PASEFIKA

FAAMANATUINA LE 83 TAUSAGA TALU ONA OSOFAIA E IAPANI IA HAWAII (PEARL HARBOR)

O le aso Toonai na se’i mavae atu nei, sa faia ai se sauniga faapitoa i Honolulu, Hawaii, mo le fa’amanatuina o le 83 tausaga talu ona osofa’ia e Iapani ia Pearl Harbor.

O lenei sauniga sa amataina i se minute o le filemu, i le 7:55 i le taeao, o le taimi tonu lava lena sa amata ai osofaiga a Iapani, ona soso’o mai ai lea ma se fa’aaliga vaatau e fa’ailo ai se fitafita ua maliu.

O Tesema 7, 1941, e 350 va’alele tau a Iapani sa osofa’ia ia le laumua a le Fuava’a a Amerika, sa faamautu i Pearl Harbor, i Honolulu, Hawaii, ma maliliu ai ni tagatanu’u a Amerika e 2,403 faapea le faaleagaina ai o se vaega tele o le Fuava’a a le malo tele.

O le manulauti o le sauniga faamanatu i lenei tausaga, ua le gata ina faamamata ai le taua o lenei talafaasolopito ae faapea foi le taua o le tiute o fanau talavou i le faasaoina ma le aloaiana o lenei faasinomaga.

O Nikki Stratton sa avea ma lauga autu o le aso, o si ona tama matua ia Donald Stratton sa faasaoina mai i lea osofaiga, a’o iai o ia i luga o le USS Arizona.  Ae na fa’ato’a maliu o ia i le tausaga e 2020, i le 97 o tausaga o lona soifua.

Sa faamatala e Stratton e uiga i lona tama matua e faapea, e ui i le mu o lona tino, ma le magoto o le va’a sa ia tautua ai, ae sa mafai ona ia fa’aaogaina le malosi na totoe ia te ia, e tosoina atu ai lona tino i luga o le USS Vestal.

Na saunoa Stratton, o le fa’asaoina mai o ia o se molimau i le lototele, o le loto alofa ma lona tu’uto i fitafita sa o latou tau faatasi faapea ma le tu’uina atu o lona soifua e faasaoina ai isi.

E to’alua ni isi sa mafai ona faasaoina mai i lea aso tele, sa mafai ona auai atu i lenei sauniga, e pei ona ripotia mai e le ‘Pacific Historic Parks’.

E aofia ai le susuga ia Ira “Ike” Schab Jr., ma na’o ia sa mafai ona fa’asaoina mai i le va’a o le USS Dobbin.

Ma sa ia fa’amatalaina e faapea, o se tulaga faigata ia te ia, ona tomanatunatu i mea na tutupu i lea aso, ona o se aso mata’utia tele, sa lilo i ona manatu o le a mafai ona faasaoina mai o ia.

Sa malaga mai o ia mai i Portland ina ia mafai ona auai i lenei sauniga faapitoa, e avea ma sui o i latou uma, ua le mafai ona auai.  Ua 104 nei tausaga o lona soifua.

O leisi sa mafai ona faasaoina lona soifua, o le susuga ia Ken Stevens, lea ua 102 nei tausaga o lona soifua ma sa tautua o ia i luga o le USS Whitney.

O le aso muamua o Aperila o le tausaga nei, na maliu ai i le 102 tausaga o lona soifua, le toe fitafita na faasaoina mai i luga o le USS Arizona, le susuga ia Lou Conter.

VALAAULIA E LE PERESETENE O PALAU IA DONALD TRUMP E ASIASI MAI I LE PASEFIKA

Ua fa’ao’oina atu nei e le peresetene o Palau, le susuga ia Surangel Whipps Jr., ia se valaaulia faapitoa mo le peresetene filifilia a le Iunaite Setete, o Donald J. Trump, ina ia asiasi mai i le Pasefika, se’i ona taga’i le a’afiaga o motu o le Pasefika, i suiga i tulaga o le tau.

O le 2026 lea ua nofo sauni atu ai le malo o Palau e talimalo i le fonotaga fa’aletausaga, i taitai uma o le Pasefika ma sa ia saunoa mai, lona naunau ina ia mafai ona auai mai ai Trump.

Ma afai ae taunu’u ona faamoemoega, e na te fia aveina le taitai o Amerika, lea o lo’o ta’ua, o se tagata e le talitonu i suiga o le tau, e maulu i ogasami o Palau.

Sa ta’ua e Whipps se taimi lata mai na maulu ai i ogasami o le atunu’u, ma sa ia va’aia ai le tele o amu ua pe pe, ma o se tulaga faanoanoa ua va’aia tele i totonu o ogasami o le atunu’u.

ILOILOINA FAAMASINOGA APILI A KIRIBATI APILI A LE ALII FAAMASINO LAMBOURNE

O le aso Faraile o le vaiaso ua tuanai, na iloiloina ai e le Faamasinoga Apili a Kiribati ia le apili a le alii faamasino i faamasinoga maualuga, ia David Lambourne, lea sa fa’ate’a mai i totonu o le atunu’u, i le amataga o le tausaga, talu ai se fe’ese’esea’iga ma le malo.

O le masina o Me lea na tu’ua ai e Lambourne ia Kiribati ae e le’i aloa’ia le faatula’ieseina o ia.

Ua lua tausaga talu ona le toe gaioi le Faamasinoga o Apili, talu ona fa’amalolo e le malo ia ni faamasino Niu Sila se to’atolu.

Ae o i latou sa iloiloina lenei mataupu i le aso Faraile, na aofia ai nisi o faamasino sili mai i isi motu o le Pasefika, e pei o le faamasino sili mai i Papua Niu Kini, le susuga ia Sir Gibbs Salika, o le afioga ia Vui Clarence Nelson mai i le faamasinoga maualuga a Samoa faapea ma Mohammed Khan mai Fiti.

O le apili a Lambourne, e faasaga i se faaiuga a le faamasinoga maualuga, e faamautu ai le filifilia e Peresetene Taneti Maamau o se komiti e latou te su’esu’eina Lambourne, ma i’u ai ina faamaloloina mai o ia mai i le faamasinoga.

Sa faapea foi ona iloiloina ai ma le tete’e a le faamasinoga maualuga, e toe iloilo le talosaga a le alii faamasino, ina ia fa’aleaogaina le ripoti a le komiti filifilia.

FA’AMAVAE PALEMIA A TONGA

Ua ripotia mai nei le fa’amavae o le Palemia a le malo o Tonga, le afioga Hu’akavameiliku Siaosi Sovaleni mai i lona tofiga.

I le amataga o tauaofiaga a le Palemene a le malo, sa faapea ona talosagaina ai e le alii Palemia sona avanoa, mai i le Fofoga Fetalai.  

Sa ia fa’aleoina lona fa’amavae mai lona tofiga, e tusa ai ma tulaga o le Faavae.

I se faatalanoaga ma le RNZ Pasefika, i se taimi mulimuli ane, sa saunoa a Hu’akavameiliku, ua sili ai ona ou tula’i ese. Na ai fa’aalia lona agaga fa’afetai ia i latou uma sa lagolagoina o ia ma lona faamoemoega o le a tula’i mai seisi e ta’ita’ia le malo mo leisi 10 masina o totoe, ae e le’i toe o’o atu i le taimi e faia ai le palota lautele.