SAMOA

TALOSAGA SE PISINISI E TOE AVE I TUA TAGI FAASAGA I SE TAGATA FAIGALUEGA MOLIA I LE GAOI

E to’alima nisi o le aufaigaluega a le Bluebird Lumber and Hardware ua molia i le gaoia o se vaegatupe e lata i le $100,000 ma ua mae’a ona tutula’i i luma o le Faamasinoga Maualuga mo le iloiloina o a latou moliaga.

Ae peitai, ua toe faaulu e le kamupani ia se talosaga ina ia toe ave i tua ia le tagi e faasaga i se tasi o i latou.

O le susuga ia Kumar Singh sa avea ma ‘Business Manager’ a le Bluebird i Saleufi ma ina ua tula’i o ia mo lana mataupu, sa fa’ailoa atu e le afioga i le Faamasino ia Leaiataualesa Daryl Clarke, i loia a le malo, le taunu’u atu o se tusi mai i le Faatonusili o le Bluebird, le susuga ia Taiaopo Faumausili Andrew Ah Liki, e talosagaina ai le solofua o tu’uaiga faasaga ia Singh.

O lea na talosagaina ai e le loia mai i le Ofisa a le Loia Sili, o Helen Apisaloma Sefo, le tu’uina atu o se vaiaso, se’i iloiloina ai e le latou ofisa lenei talosaga.

O lo’o molia Singh i lona gaoia o se tinoitupe e $1,800 ma ua mae’a ona ia totogia le vaegatupe faatulagaina mo le tatalaina o ia i tua, e faatalitali ai lona faamasinoga.

O isi o lo’o molia i lenei mataupu, e aofia ai Solomona Iva, Gatasi Fauena, Milovale Lapana ma Talele Anuilagi.  Ma o lo’o molia uma i latou i le gaoia o se vaegatupe e latalata i le $100,000.

Sa talosagaina foi e loia a le malo ia le faamasinoga, mo se taimi e mafai ona fa’amaopoopo ai moliaga fa’asaga ia i latou nei.

O lo’o iai se talitonuga, sa faamaumauina e i latou ua molia, ia ni oloa ua toe fa’afo’i mai e tagata fa’atau, i totonu o le ‘system’ ma ripotia ai le toe fa’afoi atu o tupe a tagata faatau.  Ae peitai, sa fa’amaonia i su’esu’ega lotoifale, le leai o ni oloa na toe fa’afo’i mai ae o tupe ia ua ta’ua na toe fa’afoi a tagata fa’atau, sa tagaina e i latou ua molia.

Na mafua ona alia’e nei faiga solitulafono, ina ua masalomia e se tasi o tagata faigaluega faatuatuaina a le kamupani, ma faia ai loa se su’esu’ega faalotoifale ma maua ai le gaoia o se vaega tupe e lata i le $100,000, mai ia Ianuari, se’ia o’o mai i le taimi na maua ai le tupu o lenei tulaga.

Na o’o atu foi i luma o le faamasinoga seisi mataupu  lea o lo’o molia ai ni alii se toalua, na galulue i le kamupani taavale a le Ford Hyndai Samoa, i le gaoia o se vaegatupe e $14,000. 

Sa talosagaina e Victor Vitale Lolesio ma Tau Sioka se fesoasoani mai i le ofisa loia mo le mamalu lautele, ae peitai, sa teena e le Lesitala o Faamasinoga.

E tasi le vaiaso lea ua tu’uina atu i nei alii e saili ai ni a la loia.

SAUNI ATU VAEGA SI’ISI’I U’AMEA MAMAFA A SAMOA MO FITI

O lo’o ua saunia nei le ‘au Si’isi’i U’amea Mamafa a le malo o Samoa mo taaloga faavaomalo (Commonwealth Championships and Games Qualification) lea ua faamoemoe faataunu’uina i Fiti, e amata atu ia Setema 16.

O lo’o ua faamoemoe e tauva Samoa, e amata mai ia Setema 18 se’ia o’o atu ia Setema 21.

Ua saunoa mai le faiaoga po o le Peresetene o le ‘au a Samoa, le susuga ia Tuaopepe Jerry Wallwork, i sa latou feiloaiga ma vaeag fa’asalalau, le silia ma le to’a 500 tagata si’isi’i o le a tausinio i ia tauvaga.  

Ma na ia fa’ailoa mai e faapea, i le vaitaimi na o latou malaga atu ai i le Olimipeka, sa fa’aauau pea toleniga a le latou ‘au.  E to’a 37 atunu’u ua faamoemoe e auai atu i ta’aloga i Fiti ma ua saunoa Tuaopepe, o se tauvaga taua tele lenei mo le ‘au a Samoa, aua o le faitoto’a lea e tau atu i ta’aloga a le Commonwealth, lea o le a faia i le tausaga fou.

Ae le gata i lea, o le a mafai ai foi ona o latou agava’a mo le Olimipeka.  Sa ta’ua e Tuaopepe, ina ia agava’a mo taaloga a le Commonwealth, e tatau ona ausia e le latou ‘au ia tulaga e ono pito i luga, i le ‘Commonwealth Championships’.

Sa ta’ua foi e le alii Peresetene le faamanuiaina o i latou ona o lea e latalata mai le nofoaga e faataunu’u ai nei ta’aloga, aua o le tele o a latou ta’aloga sa auai atu ai i le tausaga ua mavae faapea le amataga o lenei tausaga, sa faia i le isi itu o le lalolagi.

Ua talitonu Tuaopepe, ua tele se lesona ua mafai ona aoaoina mai e a latou tagata ta’a’alo mai i Paris ma o le a sili atu seisi tulaga o le a latou faatinoina i le masina fou.

O le tamaitai 15 tausaga, o Seine Stowers, o le ui’i lava lea o le ‘au si’isi’i u’amea mamafa, o le a tauva i le vaega 76kgs.  Na filifilia mai o ia mai i tauvaga a a’oga lea sa fa’afoeina e le Samoa Weightlifting.

Ua folafola mai foi e le Faletupe o Samoa le fa’aauau pea ona o latou lagolagoina le ‘au si’isi’i u’amea mamafa a Samoa, pe malo pe faiaina.