Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

FA’AILOA PERESETENE ASCC - SUIGA O AOGA A LE FANAU & TAU

 

I le fonotaga a le kapineta i le aso Gafua, sa fa’ailoa ai e le Peresetene o le Kolisi Tuufa’atasi Dr Rosevonne Pato suiga o le a fa’atautaia ai aoga a le fanau mo le tau mafanafana ae maise le tausaga aoga fou 2020/2021.

 

O le totogi e fa’ae’e ai lenei suiga ua mae’a fa’ataoto mo le taumafanafana e $2.5miliona, ae o le tau fo’i e faae’e ai le suiga o aoaoga mo le tausaga aoga fou, $3.1miliona. O le tuufa’atasiga o lea vaega tupe atoa e $5.6miliona, ma e mana’omia le fesoasoani e le ASCC mo lea fa’atupega.

 

O le tele o lea tinoitupe o le a fa’aaogaina lea mo le tautuaina o fanau a’oga ina ia fa’aaoga mai laina feso’ota’i fa’ainiteneti e fa’atautaia ai lesona i potu aoga ma le faiga mai fo’i o latou meaaoga e mana’omia ona fa’afo’i atu e maua ai o latou togi i mataupu latou te tau’avea mo latou kosi. O le fa’alautele ma le fa’ata’alisea o le auaunaga fa’ainiteneti e ao lava ina mua’i faia ia mae’a lelei ina ia so’otaga lelei fanau a’oga ma latou faia’oga e fa’aaogaina ai le tautua initeneti.

 

Ina ua mae’a le tautalaga Dr. Pato, sa saunoa ai loa Kovana Lolo Matalasi Moliga, “Ua tatau i le kolisi ona latou fa’aaogaina se vaega o le latou paketi o le tausaga fa’aletupe lenei e totogia ai se vaega o lenei tau e mana’omia mo le fa’ae’e maiga o le faiga fou lenei e aoaoina ai fanau a le atunuu ua autova’a atu i le tatou Kolisi Tuufa’atasi. E le gata i lea, e tatau ona amata talosagaina a outou pa’aga ina ia fesoasoani mai i le fa’atupega lea e mana’omia mo le tatou Kolisi. E tatau foi ona talosaga le fesoasoani a le Faipule a Amerika Samoa i le Konekeresi.”

 

AFUAFUA FA’ATULAGAGA FA’ATAUTAIA AOGA TAUSAGA A’OGA FOU

 

Na Saunoa le tamaitai fa’atonu sili o a’oga, Dr. Ruth Matagi-Tofiga, i le fonotaga a le kapineta i le aso Gafua e fa’apupula fa’atulagaga ua afuafua nei, e tata’i aga’i i ai le fa’atautaiga o a’oga a le malo i le tausaga a’oga fou 2020/2021.

 

Mo A’oga Maualuluga, e tatau ona i ai vasega e faia i potu a’oga, ae o isi fo’i e faia i luga o so’otaga fa’ainiteneti. Ua fa’atulaga ona faaauau a’oa’oga o le atamai Lautele e ala i mataupu fa’atulaga e fa, Numera, Igilisi, Saeanisi ma Mataupu Tau le Va fealoa’i [Social Studies].

 

E fa’atautaia fo’i kosi uma e mafai ona filifili le fanau pe ave pe leai, lea e aofia ai le JROTC, Musika ma isi e fa’ailoga o Elective Courses.

 

I aoga maualuluga lava, e muamua ona faia a’oa’oga i potu a’oga a le fanau i Vasega 9 ma le Vasega 10, a’o le taimi lea o lo’o faia vasega i luga o so’otaga initeneti a Vasega 11 ma le 12. O lona uiga e ao ina 3 aso atoatoa o vasega i potu aoga ua feagai tonu lava ma faia’oga e a’oa’o mai i le fanau a’oga. O isi aso e lua i le vaiaso e faaaoga mo Kosi e filifilia e le tamaititi pe ave pe leai ma a’oga i luga o laina feso’ota’i a le Initeneti.

 

I a’oga tulaga muamua, ua tatau ai ona tele le taimi e avea mo fanau laiti mai le Vasega K5 i le Vasega 4. E tatau ona lava le taimi e aoao ai e faia’oga i latou nei ina ia so’otaga le olaga o le fanau i aiga ma le olaga a’oa’oina i potu a’oga ma ia fa’aaoga fo’i le tele o le taimi i a latou lesona e a’otau ai le fanau i ala e faia ai meaa’oga i luga o le Initeneti.

