Ads by Google Ads by Google

Tala I Vaifanua


[ata: foa'i]
ausage@samoanews.com

Pago Pago, AMERIKA SAMOA

 

TOE 3 VAIASO FAI LE PALOTA - AE FAIA A’OGA OFISA O PALOTA

 

Ua toe tolu vaiaso fai le palota a le atunuu, ae ua faliu ane le Ofisa o Palotaga a le atunuu ina ia faia le a’oa’oga fa’apitoa mo i latou uma o le a galulue e fa’aatautaia le palota mai nofoaga uma ua mae’a fa’atulaga i le atunuu, e avea ma nofoaga e faia ai palota i itumalo ma afio’aga ta’itasi.

 

O i latou o le a auai i lenei aoaoga fa’apitoa e aofia ai pulenuu, o e o le a auai e fa’amau a latou tagata palota ua solo atu e faia latou palota e oo lava ia i latou leoina fo’i le nofoaga. 

 

Ua fa’ailoa e to’a 230 i latou o e galulue i le fa’amauina, ma le fa’atautaia o le palota i nofoaga eseese i le atunuu ia Novema 03.

 

O le toatele lava o i latou sa faigaluega muamua fo’i i si palotaga muamua, ma ua masani ai i lea faiva. O le isi lea mea ua fa’ato’a faia ai fo’i le a’oa’oga ae ua toe o nai vaiaso fa’ataunuu le fa’amoemoe o le malo o Amerika Samoa.

 

O lo ua aofia i le aoaoga faapitoa lenei le vasega o Pulenuu ona o i latou nei e fa’amoemoe i ai le leoleoga o le nofoaga o faia ai palotaga. O le aoaoga lea e faia ia Oketopa 19 ma ua fa’apito augafa i le vasega o pulenuu.

 

O Oketopa 21 ua faatulaga lea mo sui o lo’o fa’amauina palota a latou sui tauva o le palotaga i lenei tausaga i tofiga Faipule, tofiga Sui i le Konekeresi ma sui tauva o le palotaga mo le Kovana ma le Sui Kovana mo le Falelima i Sasa’e atoa lava. 

 

O Oketopa 22 ua fa’atulaga mo le aoaoga fa’apitoa o i latou uma e aofia i le fa’atautaiga o le palota i le vaega tutotonu o le Motu o Tutuila, ae o le aso 23 Oketopa, ua fa’atulaga lea e faia ai le aoaoga fa’apitoa mo le falelima i sisifo.

 

O lo ua faatulaga fo’i i latou e avea ma sui fa’amaumau a sui tauva ta’itasi i tofiga uma ua sailia i le palotaga mai le falelima i sasa’e e faia latou tautoga ma fai ai latou palota ia Oketopa 28.O i latou i afio’aga tutotonu ua fa’atulaga e faia ia Oketopa 29 ma le vaega faamaumau o palota i le falelima i sisifo e faia lea ia Oketopa 30.

 

E 41 nofoaga ua mae’a tapena e fa’atino mai ai le Palotaga o Novema 03. O le toe aso e talosagaina mai ai se palota e faia mai fafo, lea e aofia ai ma i latou ua mae’a lesitalaina e palota ae ua opea nei i fafo ona o le Covid-19, o lo ua fa’amuta lea ia Oketopa 19.

 

TAFUNA HIGH FA’ATUAGA SOLO TETE’E E FA’ATU OFISA O A’OGA LATOU MALAE

 

O le taeao nei, amata i le itula e 6a.m, aso Faraile, ua fa’atulaga ai e le PTA ma Tama ma  Teine tuai a le a’oga Maualuga a Tafuna se latou solo tete’e filemu ina ia amana’ia mai e Kovana Lolo Matalasi Moliga latou fanoga, e fa’amatu’u mai pea le Malae ma atugafale i le eleele pitoalalo o le latou lotoa, e toe fa’atutuina ai nisi falea’oga mo le aga’i i luma o le Laumua o le Toa.

 

O le fuafuaga a le Malo ua mae’a fa’ailoa ane, o lea malae ma atugafale ua tu’uina i lalo, ona o le a fa’atu se faletele e aofaga i ai le isi vaega tele o le Matagaluega o A’oga e pei ona mana’omia ona tu’ufa’atasia i se faletele e tasi.

 

O nei ofisa autu o isi vaega tetele ia o le matagaluega e aofia ai le ERATE ma ia vaega fo’i o le Matagaluega o lo’o fa’atulaga solo i totonu o atugafale o le Paka Liona.

 

Na tuai ona fa’aalia se manatu o le PTA i le taimi na va’aia ai ua tu’u i lalo fale a’oga sa fa’atautaia mai ai le JROTC ma Potu Aoga Fa’a-Atisi ma isi matata eseese, sa manatu i latou uma o le a foe fa’atuina ai se falea’oga tele e fa’aleleia atili ai aoaoga mo nei polokalama aoga. Peita’i ina ua fa’ato’a iloa e i latou e leai o le isi lea fale tele mo le matagaluega o A’oga, ona fa’ato’a fa’aosofia ai loa i latou e una’ia malosi lea mataupu, ia tu’u pea le eleele mo le Laumua.

