Ads by Google Ads by Google

Tala I Vaifanua


[ata: SN]

Pago Pago, AMERIKA SAMOA - 

 

MV FOTU O SAMOA - ULUA’I MALAGA MAI MA UTA I AMERIKA SAMOA:

 

Ua fa’ailoa e le Samoa Shipping Corporation, ua fuafua le malaga mai o le MV Fotu o Samoa, e aumai le uta o lo ua mae’a fa’atu’ufa’atasia mai Samoa mo le a’u faipisinisi ma Aiga fo’i iinei o lo’o fa’atalitalia lea va’a ma uta.

 

Ua galulue nei le Kamupani e tautuaina lea va’a i le tatou nei malo ina ia fa’atulaga uma pepa e kilia ai latou tama faigaluega i luga o le MV Fotu o Samoa, ina ia vave ma le faigata ona fa’ataunuuina tiute i luga o le uafu, le to’ai taunuu  mai o le va’a ma uta.

 

O le aso Tofi ua fa’atulaga e taunuu ai lea malaga ma e leai ni pasese. 

 

O le uta ua malaga mai ma le va’a lenei ua mautinoa lava o lo’o tele i le talo ma isi fua o fa’aeleeleaga o lo’o talia ona ulufale mai i le atunuu. Ua i ai fo’i le sapalai o le Pia a le Vailima o la’u mai, peita’ina fa’aalia i le fonotaga mulimuli o le vaiaso na te’a e le afioga le Kovana, ua malilie i la’ua ma le Palemia o Samoa o le a toe amatalia malaga a va’a mo uta, ae taofia pea pasese femalaga’i.

 

 “O lo’o mana’omia tele e i tatou le uta mai o le talo ma mataia’i a le atunuu o fua fa’aeleeleaga a Samoa, ae ua mananao fo’i nai aiga iinei e avatu sina fa’asoa o le tele o foodstamps ma stimulus ua maua i lenei vaitau e avea ma fa’amomoli i nai o latou aiga i Samoa,” o se saunoaga lea a le Kovana.

 

TATALA UEPESITE TAUA I KOREA - FA’AILOGA 70 TAUSAGA TALU ONA TUPU

 

O le tama’ita’i o Hannah Kim, o se tasi sa galue muamua i le Ofisa o se tasi o Sui o le Konekeresi, Charles B. Rangel, mo tausaga e tele o lona soifua tautua i Amerika, peita’i ona o ia o se tasi e tupuga mai i matua o Korea, sa nanau ai lona loto ina ia fa’atula’ia se mau ma faaiugafonoina e le Konekeresi le fa’amanatuina o le Taua i Korea.

 

O lana taumafaiga na oo ina pale ma sainia e Peresetene Obama lea iugafono e fa’amau fa’ailoga ai le vaitau o le Taua i Korea, lea ua atoa i lenei tausaga le 70 tausaga talu ona tupu lea taua ma e to’atele fitafita Amerika sa maliliu ai.

 

I le vilivilita’i pea o lenei tama’ita’i talavou, Hannah Kim ia fa’ataua ma fa’amau faailoga i latou uma na tautua i vaega au eseese sa auai i lea taua, na malaga solo ai o ia i atunuu uma o le lalolagi ua faamauina sa i ai o latou tagatanuu ma avea ma fitafita tau i lea taua. Na oo mai fo’i lana asiasiga taamilo ma tausailia fitafita uma na tau i lea taua i Amerika Samoa nei ma Samoa.

 

Ua mae’a tuufa’atasia lana “Website - Korean War” Uepesite o le Taua i Korea - www.KoreanWarMemorials.com- ma e tatala aloaia i le masina fou o Iulai, e avanoa mo le pa’ia lasi o aiga e maimoaina, pe va’ai ai i latou ia ta o latou pelega na fa’aulu mai suafa ma ata, o e fo’i na tautua i vaega au a Amerika i lea taua. 

