA FOU

O le masina o Tesema o le tausaga ua tuanai, na tula’i ai Upuia Suaalofi Matilalefofoa i luma o le afioga i le Faamasino Sili ia Fepuleai Ameperosa Roma, e tali i ona moliaga, i lona fa’aaoga sese o se vaegatupe e silia ma le $10,000 mai i teugatupe a tagata.

Ma ua toe tolopoina nei lana mataupu i le tausaga fou.

O le tamaitai loia ia Tanya Toailoa sa tula’i mo Matilalefofoa lea na galue i le Faletupe a Samoa (National Bank of Samoa-N.B.S).

Ua te’ena e Matilalefofoa i moliaga e 177, e aofia ai le gaoi.  O teugatupe a tagata litaea ma ni isi sa teu a latou tupe i le N.B.S. a’o galue ai le ua molia, o lo’o a’afia i tu’uaiga ia na tula’i mai i le 2013, i tofiga fa’aletaitai.

Ua mae’a ona toe tatalaina i tua ia le ua molia, e faatali ai leisi ana faamasinoga ia Mati o le tausaga fou.

TULA’I SE AVE PASI E TALI I ONA MOLIAGA

Na tula’i luma o le Faamasinoga Maualuga ia le alii ave pasi ia Togamataimoana Vaea e te’ena i ona moliaga, ona o se fa’alavelave tau taavale lea na maliliu ai ni tama matutua se to’alua.

E 37 tu’ua’iga na molia ai Vaea i le masina o Oketopa o le tausaga ua mavae.  Ma ua faatulagaina nei lona faamasinoga ia Fepuari o le tausaga fou, ina ua le fa’amautuina se maliliega i itu e lua.

Sa fa’afoeina e Vaea le pasi o le Laumoso’oi lea na so’aina se taavale Hyundai Tucson ma maliliu ai tama matutua se to’alua.  Na fa’amaonia e le Ofisa o Femalagaiga i luga o le alatele, le tulaga faaletonu o le pasi, mo femalagaiga i luga o le alatele.

Ma ua fa’apea ona taofia ai loa ma le tautua a le kamupani a le Laumoso’oi, lea ua silia ma le 40 tausaga talu ona tatalaina lana tautua.

TAUNU’U I SAMOA IA LE VA’A ‘HMAS CHOULES’

E tusa ai ma se fa’aaliga mai i le Komesina a Ausetalia i Samoa, ua fa’alauiloa mai ai le taunu’u i Samoa o le va’a “His Majesty’s Australia Ship (HMAS) Choules) aua nisi o fuafuaga fa’alemalo.

O nisi o fuafuaga e aofia ai ni galuega mo le lagolagoina o nisi o poloketi o lo’o fa’atupeina e le Komesina a Ausetalia mo le atunu’u, e le gata i lea, o le fausiaina ma le valiina o ni fale i Vailele faapea ma ni fale mo fa’atoaga i Tuanai.

E le gata i lea, ua faamoemoe foi le asiasi atu o le ‘au si’isi’i u’amea mamafa a Samoa lea ua faamoemoe mo le Olimipeka, i luga o le HMAS Choules, mo ni a latou toleniga ma se taumafataga.

O le a faia foi se fa’afiafiaga a le fa’ili (Jazz Band) a le Fuava’a a Ausetalia faatasi ma le fa’ili (Rock Band) a le militeri mai Fiti.

Ua fa’amoemoe foi le auai o le auva’a i tapenapenaga a Samoa mo le Fonotele (C.H.O.G.M) ia Oketopa.

SULUFA’IGA A SE TINA MO SE FESOASOANI

Na liliu se tina loto mafatia i upega tafailagi, e fa’asoa mai ai mafatiaga na feagai ma si ona alo ona o sauaga a lona toalua, ina ua leai se fesoasoani sa ia maua mai i le ofisa a leoleo, e pei ona lipotia mai e le Samoa Observer.

I se fa’atalanoaga ma le Observer, sa faamatalaina e lenei tina loto mafatia, e le o se taimi muamua na sauaina ai o ia ma si ona alo e lona to’alua.  Ae ua fiu e sulufa’i atu i le ofisa a leoleo faapea le ‘Samoa Victims Support Group (SVSG), ae peitai, e le’i maua mai ai se fofo o lenei fa’afitauli.

Sa ia faamatalaina foi le tele o taimi e na tu’ua ai lona toalua ae peitai, e toe maua lava i la’ua ma toe tosina o ia e la te toe fa’atasi, a leai, o le a ia (toalua) pule i lona ola.  Ae o so’o se taimi lava e tula’i mai ai sina fe’ese’esea’iga i lo la va, e fa’aalia lava le le fiafia o lona toalua.

Na ta’ua foi e lenei tina lona failaina o ni pepa tete’a ae peitai, sa fa’atonuina o ia e le fa’amasinoga, e mana’omia ona malilie uma i la’ua ma lona toalua.