Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

POUTASI IKENASIO

 

O le ali’i e 42 tausaga lea na tu’uaia i lona umia faasolitulafaono o vaega o le laau fa’asaina o le mariuana ma le fa’amoemoe e tulei ma fa’atau atu i isi tagata, ua ia ta’utino i luma o le fa’amasinoga e moni ma fa’amaoni tu’uaiga fa’asaga ia te ia.

 

O le vaiaso na te’a nei na tula’i ai Poutasi Ikenasio i luma o le fa’amasinoga mo le fofogaina o le latou maliliega ua mae’a ona sainia ma le malo. O le ali’i loia fautua lagolago ia Rob McNeill na tula’i mo Ikenasio, ae o le tama’ita’i loia sili lagalago ia Laura Garvey na tula’i mo le malo.

 

O Ikenasio, lea e fai mai le malo o ia o se ali’i fai fa’atoaga na ulua’i tu’uaia i moliaga mamafa e 2 o le umia fa’asolitulafono o vaega o le laau fa’asaina o le mariuana ma le fa’amoemoe e tulei ma fa’atau atu i isi tagata, faapea ai ma le moliaga o le umia faasolitulafono o vaega o le laau fa’asaina o le mariuana.

 

Ae i lalo o se maliliega na sainia e le ua molia ma le malo, ua malie ai Ikenasio e tali ioe i le moliaga lona lua lea ua toe teuteu e le malo, ina ia faailoa ai le moliaga o le umia faasolitulafono o vaega o le laau faasaina o le mariuana.

 

I le tali ioe ai o Ikenasio i le moliaga, sa ia ta’utino ai e fa’apea, i se taimi o le aso 14 o Iuni 2018 i Tafuna, na ia fa’atauina atu ai ni sikaleti mariuana se 6 i ni ali’i se to’alua, ina ua aga’i atu ia ali’i ma talosaga atu ia te ia mo ni la sikaleti fa’atau. O le tau o nei sikaleti e $60.

 

E pei ona taua e le malo i tuutuuga o le maliliega, o lenei mataupu na tofu atu i le Ofisa o Leoleo i Tafuna, ina ua talosagaina e se fafine le fesoasoani a Leoleo, e mafua mai i sikaleti mariuana e 2 na ia maua i le tago o le ofu faigaluega a lona to’alua.

 

Na taua e le malo e fa’apea, o se vevesi na tula’i mai i le va o le fafine ma lona to’alua na ripotia ai e le fafine lenei mataupu i Leoleo, e mafua mai i le faaalu e le tamaloa o tupe o lona totogi e fa’atau ai fualaau fa’asaina, ae le fa’aalu tatau e fa’atau ai mea aoga ma tausi ai le la fanau ma le aiga.

 

Na taua atili e le fafine i Leoleo, o le ali’i lea e alu lona to’alua ma fa’atau mai ai fualaau fa’asaina, o le uo lelei lava a lona to’alua, ma ua leva fo’i ona ia faia lenei galuega o le tulei ma fa’atau atu fualaau faasaina i le to’atele o tagata e aofia ai ma lona to’alua.

 

O le mae’a ai ona maua e Leoleo o le fa’amatalaga tusitusia mai le fafine, na latou talosagaina ai loa se poloaiga mai le fa’amasinoga e saili ai le fale a le ua molia mo fualaau fa’asaina.

 

I le aso e pei ona taua, na osofa’i ai e Leoleo le fale a Ikenasio mo le taumafai e saili fualaau fa’asaina. I lea osofaiga, na maua ai e Leoleo mariuana, fana faapea ai ma le tele o mea e faamaonia ai o lo o aofia le ua molia i le tuleiina atu o fualaau fa’asaina i tagata lautele.

 

O lo o tumau pea le tatalaina i tua o Ikenasio ina ua mae’a ona ia totogi le $10,000 e fa’atali ai le aso 2 o Aokuso lea ua fa’atulaga e lau ai lana fa’asalaga.

