Tala I Vaifanua
SUIA ASO E TAUNU’U AI VA’A LA’UOLOA ‘MV CAP PAPATELE’
Ua toe suia le taimi e taunu’u mai ai le MV Cap Papatele i Amerika Samoa, lea o lo’o i Honolulu e toe fa’aleleia ni fa’aletonu i lona afi.
O le aso na fa’ailoa mai e to’ai taunuu ai le va’a o Fepuari 18, peitai o lea ua toe fa’ailoa mai e le latou Ofisa autu i Amerika Samoa, le Samoa Pacific Shipping, o le a fa’ato’a taula mai i le aso 21 Fepuari.
O le aso 14 Fepuari, ua faatulaga e maea ai galuega lipea o le afi o lea va’a ona fa’ata’ita’ia loa lea pe ua agatonu mo isi ana faigamalaga.
O le tele o uta oloa o lo’o i le uta a le va’a lenei, ma ua aofia ai fo’i ma pusaoloa tele olola nusipepa mo le lomiga o tatou pepa lolomi mo le faitau a le atunuu.
I le taimi nei e le o suia lava le taimi to’ai taunuu ai le Polynesia Line lea na faailoa mai e to’ai taunuu i Pago Pago ia Fepuari 16. O le aso Lua na taula mai ai le Papua i le uafu i Fagatogo.
Ua faailoa e le Samoa Pacific Shipping, o le tele o uta uma ua mae’a fa’atulaga e malaga ese atu ma le ‘MV Cap Papatele’ ua solofua lea malaga ma ua lisia uma lea uta a le va’a lea i le tatou va’a o le ‘MV Polynesia Line’ i lana Mati 2, ae fa’ato’a toai taunuu ia i tatou ia Mati 21 mina ua mae’a afea le uafu i Oakland California ma Papeete i Tahiti ma Apia i Samoa.
O le tele o faleoloa tetele ua latou oka maia latou fuala’au aina mata ma le tele o fuala’au aina mo le tapenaga o taumafa a le atunuu ma toe la’u mai i va’alele, ua va’aia le eseesega o le tau o nei oloa i luga o fata oloa i le taimi nei. O le tau o na oloa sa i ai e nao le ta’i $2. peita’i ua $7 i le mea e tasi. O le afaina lea o le fofoga taumafa o le atunuu pe afai e la’uina mai i cargo a va’alele a tatou oloa mo fefa’ataua’iga.
FA NOFOAGA I TAFUNA FA’AGAOIA AI LE ELETISE
E fa nofoaga eseese i Tafuna ua mae’a fa’auia fa’agaoia ai le Malosi’aga Fa’aeletise. O se gaoiga matuia lea aua e mautinoa e ono afaina ai le soifua o se tasi e faia lea gaoiga, ma ua lamatia fo’i ma le falenofo o lea aiga, ae ua ave fa’agaoi.
Ina ua fa’aalia se finagalo o se tasi o tagata e iloa lea tomai faiuila, sa ia fa’aalia ai, “E leai ma se isi na te iloa faia feso’ota’iga faapea, ua nao tagata faigaluega lava a le ASPA, ua latou silafia foi laina e mafai ona faia ai.”
O lona uiga, “Ua fa’ailoa mai e lea sui, ua toe mama lava le vaa o Ti’a ia Ti’a! Va’ai toto’a i au tagata faigaluega ASPA, ina ia maua lelei le mea o faigaluega ai lena tagata, ae ai ua taga le pili a le aiga ua ia sefea mai le pili eletise.”
O le mea na tupu ua lipotia mai e tagata le fa’aletonu ona soloai atu le latou eletise i le fale, ae oo atu i ai tama faigaluega a le Matagaluega, ua matua leai lava ni uaea ma e fa la nofoaga i Tafuna ua maua ane ai lea ituaiga o faiga.
O le tele o nofoaga lea ua matauina e faia ai lea faiga e le aufaiuila, ua faia lea i nofoaga e punitia tele mai le va’aiga a tagata lautele, ma ua iloga mai e masani ona faia nei suiga i le sapalai o le eletise i le po ma le ao.
Ua faailoa e Wallon Young, CEO o le ASPA, “O uaea eletise lea e faia ai nei mea e sui nei o uaea e vaivai le sapalai o le eletise lea faauia ai.”
Ua tuuina atu lenei mataupu i le vaega o leoleo ma a latou suesuega.