Ads by Google Ads by Google

TALA I VAIFANUA


Tradewinds Hotel American Samoa [ata: foa'i]

Pago Pago, AMERIKA SAMOA

 

MATUA TOE FA’AMAMAINA ATOA LE FALETALIMALO TRADEWINDS

 

Ina ua mae’a ai nei le nofova’ava’aia o le ulua’i aumalaga na toe fa’afo’ia mai ai le 159 o tagata na taofia i Hawaii ma isi setete uma o Amerika, ua amata fo’i ona faia le galuega toe fa’amamaina atoa o le nofoaga sa alaala ai i latou I le faletalimalo o le Tradewinds i Tafuna.

 

O le fa’amamaina atoa o lea faletalimalo ia tuuina atu lea o se Konekarate e fa’atino e le Kamupani a le Island Safety & Sanitation e tusa ai ma le fa’amatalaga ua fa’ailoa mai e le fa’atonu ole Soifua Maloloina Motusa Tuileama Nua.

 

Pe afai fo’i ae mae’a lelei galuega fa’amama a lenei Kamupani ua fa’akonekarate e le Soifua Maloloina, ole a toe siakia atoa e le Matagaluega o le Soifua Maloloina fa’atasi ai ma le pulega o le faletalimalo le latou galuega na faia pe o lelei atoatoa.

 

“A mae’a lena pasiga o le a amata loa lava ma isi tapenaga aua le to’ai taunuu mai o isi malaga e soso’o mai ia Mati 10, e pei ona fa’ailoa ma seti i ai fuafuaga a le Matagaluega o le Soifua Maloloina ma le Komiti Fa’afoe a le Covid-19,” o se toe fa’aopoopo lea Motusa.

 

E ese mai le to’a 159 o le pasese o le ulua’i malaga toe fa’afo’i mai o tatou tagata sa opea i Hawaii, na aofia faatasi ma le aufaigaluega sa faia tuiga ma tautuaina lea aumalaga i le taimi na to’ai taunuu mai ai i le latou au nofova’ava’aia. Sa nofoia uma e i latou lea faletalimalo mo le 14 aso, ma ua amata ai nei ona faia galuega fa’amama i lena nofoaga.

 

O le aufaigaluega a le Faletalimalo sa tapenaina mea’ai ma tausiga lelei o le aumalaga ma le vaega o le aufaigaluega atoa na tautuaina le aumalaga i le malae va’alele, e le o aofia i latou i le vasega o e o lo’o nofova’ava’aia, ona e le’i i ai so latou na pa’i pe latalata ane i le aumalaga.

 

ULUAI FITAFITA TAMAITAI AMERIKA SAMOA USAF- SIITIA CHIEF MASTER SGT

 

O le tamaitai mai Nuuuli, Jacinta Migo, ua avea nei ma ulua’i tamaitai Fitafita mai Amerika Samoa ua ausia le tulaga o le Chief Master Sergeant i le US Air Force ma ua ia fa’ailoa “E le’i faigofie le taumafaiga, ae fa’afetai i le Atua ma le tapua’iga a matua ma aiga, ua mafai ona fa’atino a’o maua le malosi ma le iloa i agava’a e mafai ai.”

 

O le ulua’i aso o Fepuari, 2021 i le 505th Test & Training Center na fa’atautaia ai le sauniga e fa’apine ai lea tofiga fou ua ausia e CMSgt Migo. 

 

O ia o le alo lona tolu lea o le fanau e to’a 11 o alo e faasino ia Fa’atamalii ma Maiava Leo Migo o Nuuuli.

 

I sana fa’amatalaga e tusa o le galuega sa ia fa’ailoa ai, “O le tele o taimi ua masani lava i le vave ma le mana’omia o le galuega ia faia ia sa’o lelei. Ona o le amataga o le olaga e ola usiusita’i a leai ua sasa, e leai se faigata o le usita’i gofie e fa’atino le galuega. Ona e soso’o le to’aono o i matou uma o teine o le fanau e 11 a nai o matou matua, o lea e tatau lava ona matua lava le fa’atonuga ma le puipuiga malu a matou matua mai le amataga o le olaga. Fa’afetai o lo’o fa’aauau pea ona fa’alogo i aoaiga ma galue malosi e fa’atino, lea fo’i ua selesele ai i ni fa’amanuiaga.”

 

Na fa’au’u mai Jasinta mai le Fa’asao High i le tausaga 1998, ma aga’i sa’o atu ai e amatalia lona olaga tautua i le USAir Force ina ua pasia e ia le suega a le ASVAB i togi maualuluga e ulufale ai i le vaega au. Na avea e Jacinta Migo lana vasega fa’aiuaso I lea tausaga, na togisilia.

 

Na talosaga o ia e galue mai i le Elemndorf Air Force Base i Anchorage, ona o lo’o to’atele fo’i nai ona aiga o lo’o alaala i lea fo’i setete.

