Ads by Google Ads by Google

Tala I Vaifanua


O le ali'i foma'i o ponaivi o le tino, Dr John Edwards ma le faletua o Dr Rebecca Edwards mai Utah. [ata foa’i]

FOMA'I O LE PONAIVI, MAPEVA MA MANU'AGA O IVI - FAIA TALAVAI FUA

 

Ua mae'a fa'amautu le ofisa o le ali'i Foma'i Fa'apitoa o Ponaivi, ia Dr. John Edwards i le Surgial Clinic a le LBJ Medical Center. O lo'o malaga mai o ia e galue i lana galuega fa'amisiona, e fesoasoani i le atunu'u o lo'o afaina ivi, po'o le vae, lima po'o le se isi lava vaega o le tino.

 

"O le ma'ua misiona na fa'auia mai i le Ofisa o le Peresetene Haleck o le Ekalesia a Iesu Keriso o le Au Pa'ia o Aso e Gata Ai, ma ua le totogia lea tautua, ae ua aoga fo'i i le to'atele ua leaga le latou savali ona o fa'aletonu i o latou a'ao, ma le to'atele o le fanau e afaina ivi o le tino ona o ta'aloga,” o se tala lea a Dr. Edwards, o lo’o malaga mai ma lona faletua, Rebecca Edwards.

 

E le o toe totogia talavai e va'aia ai lenei ali'i foma'i, ae ua fa'apea fo'i ona le totogia talavai mo le tautua a le faletua, Rebecca Edwards, aua o ia fo'i o le foma'i o le mafaufau.

 

Pe afai e te fia va'aia Dr Edwards e mafai ona asiasi i le Surgical Clinic a le LBJ mo se avanoa.

 

Ua le gata ina aoga tele le tautua a nei foma'i e to'alua mai Utah mo le la'ua misiona e fa'aaogaina ai le la'ua tomai fa'afoma'i, ae ua toe ofoina mai ma le anoanoa'i o masini e fa'aaoga mo suesuega ma togafitiga o ponaivi.

 

"Ona ua vala'auina i ma'ua e le Atua ina ia o mai e tautuaina i tatou i atunu'u laiti, o lo'o tele ai le mana'omia o le ma'ua tautua, ua faapena fo'i ona agaga i ma'ua ina ia aumaia le ituaiga o masini e aoga tele mo suesuega, ia mautinoa le iloa patino o le gaoioiga po'o le taotoga e fai, a le o lena fo'i na'o se togafitiga e fa'aleleia ai le ivi o lo'o fa'aletonu. O na mea uma, ua maua fo'i le falema'i e mafai ona ofo mai ai masini nei,” o se tala lea a Dr. Edwards.

 

"O se tasi o masini aoga tele o le fa'ata lena e mafai ona fai lava le taotoga ae mafai ona fa'aleleia atili ai le silasila toto'a a le foma'i i le vaega tonu o le tino o lo'o faia ai le taotoga. E pei lava o se mea pueata e va'ai toto'a ai i le galuega o lo'o faia i nei mea nini'i e ono afaina ai le taotoga ma toe fa'aletonu mulimuli ai le tagata ona ua misia ona kilia ese nisi o fasi ponaivi mai le vaega o le tino o taoto."

 

"Ua maua nei masini nei e ao ina fa'ao'o mai ae o lo'o sailia se pa'aga e mafai ona latou ofo maia le fa'ao'o maia o nei masini. E le tasi fo'i se taimi o le a mana'omia ai lea sao ina ia vave o'o mai masini e mana'omia.”

 

O nisi mea ua fa'ailoa mai, "Aua le fa'atu'utu'u, pe ua leva ona fa'aletonu lou a'ao, pe ua e matua fo'i, e mafai lava ona o'o ane mo se suesuega a le ali'i foma'i, ona iloa patino lea o le mea e faia i ai. O lo'o tatalia nisi o masini e faia ai ana taotoga ma suesuega i ituaiga tiga pei o le mapeva ma le ta'e o le pulou o le tuli, o mea na e vave lava le taotoga ae fa'aaogaina ai lana masini e fa'ato'a 2 vaiaso ona o'o mai lea."

 

Ua fa'aaogaina nei se tasi o masini sa leva ona i ai i le Surgical ae le'i fa'apipi'ia lava. Ua tu'ufa'atasia e le ali'i foma'i ma ua aoga nei mo le tusa ma le 50 taotoga ma suesuega ua mae'a faia e ia.

