PASEFIKA

ASIASI MAI POPE FRANCIS I PAPUA NIU KINI

O le aso Toonai o le vaiaso nei, ua faamoemoe e asiasi atu ai le Ulu o le Ekalesia Katoliko, le afioga Pope Francis, i le motu o Papua Niu Kini mo aso e tolu.

O lenei asiasiga i Papua Niu Kini, o se vaega o se faigamalaga a le taitai o le Ekalesia Katoliko, i atunu’u eseese i aso e 11.  O lea asiasiga, o le a aofia ai foi ma Indonesia, Timor-Leste ma Singapore.

O le taimi atoa o le a iai Pope Francis i Port Moresby, ae o le aso Sa lea e faamoemoe o le a faimalaga atu ai i Vanimo, pe a ma le 1000 kilomita le mamao, i le itu i matu i sisifo, ma e tuaoi ai ma Indonesia.

Ua ripotia mai le nofo saunia o le vaega’au a Ausetalia e latou te fa’afeaoina atu le Pope i Vanimo ma toe fo’i mai i Port Moresby.

 E tusa ai ma ripoti salalau i Papua, o lenei faigamalaga a le taitai o le Ekalesia Katoliko, o se tulaga sa faavaeina mai i le lima tausaga ua tuanai e se misionare sa galue i Vanimo lea sa ia aveina atu ai nisi o le ekalesia Katoliko i Roma ma o latou feiloai ai ma le afioga i le Pope ma o latou foa’iina atu ia te ia ni meaalofa sa o latou gaosia ma o latou peseina ni viiga a lo latou atunu’u, mo le taitai o le ekalesia.

Na ta’ua e Patele Martin Prado, o le asiasi mai o le Pope, o se talifuaitau lea i lea asiasiga na o’o atu i Roma.  Sa ta’ua foi e le alii Patele, talu mai lava le tausaga 2019, o matala pea laina o feso’otaiga i le va ma le taitai o le ekalesia ma i sona talitonuga, o le mafua’aga lea o le a asiasi mai ai o ia i Vanimo.

TALITONU TAITAI AOGA A GUAM, E LE O SAOGALEMU FALEA’OGA MO FANAU AOGA

Sa tula’i mai se fa’afitauli tele i totonu o aoga i Guam, i le amataga o lenei tausaga aoga, ina ua le pasia e le Ofisa o le Soifua Maloloina ia aoga e 18 mai i aoga e 41 a le teritori, ae o lea ua toe amatalia lenei tausaga aoga fou.

Sa saunoa le susuga ia Chris Anderson, lea o lo’o fa’auluulu iai le Ofisa o le ‘Student Support Services’, i luma o sui faitulafono a le atunu’u, o lo’o iai a’oga o lo’o saogalemu, ae atonu e le pasia ia suesuega.

Sa soalaupuleina e sui faitulafono lenei mataupu, pe tatau ona toe tatalaina nei aoga, e ui ina e le’i pasiaina, ina ia mafai ona le avea ma fa’alavelave i a’oa’oga a fanau i lenei tausaga.

Na te’ena e le Fofoga Fetalai ia Therese Terlaje lea manatu ma ia saunoa mai ai e faapea, e na te le malamalama, pe mafai faapefea ona o latou taliaina lea tulaga mo a latou alo ma fanau. 

Sa finau Terlaje o se tulaga le tatau le fa’aauauina pea o a’oa’oga ae e le o pasia a’oga, aemaise ona o lo’o a’afia ai faafitauli ogaoga e pei o le tumu o falea’oga i isumu ma tutulu o potu aoga. 

O nei faafitauli, e le o se tulaga fou i totonu o le Ofisa a Aoga i Guam ma e le gata i tulaga faaletonu o faleaoga, ae faapea foi le saogalemu ma le tele o nisi o faafitauli o feagai ma le Ofisa o Aoga, e pei o le tau leai o ni faiaoga, o le faaletonu o le tausiga o faleaoga.