 

“O le uepesite lea, ua mafai ona tuufa’atasia i ai le tele o fa’atalanoaga ma fitafita tuai sa auai i lenei taua, ua fa’asolo mai ai le lisi o i latou na le maua muamua i fa’amaumauga, ae ua fa’amauina ona o a’u malaga sa’ili sa fa’atautaia i le Iunaite Setete o Amerika ma ona teritori, ae maise o nuu tuaoi i le pasefika ma isi malo e aofia ai Ausetalia ma Niu Sila, Peretania, Siamani, ma nuu uma o Europa sa aofia i vaega au a Peretania sa fesoasoani e tau i lenei taua, ina ia maua mai uma le to’atele o i latou na masa’a toto i laufanua o Korea ona o lea taua tele,” o se tala lea a Kim. 

 

“Ua le gata la ina maua ata, ae ua i ai fo’i le “Puipui Fa’ataua mo Toe Sa’afi’afiga” o lo’o lisia ai suafa, fa’afofogaina lou leo ua e saunoa fa’apitoa mai e tusa o lou iloa o lea taua.” Ua lisia suafa o fitafita e tusa o atunu’u ua lisia na soifua ma ulufale mai ai i le vaega au, pe o le atunuu fo’i na maua atu i ai oe o e alaala ai i le taimi o fa’atalanoaga ma malaga saili a le tamaitai o Hannah Kim.

 

Mai fa’amaumauga, ua fa’ailoa ai e 41,000 i latou na maumau le soifua ona o lenei taua tele, ma e fa’asolosolo mai suafa uma o i latou i le “Wall of Rememberance” poo le “Puipui Fa’ataua Toe Sa’afiafiga!” 

 

Ua i ai fo’i le avanoa e fa’aalia ai soiu taofi e tusa o lenei taumafaiga pe a mae’a lau maimoaga i lea Uepesite, ae maise o ni ou alofa’aga i pelega ua maumau i le taua i Korea, ona o pelega a lou aiga, poo se tasi ua e silafia ua fa’aalia ai.

 

O le vaitau o le taua lea i Korea na amata mai ia Iuni 25, 1950 seia oo i le 1953.

 

TAGATA NU’U AMERIKA SAMOA TOE FA’AFOI MAI SAMOA

 

I se fa’aaliga fa’alauaitele i le amata o le vaiaso lenei, sa fa’ailoa toe fa’amalamalama ai e le Matagaluega o le Soifua Malolo ma toe fa’amanino i le atunu’u taumafaiga o lo'o feagai ai ma le tatou malo i lenei vaitaimi. 

 

“O lo'o toe fa’afoi mai tagata nofo mau o Amerika Samoa na faapea ona taofia i Samoa talu mai ona tapunia ala va'a ona o le faama'i o le Koviti19 (COVID-19),” o le fa’aalia lea a le Matagaluega. 

 

“E le o iai se avanoa e malaga mai ai se tasi e tafao, fai se faatauga, saini se siaki stimulus, po'o se isi mafua'aga e ese mai i le toe foi mai e nofo mau i Tutuila. A faapea o le fuafuaga lena, ua fautuaina faamolemole, taofi nei loa lena faamoemoe, ina e le toe mafai ona toe foi i le mea e te nofo mau ai. E le o se taimi nei e feoa'i ai ae maise o lo'o pipisi pea le Koviti i le lalolagi atoa.”

 

Talosagaina e le matagaluega le atunu’u e faasoa atu i tagata ma uo e te masani ai ina ia nofo malamalama le tatou atunu'u i le faamoemoega o le tatou malo mo aiga ma uo o lo'o toe fia foi mai i le tatou atunu'u e nofo mau. E leai se mautinoaga po'o se fesoasoani foi e toe maua atu pe a maua oe o lo'o e fealua'i i luga e nei mafua'aga sese.

 

Ua atoa nei le 118 o tagata Amerika Samoa mai Samoa ua nofo puipuia i nofoaga a o le DWYA ma le Sadies lea ua fa’avasega lelei aua tagata matutua ua i ai gasegase tumau e ao ina mautinoa o tausia lelei ai ma inumia latou vai ma fuala’au fa’atulagaina e ese mai le suesuega lava latou a le matagaluega poo maua i auga o le gasegase Coronavirus.