 

Ua mae’a fa’ailoa mai fo’i e le malo ma le matagaluega le pagatia o lo’o feagai ma le Malo. O lo ua i ai le fuafuaga e fa’alautele mai le Uafu ma e a’afia ai le nofoaga o lo’o fa’atautaia mai ai le ERATE i le taimi nei, i autafa ane o le ECE Center i Fagtogo. O le ala lea o le manatu ia vave faia se faletele e mafai ona sifi ane i ai le ERATE, aua o se tasi lea o vaega tele o le mataglauega o a’oga.

 

O se tala mai a le tamaitai o Fetaomi Mailo, fa’atasi ai ma le to’atele o nisi sa a’o’oga uma lava i Tafuna, o le a latou fa’atasi uma i lumafale o le TBAS i Tafuna ma o iina o le a faatautaia ai le latou talotaloga ma le savaliga filemu e fa’ailoa ai lo latou fanoga i le atunuu fegasoloa’i. Ua fautuaina ina ia auai uma ane i le itula e 5:30 i le vaveao nei. 

 

FA’AALIA MAFUAGA O LE MOTUSIA O LE ELETISE - PO ASO LUA 

 

O le to’atele na molimauina le motusia o le eletise ma ua fa’ate’ia ai fo’i i latou, ona ua le fa’atasi ona motusia le eletise ae o nii ua fa’aalia e fa’alua pe fa’atolu i lea lava afiafi.

 

Peita’i ua fa’ailoa e Wallon Young, o le ta’ita’i o le ASPA, “O le pe so’o ai o le eletise mai nisi o afio’aga lea na pe mai ai mai ai le eletise mai Tafuna se’ia oo i le Falema’i Tele i Faga’alu, ona o le uaea lea e ta’ia mai lalo i le eleele - Feeder 5 ua faaletonu.”

 

I le afio’aga o Nuuuli na toe motu fa’afuase’i le eletise ona sa va’aia fo’i le pa o nisi o uaea ola o le eletise lea e pito lava i luga lo latou ta’iga i pou uila, ma ua sioti ma toe pe fa’alua ai.

 

O le uaea lea na pa ona ua masalomia foi ni manu ua feoa’i solo ai, isumu po’o pili moo ma o uaea ia e ola, ma o se taimi timutimu fo’i o le afiafi na tupu ai lea fa’aletonu i le magatolu tonu e aga’i atu i le Falepuipui ma le Paka Liona.

 

O le motusia muamua o le eletise o le itula e 6:40 i le afiafi, ae o le falema’i lava latou na sefe lelei ona ua mae’a i ai le latou afi moli. Na’o na motusia lava o le sapalai eletise mai le ASPA ae oso le afi le moli a le falema’i ma ua sefe mai ai le falema’i atoa mai le motusia o le latou paoa.

 

E le’i leva ona pe le itu mai o Nuuuli ae pe mai le itu lea e afua mai Tafuna ae gata mai i le Kent Samoa, ma e tolu sefulu minute na pe ai lena vaega o le motu.

 

O le umi o le pe o moli i Faga’alu se’ia oo atu i Matuu e tusa ma le itula. Ua fa’ailoa mai la e Wallon Young, ua mae’a maua lelei e a latou vaega a le T&D le cable lea e ta’ia mai le eleele lea e fa’aletonu e tusa o le ta o le 2:00 i le vaveao.

 

“Ua mae’a faia suega mo le malosi’aga o nei uaea e taofia ai le eletise ua mafai ai ona iloa patino keipo lea ua fa’aletonu i Faganeanea. Ua mae’a faia mai galuega lipea i nei keipo talu mai lava le vaveao o le aso Lulu ma ua mae’a toe suia atoa le tele o laina nei e tusa ma le 900 futu le umi.”

 

Ua fa’ailoa e Young, “O le mea sili ona faigata pe a o’o ina fa’aletonu se keipo o le eletise o lo’o ta’ia i lalo o le palapala aua ele faigofie ona maua a’ia’i le cable o fa’aletonu, e sili ai la laina e ta’ia i luga o pou, e faigofie lava ona saili laina o pe ma toe suia. E tele mamao atu itula o tagata faigaluega e faia ai le galuega lipea mo Keipo e toso i lalo i le eleele.”

 

Ua fa’amalulu mai fo’i le ali’i pule sili o le ASPA i le mamalu o le atunuu lautele i le motusia ai o le eletise, ma ua lagona fo’i e i latou le aufaigaluega le faigata ona fa’amalie le atunuu ona o le motusia o le eletise. Ae le o se mea faigofie fo’i le galuega ma le tausailiga o le fa’aletonu ona ua vave fo’i le pogisa o le taimi na pe tonu ai le eletise.

 

Ua mae’a silasila ma faitauina e le mamalu o e uma na tau ane i le fa’asea a tagata i le fcebook ona o le motusia fa’afuasei o le eletise i lea afiafi.