Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

O le togisilia i lenei tausaga i le vasega fa’aiuaso a le Nuuuli VocTech High o tamaitai nei e to’alua. O le tamaitai mai le afio’aga o Nuuuli. O ia fo’i o le tamaitai o le autalavou mai le Ekalesia Aso Fitu o le Toe Afio Mai, ma o lana mau lava e sili ona fiafia i ai i lona soifua taumafai, o el Filipi 4:13 “Ou te mafaia mea uma lava i le fa’amalosi mai o Keriso ia te a’u.”

Peita’i o lana agaga e fiafia tele e fai i so’o se mea, i soo sana taumafaiga “Fai ma le Faku!”

 

I lona tausaga aoga i le tausaga 2019 i le Nuuuli VocTech na malaga ai e avea o ia ma sui o Amerika Samoa i Orlando Florida i le vaega a le HOSA na tauva ai, o le galuega sa ia fa’atino o le Health Career Display. I le tausaga nei 2021 o i la’ua ma lana paga o Leilani, ua avea e i la’ua le togisilia faatasi o lenei tausaga i le vasega fa’au’u, ae ua manumalo fo’i i la’ua i le vaega o tauvaga a le HOSA , i le Healtth Career Display fo’i.

 

O ia sa fa’au’u mai le Manulele Tausala Elementary ma o ia o le sui ua tauaaoina i ai le fa’ailoga fa’apitoa a le Rotary i lenei tausaga. O ia o le ulumatua o le latou aiga e to’aono isi ona uso ma tuagane e laiti ane ia te ia. O ia fo’i o le totino o le NVTH Honor Society, o le totino o le HOSA ma le TSA Club.

 

O ia o le Peresetene o le Asosi a Tamaiti A’oga i le Nuuuli Voctech High. O ia fo’i o se tasi o le a fa’au’u ma le fa’ailoga Tipiloma ua agavaa ai i le NOCTI i matata tau fausaga o fale ma Kapeneta. 

 

O lona fa’anaunauga o i ai e fia avea o iama se tasi e galue tumau i le Vaega Au a le Maligi Koa ma taumafai ai e na te maimoaina le tele o mata’aga i le lalolagi.

 

Ua talia mai o ia e avea ma tamaitai aoga i le St Martin University i Washington. O lana fa’afetai taua lava ua ia si’itia i le Atua o mea uma, ae maise o le fa’afetai i ona matua ma aiga, faia’oga ma i latou uma sa tofu sao i le aoaoina o ia mai le la’ititi se’ia oo mai i lenei taimi ua avea ma tagata matua.

 

O ia o se alo e fa’asino ia Bryan Itulauifi ma Fa’auiga Itulauifi o Nuuuli. O lenei tamaitai lalelei o Brianna Jemaima Itulauifi.

 

O le isi sa la’ua to’alua i le tulaga Togisilia o le vasega fa’aiuaso a le Nuuuli Voctech High o se tamaitai mai le afio’aga o Faleniu, Nuuuli, Mulifanua ma Fasitootai. O ia lea o le tamaitai sa aoaoina ma fa’au’u mai i a’oga tulaga muamua i Pavaiai. 

 

O ia o le afafine lona lua o ona matua ma o le sa avea ma Sui Peresetene o le Latou vasega fa’aiuaso o lenei tausaga.

 

O ia lenei ua ia mauaina le fa’ailoga o le  Ms. Trade 2021, o le Peresetene fo’i o le 4-H Club, Totino o le TSA Reporter, Totino fo’i o le HOSA, ma le sui totino fo’i o le Nuuuli Voctech High National Honor Society, ma o se tamaitai ta’alo tele lenei tamaitai i lona olaga i le Nuuuli VocTech High.

 

O le tamaitai lenei sa ta’alo i le Au Softball, o ia fo’i sa avea ma Totino o le Au Soccer, O le totino fo’i o le au Basketball.

 

O ia o lo ua ausia fo’i le agava’a e fa’au’u ai ma le tusi pasi NOCTI i le Culinary Arts poo Kuka eseese, Cabinet Making ma le Fundamentals of Construction. O lona uiga o ana mataupu nei na tau’ave i matata eseese mo le 4 tausaga.