 

FA’AFETAI SAUVAO

 

E 10 aso lea ua fa’asala ai e le Fa’amasinoga Faaitumalo se ali’i, ina ua faamaonia lona le usitaia o tuutuuga o lana nofovaavaaia e 12 masina sa tuuina atu i le tausaga na te’a nei.

 

O le vaiaso nei na tula’i ai Faafetai Sauvao i luma o le Fa’amasinoga Faaitumalo mo le tuuina atu o se faaiuga a le Fa’amasinoga, e mafua mai i le tagi a le malo fa’asaga ia te ia, i lona le usitaia lea o tuutuuga o lana nofovaavaaia.

 

E 12 masina sa faanofovaavaaia ai le ua molia i le tausaga na te’a nei, ina ua ta’usala o ia i le moliaga o le faaoolima i le tulaga tolu ma le faatupu vevesi i nofoaga faitele.

 

O ni isi o tuutuuga o le nofovaavaaia a Sauvao e le gata e le tatau ona ia toe solia se tulafono pe tagofia le ‘ava malosi, ae le tatau fo’i ona ia toe faia ni gaioiga e save’u ai le nonofo filemu i totonu o lona nu’u.

 

I le amataga o le tausaga nei, na toe loka ai e Leoleo ia Sauvao ona o tu’uaiga i le ‘ona ma le faatupu vevesi i nofoaga faitele.

 

O le faia e Sauvao o nei gaioiga, ua atagia mai ai lona soli o tuutuuga o lana nofovaavaaia. Na faatoese le ua molia i le Fa’amasinoga mo se avanoa mo ia, peita’i na fa’ailoa i ai e le Fa’amasinoga, o le a tuuina atu aso e 10 i le toese e a’oaina ai lona mafaufau. Ae afai na te toe faia se isi gaioiga e soli ai tuutuuga o lana nofovaavaaia i le lumana’i, o le a mamafa atu loa le fa’asalaga e tuuina atu ia te ia.

 

TOE A’AFIA FO’I FAAMAMAFA GALEA’I I LE TULAFONO

 

O le ali’i e 33 tausaga le matua lea o lo o nofovaavaaia mo le 6 masina, ua molia nei o ia i le moliaga mamafa o le umia faasolitulafono o vaega o le pauta faasaina o le aisa.

 

O le vaiaso nei na tula’i ai Faamamafa Galea’i i luma o le Fa’amasinoga Faaitumalo mo lana ulua’i iloiloga. E $5,000 lea ua fa’atulaga e le fa’amasinoga e tatala ai o ia i tua.

 

E pei ona taua e le malo i le latou tagi e fa’apea, o se poloka a Leoleo sa faia i Tafuna i le faaiuga o le vaiaso na te’a nei, na taofia ai le ta’avale a le ua molia ina ua le tu o ia i le faailoilo e afe ai i tua o le auala (stop sign).

 

A o fesiligia e Leoleo ia Galea’i, sa maitauina e se tasi o Leoleo foliga fefe o le ua molia i totonu o lana ta’avale, atoa ai ma lona taumafai e tago i le taga o lona ofu o lo o fai. Na fesili Leoleo pe aisea e foliga fefe ai ae tali le ua molia, ua fefe ina ne’i te’i ua loka o ia.

 

Ina ua saili e Leoleo le tino a le ua molia, sa latou maua i ai se tama’i pepa iila o lo o i ai vaega o le pauta pa’epa’e i totonu. Na fesili Leoleo ia Galea’i poo le a lea pauta pa’epa’e, ae na tali le ua molia, “o le pepa aisa”.

 

Na faia se suega i le pauta pa’epa’e ma faamaonia ai, o vaega ia o le pauta faasaina o le aisa. Na faailoa e le ua molia i Leoleo, o le pepa na maua ia te ia sa ia fa’atauina mai i sana uo, peita’i, na te le’i ta’uina i Leoleo poo ai le igoa o lana uo.