Ads by Google Ads by Google

Tala I Vaifanua


O le tama'ita'i faia'oga toe faufautua a le Vasega faaiuaso Samoana 2018 lea ua filifilia o ia e lea vasega e taua'aoina i ai le Fa'ailoga a le Vasega Fa'aiuaso Samoana 2008 e igoa o le "STAR", o ia lea o Mrs Sabrina Mahuka-Sulua'i. Ua pu'ea fo'i lo la'ua ata ma le sui iloga o le vasega fa'aiuaso 2008 Samoana, TSgt Talamoni, Risenn mai le afio'aga o Aua. [ata: Leua Aiono Frost]

FANAU & FAIA'OGA AGAVA'A 2018 SAMOANA:

 

I le fa'au'uga o le tausaga 2018 a le a'oga Maualuga a Samoana, sa tapena ai e le vasega fa'aiuaso tausaga 2018 ni a latou meaalofa fa'asikolasipi mo fanau a'oga e to'alua, to'atasi mo le sui e fuafua e a'oga i Kolisi po'o Iunivesite i fafo ma se tasi ua fa'amoemoe e fa'aauau i le tatou Kolisi Tu'ufa'atasi.

 

O i la'ua nei, o le tama'ita'i o Mandelyn Tu'ufuli mai Fagatogo mo a'oa'oga i Iunivesite i fafo atu o Amerika Samoa, ma le sikolasipi mo Luis Lafaele i le ASCC.

 

O lea fa'ailoga ua fa'aigoaina e lea vasega o le "RISE" - Recognizing Individuals who Strive for Excellence. Ua fa'atulaga le agava'a o le tamaititi e 3.0GPA ma aga'i i luga.

 

O le fa'ailoga fa'apitoa mo le Faia'oga po'o se Faufautua o le Tausaga e filifilia patino lea e le fanau a'oga fa'aiuaso o le 2018. O lea fa'ailoga lea ua fa'aigoaina o le "STAR" - Samoana Teacher Appreciation Reward - e taua'aoina lea mo se faia'oga ua filifilia e le vasega 12, ua sili lava lona mata'alia i le galuega fa'afaia'oga.

 

O le tama'ita'i Faia'oga ua mae'a filifilia e maua le fa'ailoga $200 ma le Plaque, o Mrs Sabrina Mahuka-Sulua'i, ma ua mae'a taua'aoina nei fa'ailoga e le sui o le Vasega Fa'ai'uaso o le tausaga 2008, le susuga TSgt Risenn Taulafoga K. Talamoni. O lenei atali'i ua atoa ai fo'i i lenei tausaga ma le masina o Iuni le 10 tausaga o lana tautua i le Air Force ma ua si'itia fa'atolu lona tulaga a'o i ai i lana lea auaunaga.

 

I le taimi nei ua ia umia le tofiga "Superintendant - TSgt", peita'i i lona amata ai o lana auaunaga ina ua mae'a le AIT sa avea ma "Airman 1st Class - A1C" aua sa mae'a lelei le 3 tausaga o lana polokalama JROTC i le a'oga maualuga a Samoana lea sa fa'au'u ai i le 2008.

 

Ua atoa le 5 tausaga o tiute Talamoni i le Nofoaga a le USAF i Suffolk, Egelani Peratania. O le toe taliu atu o ia i Egelani, ona tapena mai lea ua mae'a lana tautua fo'i i lea malo, ae o le a toe taliu mai i Fairchild Air Force Base i Washington State.

 

O Talamoni o se alo e fa'asino ia King ma Sina Talamoni o Aua, o i la'ua uma o Faia'oga, ae o lo'o ua galulue fo'i i le la'ua tofi Faifea'u o le EFKAS.

 

I le tapenaga o lea fa'ailoga ua fa'ailoa mai e Talamoni, "O feso'ota'iga uma ma aiaiga fo'i o Fa'ailoga nei a le Vasega  Fa'aiuaso 2018, na faia uma lava e fa'aaoga ai feso'ota'iga fa'ainiteneti. Ua tusia le tusi talosaga, ma aiaiga sa fa'atulaga mai e le tama po'o le teine talosaga mo lea fa'ailoga ma lafo atu mo le matou filifiliga toto'a. O lo'o feso'ota'i i matou uma o totino o lenei vasega 2008 i luga o nei laina tafa'ilagi, ma ua fa'afaigofie atili mea uma tau filifiliga ma manatu fa'aalia.”

 

"Fa'afetaia fanau sa talosaga o le vasega fa'au'u 2018 a Samoana mo lo outou taimi na fa'aalu e talosaga atu ai, ma ua fa'afetaia fo'i le pulega a le A'oga ona o le talia o le talosaga mo le taua'aoina o lenei fa'ailoga. Tau ina ia aoga se sao o le matou vasega 2008 i se taumafaiga a nisi o fanau e tausaili ai lona lumana'i manuia,” o se tala lea a Talamoni.

