Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

2 SUI UA MAUA I LE COVID I SAMOA – E LE PESIA AI SE TASI

 

I se lipoti mai Samoa, ua fa’ailoa ai ua i ai le to’alua o sui na malaga mai fafo, ua o mai ae ua mae’a ona maua ma toe togafitia i le Coronavirus. O le ali’i talavou 23 tausaga sa maua o ia i le Covid-19 a’o i ai o ia i Italia, ao galue o se seila. O le tama matua e 70 ona tausaga sa maua o ia i le Covid-19 ao i ai o ia i  Melepone, Ausetalia.

 

O i latou uma fo’i sa malaga fa’atasi mai ma nei sui e to’alua i le va’alele ua nofo va’ava’aia pea, fa’atasi ai ma le vasega o le aufaigaluega i le Malae Va’alele sa tautuaina le malaga mai o nei sui i totonu o le atunuu ina ua tulaueleele le latou va’alele.

 

O le alii Seila sa maua o ia i le Covid-19 ia Me, 2020 ae o le tama matua sa maua i lea fa’ama’i ia Aukuso, 2020.

 

I suega na faia nei i Samoa ina ua ulufale mai, sa maua isi suega e fa’amaonia ua maua i le covid-19, ae o i si e maua ane e kilia i la’ua. O le mea lea sa fa’aumiumi ai pea ona faia pea suesuega ma auina atu nisi o suega nei i Niu Sila ina ia mautinoa atoatoa ai le tulaga moni ma fa’amaonia o nei suega uma sa faia.

 

Na iu ina faia suega o le toto o nei sui, ma auina atu i NZ i le aso Faraile na te’a ma ua maua ane nei faaiuga o nei suega o le toto, o le tulaga ua i ai nei le Covid-19 e le toe pesia ai se tasi, ma ua fa’aauau pea lava ona faia suesuega ia mautinoa ai lea tulaga e le o toe a’afia se tasi ia i la’ua nei.

 

Fa’ailoa e Leausa Dr Take Naseri, o le fa’aiuga lea ua maua mai i suega o le toto o nei sui sa auina atu i Niu Sila, peita’i ua fautuaina fo’i ina ia nofo va’ava’aia pea i latou uma sa malaga fa’atasi mai ma sui nei, fa’atasi ai ma le aufaigaluega a le Malae Va’alele ma le Matagaluega o le Soifua Maloloina, ina ia fa’amautu atili e le o i ai se isi e toe a’afia i nei sui.

 

Ua toe fa’aopoopo mai le isi fitu aso e toe nonofo va’ava’aia ai atoa le 274 tagata o lea aumalaga na o mai fa’atasi ma sui nei e maua i le covid-19.

 

Ua fa’amalosia uma lava tagata ina i Samoa ina ia fa’aaogaina pupuni fofoga pe a oo ina feoai solo ma fa’atasi ma isi e to’atele i mafutaga eseese. E ese mai lea e ao ina faamama nofoaga uma ina ia le a’afia nisi.

 

Ua talia lava le faaauau ona o mai o va’alele e lua mai Niu Sila, ae ua le toe fa’atagaina ona o mai ai nisi o pasese mai isi atunuu, ua na’o sui lava sa aumau i Niu Sila. Peita’i ua fa’ataga na’o alo o Samoa sa ao’oga fa’asikolasipi mai isi atunuu ua uia mai Niu Sila o le a fa’ataga ona o mai ai i lea va’alele.

 

AMATA IA TESEMA 01, 2020 – FA’AAOGA UMA PUPUNI FOFOGA:

 

Ua fa’atulaga nei e le matagaluega o le soifua Maloloina le ulua’i fa’amalosiga o le taumafaiga ia le a’afia lava se tasi i le Covid-19, ua fa’amalosia nei lou fa’aaogaina o le pupuni fofoga, i so’o se taimi lava e e te ulu ai i so’o se nofoaga o le Matagaluega o le Soifua maloloina.

 

Ua fa’ailoa mai e le matagaluega i le latou faasalalauga lata mai, ua faia lenei fa’aiuga ina ia le a’afia lava se tasi, ma ua iloga fo’i le fa’ateleinao le aofai o tagata ua a’afia i le covid-19 i Hawaii na usu setete i Amerika. 

 

O nofoaga uma e aofia i le fa’atonuga lea ua aofia ai le falema’i i Tafuna ma Faga’alu fa’apea fo’i ma Amouli ma Leone, o falema’i fa’aitumalo o lea matagaluega.

 

Ua fautuaina e le matagaluega, e fa’atau mai pupuni fofoga su’i ina ia mafai ona toe tata ma toe fa’aaoga fo’i, e sefe ai fo’i le tupe faaalu mo aiga ta’itasi. Ua le gata i lea ae ua tima’ia fo’i le mamalu, ina ia to’aga e fa’amama nofoaga uma ma ia nonofo vavamamao ma isi uma i so’o se taimi e tumutumu ai fa’atasi nisi i so’o se nofoaga. Ua fa’atulaga fo’i ina ia feoa’i ma feavea’i vaila’au fafano ai lima i so’o se taimi, ina ia fa’aaoga i taimi e mana’omia. Ua fa’ailoa e le matagaluega e tatau ona ta’itolu pupuni fofoga mo tagata uma o le aiga, ma fa’aaoga fo’i ma toe tata ma ia toe fa’aaoga.

