Pago Pago - AMERIKA SAMOA

PASIA E LE SENATE PILI MO TUPE FAASOASOA MA ONA FAAOPOOPOGA

O le aso Faraile o le vaiaso ua mavae, na pasia ai e le Komiti Aufaatasi a le Maota Fono, ia le Paketi a Tupe Faasoasoa mo le tausaga tupe 2025, ina ua taliaina e le komiti ia nisi o faaopoopoga sa fa’aulu mai e le Maota o Sui.

O faaopoopoga na pasia i se palota e 14-11.

Na tatalaina e le afioga i le Senatoa Utu Sila Poasa, le soatau a le afioga i le Faipule ia Vailoata Eteuati Amituanai, i le taitaiga o lenei komiti aufa’atasi, ia le iloiloga i le faaiuga o le vaiaso ua mavae ma sa ia fa’aleoina ai faaopoopoga ua malilie iai le Senate.

O lea faaopoopoga, o le faaitiitia o le tupe aoina lotoifale, mai i le $165.2 miliona, i le $136 miliona.  Faapea ma le faaitiitia o le paketi mo Polokalama Faapitoa a le kovana, mai i le $32.6 miliona, i le na’o le $18 miliona, e aofia ai ma le $6 miliona mo le Medicaid ma le $1 miliona mo le umusaga o le fale fou a le Maota Fono.

Sa fa’atula’i foi e le Senate le faaopoopinga o se vaegatupe e $45,000 i le paketi a le Ofisa o Mataupu tau Samoa ina ia si’i ai totogi a Kovana Faaleitumalo e to’atolu, i le ta’i $75,000.

Ae na taofi mau pea le Maota o Sui, ina ia pasia pea le aofaiga muamua mo Polokalama Faapitoa a le Kovana, ae ia faia iai ni suiga.

E pei ona sa fa’aleoina e le afioga i le alii Faipule ia Vailoata, o nisi o faaopoopoga a le Maota o Sui mo le paketi a Polokalama Faapitoa a le kovana, e aofia ai le faaopoopoina o se $1 miliona mo le ASCC.  Ma se fautuaga ina ia fa’amatu’u mai le $500,000 mai i le $3 miliona ua fa’aagaga mo le polokalama o le Faamamaina o le Motu; ma leisi $500,000 mai i le $1.5 miliona mo le Atina’eina o Fanua a Samoa.

Sa fautuaina foi e le Maota o Sui ia le ave’esea o le $300,000 mai le vaegatupe fa’aagaga mo le polokalama o le Atina’eina ma le Tausiga o Manu’a, lea ua fa’amatu’u iai le $2.5 miliona mo femalagaiga mo Manu’a ma Swains.

Na fa’aalia le lagolagoina e Utu o suiga mai i le Maota o Sui, ae sa ia faamamafaina le tatau ona faavae, so’o se faaiuga e faia mo tupe fa’aalu, i taumatega maumautu, o tupe aoina.

Sa ta’ua, i sona talitonuga, e le mafai ona ausia ia tupe aoina lotoifale, e pei ona taumateina, i totonu o le tala o le tupe mo le tausaga tupe fou.

Ae peitai, i le talifuaitau mai a le Fofoga Fetalai, le afioga Savali Talavou Ale, o lo’o iai le talitonuga i le faigamalo o le a mafai ona o latou aoina tupe maua mai e pei ona ta’ua i totonu o le tala o le tupe ma ia u’una’ia ai le Maota Fono, ina ia o latou tu’u lo latou fa’atuatuaga i a latou iloiloga.

E ui i lea, na saunoa le Peresetene o le Senate, le afioga Tuaolo Manaia Fruean, o le a le suia le faaiuga a le Senate, ae o le a tu’uina atu le mataupu mo le palotaina e ala i le si’i o a’ao.  Ma e to’a 14 i latou na si’i lima ina ia fa’aaogaina suiga mai i le Maota o Sui, ae to’a 11 na tete’e iai.

O Faipule uma na auai i le iloiloga na o latou lagolagoina ia suiga faaopoopo, faatasi ai ma le afioga i le Senatoa ia Poumele Pete Poumele Galea’i.

E to’alua Senatoa e le’i auai i le iloiloga, e atoa iai le to’a 14 o senatoa.  O afioga i senatoa mai i le itumalo o Sua, ia Togiola T. A. Tulafono ma Muagututi’a Moevasa Tauoa.

E na’o le pau ai lea o suiga o le a aofia i totonu o le pili mo le paketi, lea o le a palotaina e maota e lua i lenei vaiaso.

Afai ae pasia le paketi mo tausaga tupe, e pei ona iai, o lona uiga, e $165.2 miliona.