 

O lana fa'afetai mulimuli o le gafatia lea e le latou vasega ona tu'ufa'atasia o latou loto i lenei fa'amoemoe sa a'e, "Fa'afetai loto ina ia fesoasoani i nisi o nai o tatou tuafafine ma uso i le tatou malo, o nisi o i tatou o lo'o galulue pea iinei ma tausaili ai o tatou manuia.”

 

ASO MULIMULI LESITALA AI TAMAITI - POLOKALAMA ARTS COUNCIL

 

Pe afai e le'i lesitalaina lava lou alo i le polokalama a le fanau mo lenei tu'uaga umi o a'oga, ua tatau loa ona e  fa'aaogaina lenei avanoa taua ao le'i amatalia lea polokalama  a le Arts Council i le aso Gafua a sau nei.

 

O le polokalama masani lava, ae o lo'o ua fa'ailoa mai, o le nofoaga o le a fa'atautaia ai, o le TAOA i Pago Pago. "Ona o lo'o fa'agasolo le galuega o le tatou fale fou i le nofoaga masani i Fagatogo, o lea ua fa'afeso'ota'i ai fo'i le Ofisa o le TAOA, o se tasi o matou pa'aga o lo'o galulue faatasi mo lenei Polokalama a le Fanau i lenei tuuaga, ina ia fesoasoani mai i le tulaga o le nofoaga. Lea la ua fa'atulaga ai i matou e amatalia i le itula e 8:00 i le taeao i le aso Gafua a sau nei,” o se tala lea mai le Arts Council.

 

Ua fa'ailoa mai fo'i o le a mana'omia ona usu atu lou alo ua mae'a faia sana ti i le taeao, ma tu'u fo'i i lana ato sina mea'ai mama mo le tausiga o i latou, a'o le'i toe tu'ua mai le polokalama i le itula e 12:00 i le aoauli.

 

O aoa'oga ua ofoina mai e aofia ai le gaosia lea o galuega taulima masani a Samoa ina ia fiafia le fanau e ola ma iloa patino mea e fa'aaogaina e le tatou atunu'u i a tatou fa'atasiga, e afua i 'aiga ma fa'afiafiaga tetele, po'o le tapenapena fo'i o nei galuega alofilima mo le sailiga o se tamaoaiga tausi o lona aiga.

 

"E le tutusa uma fanau, o nisi e gafatia ona fa'aauau a'oa'oga ma fa'agasolo atu ai latou olaga e ola i fafo ma gafatia totogia latou pili ma le tausiga o latou aiga i galuega maua ona ua lava tapena le atamai. Peita'i, i lea tupulaga ma lea tupulaga tatou te va'aia lava le i ai o fanau e fa'amatu'u mai le to'atele e fiafia lava i latou e nonofo ma ola i o tatou laufanua nei ma alaalata'i fo'i i tatou aiga. O i latou na e matua aoga i ai le fatuaiga tausi lea e a'oa'oina i totonu o lenei polokalama, e tamau ai latou iloa o le gaosiga o meataulima a Samoa, le agaifanua tau fa'afiafiaga ma nisi fo'i o ala e mafai ona fa'aaogaina ai tatou elei ma ie mamanu lelei, ina ia fa'atau atu e fesoasoani i le tamaoaiga tausi o latou aiga i'ine lava,” se tala lea a le tama'ita'i fa'atonu sili o le Arts Council, Lauagaia Mary Taufete'e.

 

E ese mai lea e i ai fo'i le avanoa e a'o ai le tata ukulele ma pesega e fatu fa'asamoa ina ia iloa ona pepese ma sisiva ai le fanau i a latou fatuga i lea fo'i agaifanua fa'asamoa o le fa'afiafia. O le a i ai le au ta fa'atagata po'o le 'au vane mamanu.

 

Ua iloga e fiafia tele le fanau i lenei a'oa'oga fa'apitoa o le taumafanafana aua e to'atele matua e matua faaaoga le taimi e o ane ai e fa'aulu igoa o nai fanau i lenei a'oa'oga. Lona lua, ua aoga i fanau ua fiafia ai e tautala, pepese ma talanoa fa'asamoa ae maise o lona silafia fo'i ona gaosi o oloa taulima fa'asamoa.

 

O le vaega a le TAOA i nai o latou tina ma tama matutua ua fa'afaigaluega ai, ina ia fa'asoa atu lo latou atamai i le fanau talavou, "Ia so'o le fau ma le fau i le lumana'i o galuega taulima ma le olaga iloa patino gaosi oloa fa'asamoa moni,” se tala lea a Taufete'e.