 

Pe afai ua maua oe i le tale ma ua fiva fo’i, e ao loa lava ona e nofo i le fale, sei mae’a ona e toe malosi. Ua fa’ailoa manino mai fo’i e le matagaluega o soo se fa’alauiloga fo’i o nisi ua maua i le Covid-19, o le a fa’alauiloa mai lava e le Matagaluega o le Soifua Maloloina ma le Komiti Fa’afoe o le Coronavirus a le tatou Malo.

 

Pe afai e lagona e se tasi e fia iloa a’ia’i fa’amaumauga uma tau lea ituaiga o mataupu, e ao lava ina fa’afeso’ota’i mai le matagaluega o le soifua maloloina.

 

FA’AMANATU LE TAOTOGA LONA 100 UA FAIA E FOMA’I:

 

Na faia se fa’atasiga i le falea’iga o le DDW i Utulei, i le aso Lua ua te’a, ina ia faamanatu le atoaga o le lona 100 o taotoga ua fa’atautaia e le vasega o foma’i na fa’amisiona mai e le Ekalesia Mamona,  talu mai ona to’ai taunuu mai i latou ma galulue fua i le Falema’i o le LBJ. 

 

O le to’atele o sui sa auai i lea fiafia tele, sa aofia ai le vasega o e galulue i le Potu o Taotoga, o nisi fo’i o i latou sa fa’atino o latou taotoga ma ua fiafia i iuga ua latou fa’alogoina ma ua soifua ai nei. Sa auai foi le CEO o le falema’i Faumuina John Faumuina, ma o ia lea sa ia fa’aleoina le agaga o le fa’afetai e fia fa’ao’o atu i le pulega a le vasega o galuega fa’amisiona a le LDS ona o le polokalama feso’ota’i ma le tatou tausiga o le soifua maloloina, ua mafua ai ona to’atele ua manuia ma ua ola fiafia.

 

Ua le gata i le tele o taotoga ua fa’amanuiaina nei, ae ua siitia ai fo’i le tautuaina o gasegase i lea itu o le tautua, ua lelei ai fo’i ma le tulaga o masini ma fa’ata o so’o se ituaiga o lo’o fa’atautaia i le falema’i ina ia tautuaina lelei le soifua o tagata o gasolo mai mo latou talavai ma togafitiga i le LBJ.

 

E le’i galo fo’i i le ali’i Pule Sili o le falema’i Faumuina John le fa’afetai i le susuga Elder Vince Haleck ma le faletua Peggy Haleck ao i ai i la’ua i le tofiga tau Peresetene o le LDS e va’aia atoa ele Ekalesia i le vasa Pasefika, sa mataituina ai e Haleck e taua lea auaunaga mo le tausiga o le soifua Maloloina o Tagata uma o le tatou nei teritori fa’apea ma isi malo fa’aatumotu uma o le pasefika.

 

O le talosaga sa ia fa’aulu, lea ua mafai ona fa’auia mai ai nei Misionare o Foma’i ua malolo ua litaea mai tiute i Utah ma isi nofoaga uma o lo’o tautua ai foma’i a le LDS, ua toe fa’aaoga mai e galulue i o tatou falema’i i atumotu.

 

“Lea ua tatou va’aia ma ola I le suiga ua i ai nei le itu tau le tautuaina o le atunu’u e ala i gasegase o le ponaivi. O e uma ua faigata ona savavali ona o a’afiaga o latou tulivae po’o faiga fo’i o vae ma suilapalapa, ua mae’a faia o latou taotoga, ma ua fa’amanuiaina, ua mafai ona toe savavali lelei, o se fa’afetai sili lea ua fa’afofogaina mai i nei sui uma na faia taotoga,” o se tala lea a Faumuina.

 

Ua i ai misionare o le a tu’ua le atunuu, peita’i o loo galulue pea nisi se’ia mae’a le latou taimi atofa mo tiute fa’amisionare i le tatou malo. Ua i ai le foma’i fa’amisionare o lo’o galue i le Emmergency Room e va’aia le tele o gasegase e gasolo atu ona ua i ai ni fa’aletonu ua fa’alogoina e mana’omia ai se va’aiga a foma’i mo se togafitiga.

 

O le isi foma’i fa’amisionare o lo’o i ai nei fo’i o se foma’I fa’apitoa o Fa’ata e fa’atautaia ma le toe faitauina fo’i o fa’ata ua mae’a faia mo se fa’aiuga a foma’i fa’apitoa o gasegase o mataituina mo i latou sa faia fa’ata. O isi ia tautua ua matua tele fo’i le suiga ua matauina ai, talu mai ona galulue ai nei foma’i o misiona a le LDS.

 

O se tala a le ali’i foma’i ma latou faletua, ua fa’ailoa ai, “E le o faigofie ia i matou ona tu’ua le atunuu lenei, ua foliga mai lava o matou o nisi o tagatanuu moni o Amerika Samoa, aua o le aganuu o se isi lea mea sili ua matou mafai ona ola feso’ota’i ai ma ona tagata. E le lau maua nei ituaiga mafutaga i fafo i nofoaga sa galulue ma ola a’e ai.”

 

Ona o nei fomai ua latou aumaia fa’atasi ma i latou o so’otaga lelei i kamupani e mafai ona oka mai ai le tele o meafaigaluega e ao ina fa’aaogaina e foma’i mo taotoga ma le siakiga fo’i o tagata o gasegase mai le mamalu lautele o le atunuu. Le kamupani la a le Zimmer Bonnet, lea e tele ai faiga e mafai ai ona toe fa’aleleia tulaga o a’ao o tagata ua gausia pe ua a’afia fo’i ona o laveaga.