PASIA E LE SENATE SE PILI E SI’I AI TOTOGI O TAGATA ILOILO MO FAAMASINOGA

Ua pasiaina e le Maota o le Senate se pili e si’i ai totogi o tagata Iloilo mo faamasinoga (Jury), aua la latou auaunaga faapea ai ma le fa’amautuina o se vaegatupe e fa’amatu’u mai ai lenei siitaga.

O le Iugafono Taufa’aofi #38-39 sa fa’aulufaleina e le afioga i le Senatoa ia Togiola T.A. Tulafono ma o lo’o ta’ua ai le atoa o le 44 tausaga talu ona tumau le totogi o tagata iloilo o faamasinoga, i le ta’i $10 mo le afa aso, ae $20 mo le aso atoa, pe afai e auai atu lea tagata.

Ma e le o aofia i totonu o lenei totogi, e pei ona ta’ua i totonu o le pili, ia le maualuga o le si’itaga ua iai le tau o le soifuaga i totonu o le teritori.  

O lo’o faamanino mai foi i totonu o lenei pili le fuaina o le ‘inflation’ i le pasene o suiga i tau o oloa ma auaunaga, mai lea tausaga ma lea tausaga.  Ae talu ona pasia lenei tulafono i le 1980, o le si’itaga o tau o oloa ma auaunaga ua iai i nei ona po, ua fa’a 3.75.

O lona uiga, e pei ona ta’ua i le pili taufa’aofi, afai ae sa e faatauina se oloa e $1 i le 1980, o le vaitaimi nei, ua $3.75 le tau o lea oloa.  Ae o lo’o tumau pea totogi o ‘jury’, e le’i faia iai se suiga.

O le faamoemoega o lenei pili taufa’aofi, ina ia saili se paleni lelei i le va o se totogi ua alagatatau mo tagata Iloilo o faamasinoga, aua e taua la latou tautua i totonu o faamasinoga.  I le ofoina atu o se totogi ua alagatatau mo la latou auaunaga, e aloaia ai le taua o latou taimi, taumafaiga ma la latou tuuto i le faatinoina o o latou tiute faalemalo.

E le gata i lea, o le a mafai ai ona mauaina e tagata uma, ona auai i totonu o faamasinoga, e aunoa ma le avega mamafa i tulaga tau tupe, aua o so’o se tasi e filifilia e avea ma ‘juror’ e le gata ina tia’i lana galuega i lea aso, ae o le tupe fa’aalu e malaga mai ai i le faamasinoga, ma toe fo’i i le aiga.

O lo’o ta’ua foi i totonu o le pili taufa’aofi le fa’aitiitia o totogi a tagata pe a le mafai ona faigaluega, pe a filifilia e avea ma ‘juror’ ma o lea tulaga, e a’afia ai loa tupe maua, ma fa’afaigata ai ona fai le fa’asoasoa mo mea taumafa, totogiina o pili, tupe mo tiute faale ekalesia ma nu’u faapea ma le tausiga o le aiga.  

Ae ua faamoemoe lenei pili taufa’aofi, e fesoasoani ia i latou o le a tu’ua a latou galuega ona o latou tiute i totonu o faamasinoga.

Sa fa’aalia e le afioga i le Senatoa ia Magalei Logovii lona lagolagoina o lenei pili taufa’aofi ma ia faapea mai foi, e na te le tia’i lana galuega mo le na’o se $10 po o se $20.

Na faamanino foi e Togiola e faapea, o nisi o ‘jurors’ e malaga mai i luga o le pasi, po o le totogi foi o taxi ma e le toe totogia a latou tupe ia o lo’o fa’aalu mo latou pasese.  Ae o ‘jurors’ e iai taavale, o lo’o maua a latou tupe, pe afai e fa’ao’o mai a latou fa’amaoniga o maila e malaga mai ai i le fale faamasino ma toe fo’i i o latou aiga.

O le siitaga i totonu o le pili taufa’aofi, e $25 mo afa aso, ae $50 mo aso atoa.  Faapea ma le .20 sene faaopoopo mo le maila e tasi, e malaga ai le ‘juror’ e faatino ona tiute i le faamasinoga.

O lo’o ta’ua foi i totonu o le pili taufa’aofi le fa’aaogaina o le 30% lea e maua e le faamasinoga mai i sala tupe o solitulafono i luga o le alatele, e faia ai lenei siitaga.  Ma e mafai ona faia se tusitupe (account) e patino lava mo lenei faamoemoe.