 

"Ou te fiafia tele e matou te galulue fa'atasi ma ali'i foma'i o lo'o ua i ai i le Surgical Ward fa'apea fo'i ma ni foma'i fa'apitoa mo talavou ta'a'alo i so'o se fa'agatama i le teritori nei. Aua o i latou na e ao lava ina matua silafia lelei le togafitiga o manu'aga tau ponaivi,” o sana tala fiafia lea.

 

Ua galulue so'otau'au i la’ua ma foma’i o lo’o i le LBJ, ina ia fa'aauau pea lenei galuega mae'ae'a i tulaga o togafitiga o ponaivi pe a tu'ua e i la'ua le teritori i le isi 2 tausaga o lumana'i nei.

 

21FAIAOGA FA'AU'U MA BACHELOR ELEMENTARY & SPED EDUCATION

 

O le afiafi o le aso Gafua, i le Faleta'alo o Tupulaga Talavou & Tina i Pago Pago, na fa'atautaia ai le fa'au'uga o le to'a 21 o faiaoga, maua Tusi Pasi i le Bachelor of Elementary Education & Bachelor of SPED Education, a'o nisi fo'i o Tusi Pasi Maualuluga o Aoa'oga o le Fanauiti mai le ECE.

 

"O se vaega sili ona taua i le olaga a'oa'o o le fanau, o le amataga mai ona a'oa'o tonu i latou, e le toe te'a ese ai. O se fa'asinomaga sili lea ua mafai ona fa'avaeina ai o latou olaga e sailia le atamai lautele,” o se vaega lea o le saunoaga a le Lutena Kovana, i le ‘au fa’au’u.

 

O le fa'au'uga lenei o le lona 32 ma le 33 ai lenei o vasega o faia'oga talu ona amatalia le polokalama lenei a le matagaluega o a'oga, ina ia toe timata lava le upega o tomai mo tatou faia'oga i potu a'oga."

 

"Faia'oga ua ausia lenei matati'a lelei, ia manatua lenei mea, "E le o le maualuga o lou tikeri ona e moe lea ae le faia lelei le a'oga a le fanau a'oga i lou potu a'oga i lou taimi e aoao ai. Ia maualuga le fa'aaogaina o lou atamai ua a'otauina ai oe, e toe fa'apopoto atili ai tamaiti o lo'o gasolo atu i lou potu a'oga, ma e iloa i aso fa'apenei ma vaitau nei o le olaga i Amerika Samoa, fua o a outou galuega a'oa'o o le fanau talavou a le atunu'u,” o le tima'i lava lea a Lemanu.

 

O le fa’afetai i le gagana peretania sa saunoa ai Dorothy Alofa Seumalo-Fuiava. Sa fa'afetai faia'oga mai le Iunivesite o Hawaii i Manoa, fa'apea faia'oga ma le aufaigaluega Amerika Samoa nei.  Sa fa’afetaia foi matua ma aiga, ae maise le vaega o ta'ito'alua o i latou ua fai aiga o le vasega. O le fa'asamoa o le latou fa'afetai sa tu'uina lea ia Fa'asolo Malo Tago.

 

Suafa o le au fa’au’u: Aki, Tufi Saua; Alofa Seumanu - Fuiava , Dorothy; Aoelua, Auga Prinisese; Aumoeualogo-West, Cathy; Faitala-Fouvale, Ashlee p.: Fasavalu, Aveimalo; Fuimaono, Anthony Androman PouonolefaleulaaTuimanu'a Puletasi; Ioane-Mikaele , Maryann Ateliana Toilolo; Leiataua, Taumate Shirley Patea; Logologo, Elena; Manumalo, Asofiafia Le'iato; Mata'utia, Hazel Lei'u;  Pa'o, Tuoea Fio Teuteu; Sitivi, Ili Ti'a Malele; Suafa'ase'e, Lemapu Nofoafono;  Taematua, Solialofi Tagi; Tago, Fa'asolo Malo; Tuala-TamaalelagiSosene Feagai, Fa'auliulito Rae; Ueli-Iose, Elalaumamate Tago; Uti Pisa, Salevalasi Judith Lesina ma Vaoesea -Tasi, Vanessa Fualelea.