 

I le saunig e aloa’ia ai le fa’ae’e atu o lona tofiga fou, o Colonel Francisco Gallei, o le 505th Test & Training Group Commander, sa ia saunoa fa’apitoa e fa’ailo agava’a ma le ausia ai e Migo o lenei tofiga. “O lenei tamaitai ua tele na’ua avanoa ua ia ausia ai ona o le fa’amoemoeina i ona tofiga uma sa fa’asolo galue mai ai. Lea ua ausia e ia lenei tulaga ta’ita’i, Chief Master Sergeant. I le taimi nei o lo’o ia va’aia vaega e lua tetele o le vaega au, le Pacific Command ma le North American Aerospace Defense Command. O ia lenei o lo’o avea ma latou Command & Control Gallei. Peita’i, e tusa ai ma le olaga galue o lenei tamaitai, e masani ona ia fa’ailoa mai ia i matou, “O le mea sili ua mafai ona ou mauaina mai lenei galuega, o i latou nei e to’atolu, o lana fanau.” Outou na, ia outou iloa o lo’o ia te outou le loto atoa o lo outou tina,” o se toe tala lea a Colonel Gallei.

 

A'o ia fa’atalofa atu ia CMSgt Migo, sa toe fa’ailoa ia Gallei, “O lenei tamaitai na maua foi lona fa’ailoga i le tausaga ua te’a.”

 

Sa ia saunoa, e pei ona fa’asalalauina e le US Air Force, “O lo’u manuia ma le tele o nei faamanuiaga ua ou maua e maua mai le Atua i luga, i ana fa’amanuiaga ua aumaia ona o le ola taumafai ia manuia le fanau, matua ma aiga. O i latou fo’I na e tapua’ia nei faiva i aso uma lava, fa’afetai tele i nai ou matua ma aiga mo le tapua’iga, ae o le aoa’iga fo’i sa faia mai le amataga o le olaga, lea u le toe te’a ese ai. O le isi itu o le fa’afetai, o i latou uma o matou galulue fa’atasi ae maise le ta’ita’iga, o le tatou fa’ailoga fa’atasi lenei, mahalo, malo lava le galulue.”

 

Ona o le Covid-19 ma ona fa’asa ua a’afia ai femalaga’iga, ua le mafai ai ona auai atu matua ma nisi o aiga ina ia avatu le fa’amalo ma le valevale alofa o aiga ma pelega mo le tamaitai Chief Master Sgt. Ona ua agatonu ma le taimi atofaina mo lenei fa’aeaga, ua toe suia mai nei e Jacinta lona fa’aiu i le suafa o lona tua’a ma ua fa’afetaia e ia lea fo’i suiga lelei ua ia faia i lona olaga.

 

Sa saunoa fo’I Miga e tusa ai o le fa’amoemoe ua ausia, “E iloa le Samoa i lona tu, tautala, ma lona savali. Ia e fiafia fo’i ua e gafatia ona faia se mea e iloga ai lou aiga, lou nuu ma lou ekalesia, pe afai ua e mafaia ona fa’atino galuega lelei i lou ola tautua ai i ou faiva.”

 

O tiute o CMSgt Migo e aofia ai lona va’aia toto’a o le nofoaga o le 505th Tese & Training Group, o ia e faufautua ma fa’atonutonu i latou uma o tiute ina ia mafai ona fa’atautaia le auaunaga, o ia lea e tali atu i soo se mea e alia’I mai nei nofoaga uma o le USAir Force, e tusa o le soifua maloloina, le olaga galue ma le fiafia o e faigaluega uma, fa’atulaga koleniga mo le vsega o fitafita i lea nofoaga atoa, fa’atasi ai ma le fa’afaigaluegaina o le 500 o fitafita tiute i vaega taitasi e fa, i nofoaga e 6 ua i lalo o lana vaava’aiga malu.

 

FA’AMAONIA LE AVEA O GWEN TAUILIILI-LANGKILDE FAAMASINO 

 

O le tamaitai Loia o Gwen Tauiliili Langkilde ua fa’amaonia mai nei e le Fono Faitulafono ina ia avea ma Fa’amasino i le Fa’amasinoga Fa’aitumalo.

 

Na faia le iloiloga a le Senate mole tofiga o Tauiliili-Langkilde ma iloga ane ai, o se tasi e fa’amoemoeina e se’ei i lea fo’I nofoa taualoa o le Vaega o Fa’amasinoga.

 

Fa’ailoa e nisi o Senatoa, “Ia e faia le galuega ma le fa’amaoni tele lava, aua o lou atunuu lea o le a fesagai ma oe, peita’i e te faia le fa’aiuga o nisi o mea e sili ona taua mo i latou ma aiga.”

 

O Tauiliili-Langkilde sa avea ma loia fautua a le Ofisa o Palota, sa matua lelei lava fo’I ona fa’atauaia e ia ana fa’aiuga ma ua iloga i le fa’ataunuuina o le palotaga o lenei tausaga.

 

O nisi nei o molimau mai afioga o Senatoa taitasi o le Maota Maualuga o le Fono Faitulafono i le iloiloga o le tofiga Fa’amasino ua tuuina atu nei i le tamaitai loia.

 

Saunoa afioga ia Senatoa Faiivae ma Senatoa Magalei Logovii, o i la’ua sa tautua i le Komiti Fa’afoe a le ASTCA, ma ua molimauina fo’I e i la’ua le aoga ma tele o le sao o Tauilili Langkilde i iloiloga ma le taliga fo’i o fa’afesili a lea Komiti Fa’afoe ma ua iloga ai lona agavaa e faia lelei lana suesuega ma sailiga o ana fa’amaumaua o lona lea tofi. E tapena o ia mo ona tiute uma.”