 

Ua ausia e ia le agava’a e na te umia ai le fa’ailoga o le Tamaitai Ta’alo o lona tausaga fa’au’u lenei.

 

O ia fo’i o le tamaitai ua umia le faailoga O le Female Tradesman Award, ma o se sui totino o le CCCAS i Faleniu.

 

O ona matua fa’aleagaga o Reverend Nepo Pu’a ma Faletua Loto Pu’a o Faleniu. O ia o le afafine o Faiga Samuelu ma Aemauga Muliipu. O le tamaitai o Veronica Fa’auiga Muliipu o le ua to’alua i le togisilia o lenei tausaga fa’au’u a le Nuuuli Voctech High.

 

O le tulaga lua o le vasega fa’auu, o lo ua tula’i mai ai le susuga Rodney Faitauafe Atanoa.

 

Sa soifua a’e o ia i Olympia, Washington ia Iuni 02, 2003. Na ulufale mai i Amerika Samoa ae ua atoa lona ono masina le matua, ma ua alaala tumau nei i Malaeloa ma Nua ma Seetaga, Amerika Samoa.

 

O ia o le peresetene o le Nationa Technical Honor Society. O ia fo’i o le totino o le HOSA, Close UP ma le TSA Clubs.

 

Ua talia mai lana talosaga e ulufale ai i le Missouri Southern State University ma New Mexico Military Institute.  Sa amata mai ana aoaoga i vasega laiti i le a’oga a Kanana Fou, peita’i na siitia mai o ia i le a’oga maualuga a le Nuuuli Voctech High ona o lona tama sa aoga ma fa’au’u mai le tatou aoga nei i le tausaga e 1998 ma sa avea o se totino o le National Technical National Honor Society.

 

O le uso foi o lona tina sa aoga i le Nuuuli Voctech ma fa’au’u mai le vasega 2000, sa avea ma Togisilia o lena tausaga.

 

O le aloali’i lenei ua mae’a fa’aee ia te ia le suafa matai “Tuvaogaaletautootoo” mai lona aiga Sa Setaliaauiafe, ma o ia o se Matai sili ona laititi lea i le saofaiga o matai a le afio’aga o Malaeloa ma o se sui foi o le latou Aumaga.

 

O ia o se sui totino o le Ekalesia Fa’apotopotoga Kerisiano i Amerika Samoa i Malaeloa, ae o ia fo’i o le ulumatua o le fanau a ona matua o Faitauafe Ioane Atanoa ma Theresa Maae Sootaga. Ua le mafai ona oo mai si ona tama i le aso lenei, ona o lo’o opea i fafo ona o le Covid-19.

 

O ona matua fa’aleagaga o Rev. Faigata Manase ma Rosapaepae Manase.

 

O lana lenei taumafaiga ua ofo alofa atu ai i ona matua matutua, o lona aiga atoa ma lana autalavou fa’apea ona matua fa’aleagaga ma le mamalu o lona afio’aga. “Fa’afetai tele mo la outou titi faitama ma lo outou alofa tula’i ae maise o a outou tatalo mo a’u.”

 

O ona matua matutua o Tuiloma Ioane Atanoa ma Laborday Atanoa, fa’afetai lo oulua alofa ma le onosa’i. Ua molimauina e ona matua matutua, lenei ali’i e le tautala solo pe ga’e’e gofie i se mea, ae mafaufau toto’a ma to’aga e fa’atino ma taumafai e saili mea e mana’o i ai i lona olaga. Fa’amalo le taumafai.

 

Na tula’i fo’i le afioga Senatoa Faiivae Iuli Godinet, o le taitaifono o le Komiti o Sikolasipi a le Malo o Amerika Samoa mo le fa’alauiloaga o le sui ua mauaina le fa’ailoga sikolasipi e a’oga ai i le tatou Kolisi Tuufa’atasi i lenei tausaga, na maua lea e De Angelo Mauga.