 

O le la’asaga muamua lea o le olaga o le fanau e mafai ai ona latou faamasani i le fa’aaogaina o laina feso’ota’i nei ma faia’oga ina ia soo gofie le aoaoga i le potu aoga ma le fa’aaogaina o masini eseese o le talutalufou e faia ai galuega mai aiga, ma fa’asinoala i aoaoga e fa’aaoga ai laina feso’ota’i a le Initeneti.

 

E i ai a’oga e to’atele anau a’oga o lo’o a’oa’oina ai, o le lu’iga tele lena i faia’oga uma o i ai i lena aoga, ma e tatau lava ona tau paleni mai le aoafiga o le fanau a’oa’o e le faiaoga e tasi i totonu o le matagaluega atoa.

 

Fa’ailoa e Matagi-Tofiga o a’oga e laititi le faitauga o fanau aoga o i ai, e 15 i latou, lea e aotelega i ai le Manu’atele i aoga uma o i ai, ma isi i Tutuila nei, e amatalia lava a’oga i le sologa lelei, peita’i o le lu’iga o le a i ai lea i a’oga e to’atele naua le faitau aofai o le fanau aoga o iai, e aotelega ai Pavaiai Elementary, Manulele Elementary, Tafuna Elementry, Aua Elementary, Pago Pago Elementary, Matafao Elementary  ma Lupelele Elementary.

 

O isi a’oga e matele ina na’o le to’a 20 fanau a’oga i le potu a’oga e tasi i taimi uma, ma e faigofie atu ma ua fuafua e sauni fo’i e faia a’oga i le vaiaso atoa i le amataga o le tausaga a’oga fou.

 

O nisi aoga lea e to’atele, ua faatulaga ua na’o le tolu aso aoga e pei ona fa’alauiloa i luga.

 

Ua mautinoa nei, e ao ina i ai laina o so’otaga fa’ainiteneti i totonu o maota o aiga, ia fa’afaigofie ai meaaoga a le fanau.

 

MALIU FAIAOGA MUSIKA, TUSI PESE & FATUPESE DAVID POUESI

 

E ui ina talavou, ae ua misia nei e Amerika Samoa se tasi o ana tama fanau ua iloga i le taleni o le ta pese, tusi pese ma fatupese ma e fai lana Fa’aili - Banned from the Sun, mai le afio’aga o Aua, le ali’i talavou o David Siuleo Pouesi.

 

Na taofia Pouesi i le falema’i i Faga’alu i le aso Gafua peita’i ua maliu o ia i le taeao o le aso Sa na te’a nei, a’o i ai si ona to’alua o Lori Baker Pouesi ma lona tina o Sonja Pouesi i ona moega. Ua na’o le 37 tausaga o lona soifua, ma ua i ai fo’i si ona atali’i e to’atasi o JJ.

 

O lana fa’aili lea ua lauiloa i le tatou atunuu aua e masani ona fa’afiafia i latou i fa’afiafiaga a’o loma le tatou sisigafu’a i le tele o tauaga ua tuana’i ma ua auai uma i latou ma ona tei laiti ma tuafafine i le latou lea fa’aili.

 

O lana lea taleni, na mafua ai ona maua e ia le tofiga “Faia’oga i le Musika” i le a’oga a le Fa’asao Marist  High ma ua oo mai ai ina fa’afaigaluega fo’i i le South Pacific Academy i lana lava lea taleni.

 

Ua molimauina e le to’atele lea fa’aili e matua fiafia tele fo’i i ai le vasega o fanau a’oga i le tatou Kolisi Tuufa’atasi aua o iina sa a’oa’oina ai i latou uma ma ona tuafafine ma e masani ona i ai o latou sao i fa’afiafiaga faia a le Kolisi e ala lava i le musika.

 

O nisi o matati’a i le olaga faia’oga i le musika a Davd Pouesi i le South Pacific Academy, ua ia tu’ufa’atasia ai le vii o lea a’oga ma nisi o lana vasega musika ma ua fa’aigoaina “Dolphin Anthem” masalo o le a i ai se taimi o lona toe sauniga e taina ai lea vii.06