FA’AULU E LE SENATE SE I’UGAFONO E TALOSAGA AI SE FESOASOANI MAI I LE MALO FETERALE E FAASAGA TAU I FUALAAU FAASAINA

O le vaiaso ua mavae, na pasia ai e le Senate se i’ugafono “e talosaga ai le fesoasoani mai i le Vaega Su’esu’e a le Feterale (FBI) ma le Pulega o le Faamalosia o Tulafono tau vailaau (DEA), i le feagai ai ma le faafitauli ua tupu pea o vaila’au/fuala’au faasaina, i Amerika Samoa”.

O lenei i’ugafono sa fa’aulufaleina e afioga i Faipule o le itumalo a Ituau, ia Soliai Tuipine Fuimaono ma Alo Paul Stevenson, ona “ua silafia e le Maota Maualuga a Amerika Samoa le faatupula’ia pea o le tulaga lamatia ua iai, ona o le fa’ateleina o le faafitauli i fuala’au faasaina i le teritori, ua o’o atu i se tulaga ua lamatia ai le saogalemu ma le soifua lelei o tagatanu’u”.

E le gata i lea, “o le faigofie ona maua o fualaau aemaise ai i totonu o a’oga, ua lamatia ai le ola o tupulaga laiti, ma o le a fai ma faalavelave i lo latou soifua maloloina, le saogalemu ma le agai atu i se lumana’i manuia”.

 O lo’o ta’ua foi i le fa’aupuga o lenei pili taufa’aofi, le “matua atugalu o le Senate, ona o le faafitauli lea ua aliali mai i vaega uma o le atunu’u ma o le a lamatia ai le saogalemu lautele, leaga ai aiga, o le atunuu ma le aotele o Amerika Samoa”.

 Ua fa’atula’i mai foi i totonu o lenei pili taufa’aofi e faapea, ‘e ui i taumafaiga aupito lelei a vaega fa’amalosi tulafono, o lo’o fa’afeagai pea latou ma lu’itau tetele i le tau fo’ia o le faafitauli lenei ona o tapulaa mea faigaluega, o tagata faigaluega, ma le natura lavelave lava o solitulafono, e mafua mai i fualaau faasaina”.

Ua ta’ua foi le “silafia e le Maota Maualuga le mana’oga mo se fesoasoani vave e puipui ai i le tu’uitiitia o le tulaga ua i ai, ma ua silafia e le Maota o le taua tele o le galulue ma vaega a le malo tele, e fo’ia ai le tulaga ua o’o iai le faafitauli i vaila’au ma fuala’au faasaina i Amerika Samoa”.

O lea, ua tauala atu i lenei i’ugafono ia se “talosaga aloaia mo le Kovana le afioga Lemanu Peleti Mauga, se fesoasoani a le Vaega Su’esu’e a le Malo Tele (FBI) ma le Pulega o le Faamalosia o Tulafono tau Vaila’au (DEA), ina ia fesoasoani mai i le tomai, o mea faigaluega ma le lagolagosua i vaega fa’amalosi tulafono i lo tatou lotoifale, i le feagai ai ma le fo’ia o le faafitauli i vaila’au ma fuala’au fa’asaina i Amerika Samoa”.

E le gata i lea, ua “fautuaina e le Senate le FBI ma le DEA ina ia faamuamua le su’esu’eina ma le fa’afesalaveia o le fe’avea’ia o fualaau/vailaau faasaina i le teritori, ma ia faapitoa le taga’i i le puipuia o le tufatufaina o fuala’au i a’oga ma isi vaega faapea o le atunu’u”.

Ua vala’auina foi e le Senate “se faiga e afia ai fefa’asoaa’I o faamatalaga/suesuega, toleniga mo le au faamalosi tulafono i totonu o le teritori, ma porokalama e aapa atu ai i le atunu’u, e fa’aagaaga lava mo le fa’aitiitia o le mana’oga mo fuala’au faasaina ma ia siitia le tulaga o le silafia e le lautele o le mata’utia o mea e tutupu mai ona o le fa’aaogaina o vaila’au ma fuala’au faasaina”.

Ma “saga fa’amaonia e le Maota Maualuga lona mana’o maumaututu, e puipuia le soifua maloloina, le saogalemu ma lumana’i o tagatanu’u uma, aemaise ai tupulaga talavou ma e sauni le Maota Maualuga e galulue fa’apa’aga ma vaega o le malo tele i le feagai ai ma le tele o faafitauli o vailaau ma fuala’au, ma toe fa’afoisia le filemu ma le saogalemu i le atunu’u”.

Sa le gata i le afioga i le Kovana, ua faapea foi ona aveina atu kopi o lenei iugafono i le Faatonusili o le FBI ma le pule o le DEA, faapea foi le afioga Uifaatali Aumua Amata, ma le Komesina o Leoleo.