O le tausaga e 2007 na faasala ai e le malo feterale ia le Ofisa o Aoga a Guam ona o le fa’aaogaina le tatau o vaegatupe feterale.  I le lua tausaga na soso’o ai, sa maka ai le leai o se alualu i luma i taumafaiga a le Ofisa o Aoga e fofoina nei faafitauli.

O le tausaga lava lea na ripotia mai ai e le Pacific News Center, le molimauina e le Pule o le Vaegatineimu, i luma o Senatoa le aofia o ni aoga e 36 i ni a latou su’esue’ga, ma e leai ma se a’oga, se’ia vagana ai a’oga fou, o ola a latou ‘fire alarms’ pe iai foi ni ‘sprinklers’ i totonu o fale a’oga.

I le 2017 sa fa’aauau pea ona salalau ripoti i le tele o faaletonu i totonu o aoga, i le tausiga lelei ma le mama o falea’oga faapea ma le le lava o faiaoga.

TULAI MAI SE FAAFITAULI I LE TAUVAGA TAUSALA A FITI

O le aso Faraile na se’i mavae atu nei, sa faataunu’uina ai le tauvaga tausala a le malo o Fiti, mo le sailiga o so latou sui mo le tauvaga tausala o le lalolagi (Miss Universe), ae peitai, ua fa’alauiloa mai e le faalapotopotoga a le Miss Universe Fiji, le sese o le tausala ua o latou faapaleina, talu ai se faaiuga a faamasino.

O le tamaitai 24 tausaga o Manshika Prasad sa faapaleina i le aso Faraile, o le Miss Universe Fiji ma le faamoemoe mo le auai atu i le tauvaga i le faaiuga o lenei tausaga, ma o le uluai taimi lea o le a toe auai atu ai se sui o Fiti i lenei tauvaga, talu mai le 40 tausaga ua tuanai.

Ae peitai, o le aso Gafua na se’i mavae atu nei, na fa’alauiloa mai ai e le faalapotopotoga sa faatautaia le tauvaga tausala i le faaiuga o le vaiaso na se’i mavae atu, la latou sasi, i le faapaleina sese o le tamaitai na manumalo.

O le tamaitai sa tatau ona manumalo, o Nadine Roberts, lea sa tulaga lua i lea afiafi. 

E tusa ai ma le fa’aaliga i luga o le uepesite a le Miss Universe Fiji, o lo’o ta’ua ai e faapea, e le o se taimi muamua lenei ua tupu ai se tulaga faapenei, i nei ituaiga tauvaga ma na mafai ona foia lenei faafitauli, pe ana mulimulitai i latou sa fa’afoeina le tauvaga i lea po, i tulafono ua mae’a ona fa’ataatia.

Ma sa ta’ua ai e faapea, na tofu tamaitai ia na pito maualuga a la sikoa ma palota e ta’i valu, lona uiga, sa tatau i le o lo’o umia le laisene, ona filifili le tamaitai e tatau ona manumalo, ae le o i latou o lo’o faafoeina le tauvaga (contracted organizer), lea sa mananao ia manumalo se tamaitai Fiti Initia, ona o le manatunatu i faiga faapisinisi faavaomalo.

Na ta’ua i le fa’aaliga i luga o le uepesite le le faitauina o le ‘licensee vote’ ma e latou te soalaupuleina foi lenei mataupu ina ua tutusa maka a tamaitai tauva, ina ia filifilia ai le tamaitai e sili ona agava’a e avea ma sui o Fiti, i totonu o le tauvaga a le Miss Universe i Mexico ia Novema.

Ae peitai, i se tali fuaitau mai ia Grant Dwyer, le ‘contracted organiser’, sa ia toe faamautuina mai ai le sa’o o le manumalo a Prasad.  Na ta’ua e Dwyer, o lo’o sa’o le filifiliga o Prasad mai i sui tauva e to’aiva lea na tauva i le faaiuga o le vaiaso ua mavae.