Ads by Google Ads by Google

TALA I VAIFANUA


O le pulega a le StarKist Samoa ua mana’omia lava ona I ai se isi tala fou mai le se latou fa’aiuga i suiga mo le aufaigaluega. [ata: Leua Aiono Frost]

Pago Pago, AMERIKA SAMOA

 

FA’AAUAU TASI O LE SIFI STARKIST IA IUNI - SOSO’O & VAEA TAGATA FAIGALUEGA

 

E le’i toe i ai se isi fa’amatalaga ma’oti mai le pulega a le Star Kist Samoa e tusa ai o se faaletonu o lo’o feagai ma i latou ua mafua ai pea ona fa’aauau le tasi o le sifi a le latou Kamupani I’a se’ia mae’a lava le masina o Iuni 2021.

 

Na fa’ailoa muamua mai ua na’o le lua vaiaso e fa’atautaia ai le tasi o le sifi mo e faigaluega safu i’a, peita’i ua alu lava le tolu vaiaso o lo’o fa’aauau pea lava le tasi o le sifi ma ua fa’apena ona fetu’una’i ai tagata faigaluega. Ua fai sifi i laulau, ma ua fai si laiti o totogi ua maua e tagata faigaluega i vaiaso ta’itasi.

 

O le fa’afitauli sa fa’ailoa muamua mai lava e le Kamupani e tusa o fa’afesili, ona o le tu’ua e tagata faigaluega o galuega ae ua le to’a’aga atu e faigaluega. 

 

Ua taumafai fo’i ona fa’auia atu fa’afesili i le sui o fesootaiga a le StarKist poo i ai se isi fuafuaga fou a le Kamupani I’a e tusa o le fa’aauau pea o le tasi le sifi, ma poo le a fo’i nisi fuafuaga fou a le Kamupani e tusa o le fa’asoasoaina o avanoa mo le aufaigaluega ae maise lava i le Packing Room.

 

Ua fa’ailoa mai o lo ua amata ona auina atu i fafo fasi i’a ua mae’a fa’amamaina o se isi lea fa’aopoopoga o le tautua ina ia maua ai isi vaega tupe a le Kamupani I’a, ae o le taimi lava fo’i e tasi, ua le toe onosa’ia e le Pulega ni fa’aletonu lava e tutupu atu i amioga poo sasi fo’i a le aufaigaluega. Ua fai lava ma fa’ate’a loa le tagata faigaluega pe a tele o latou lape i le galuega ua fa’amauina.

 

O lo ua faia lava fo’i le galuega a le Kamupani e tusa o tulafono ma aiaiga o galuega ua mae’a fa’atulaga, peita’i ua tele aso tia’i galuega a i latou ma ua ausia ai lape ua fa’amauina e te’a ai ma le galuega.

 

Ua fa’ailoa mai e se tasi o supavaisa, “O matou ua vala’auina isi tagata e o mai e faigaluega, ina ne’i tulia mai galuega ua tele latou points, o le ala lea ua sefe ai isi, ae o na sui ua fa’ailoa mai, se ua fia malolo teisi mai le galuega.”

 

Ona o lea la ua toe tasi nei le sifi o le au safu i’a, o lo ua fa’asolo fo’i le fa’ateaga o tagata faigaluegaua atoa le vaiaso ua le faigaluega mai pea.

 

Ua mautinoa o le a a’afia le tupe maua a Amerika Samoa i le fa’aitiitia pea lava o tagata e faigaluega tumau i le tatou Kamupani I’a, ma o le a a’afia fo’i tupe maua a le tele o isi kamupani o lo’o galulue feso’ota’i ma le Kamupani I’a latou tautua.

 

Pe afai e fa’aauau ai pea ona lusi atu lea avanoa mo galuega a tagata e to’atele, o le a tulaga fa’aletonu atili le tamaoaiga maua o tagata e to’atele ma iu lava ina fa’aletonu ai ma le tamaoaiga o le malo, ona o lo ua lutia lava fo’i le tamaoaiga ona o le taofiga o femalaga’iga talu ai le fa’ama’i o le Covid-19.

 

Ua le o tu’ua fo’i la le vaega a tagata faigaluega, ua latou fa’ailoa mai e ala i a latou fa’amatalaga i luga o feso’ota’iga tau le facebook, le faigata o mea o faigaluega ai i latou. Ma ua tatau ai ona malamalama foi tagata lautele i o latou lagona faalagona.

 

I le taimi lenei ua tasi le sifi ua fa’alausoso’o lava le alu o le galuega, ina ia maua le aotelega o mo’omia e lava ai uta mo le auina atu i fafo a le kamupani mo latou oka o lo’o mana’omia ona fa’amae’a. O le isi faasea ua fa’ailoa ai, e le fa’atagaina ona fa’aaoga totigilima pe’a oo ina ulufia o latou lima i le i’a.

 

O sui supavaisa lea e matele i ai fa’asea a le aufaigaluega, ma ua faailoa mai, o le isi sala tele e matua fa’ate’a ai i latou, pe a maua o ave nana apa i’a i totonu o latou ato. Ae ua matauina e nisi o le aufaigaluega, e malaga lava nisi o supavaisa ma pusa apa atoatoa ae leai se sala.

 

ASCADSV I TAFUNA - OFOINA MAI KOSI O LE SU’ISU’I MA LE TA FA’ATAGATA

 

O ai o mana’o e fia maua se tomai fa’apitoa i le Suisui ma le Ta Fa’atagata? Ua fa’ailoa mai le polokalama fou ua fa’atulaga nei e le American Samoa Coalition Against Domestic and Sexual Violence (ASCADSV), e fa’atautaia mai le latou Ofisa autu i le Paka Liona ma ua talo fa’aaloalo uma atu ai i so’o se tasi ua fia maua ni agavaa i ia fo’i ituaiga taleni.

 

O le ASCADSV o le fa’alapotopotoga tu maoti e le o fa’atupea mai e se vaega o le Malo, ae mafai ona talosaga i nisi o vaega tupe mo tautua lautele o so’o se tasi o le atunuu. 

 

Ua fa’ailoa mai e le tamaitai e fa’auluulu i ai le ASCADSV Mata’utia Liliu Tapua’i-Mailo, Ua amatalia vasega i le aso Gafua ua fa’ato’a te’a atu nei, Iuni 14, 2021, peita’i e fa’aauau vasega nei mo le ono vaiaso soso’o, ae ua fa’atulaga e faia lea i aso Gafua se’ia oo i aso Tofi o nei vaiaso e ono. E amata mai le itula 8:00am se’ia oo i le itula e 4:00 i le afiafi. Ole a faato’a mae’a nei vasega ia Iulai 23, 2021.

 

O le Fa’alapotopotoga lenei sa amatalia mai le tausaga 2004, ma ua atoa nei le 17 tausaga o faatautaia pea lava, peita’i o le mafuaga ona fa’atuina o lea fa’alapotopotoga e le faia mo se polofiti, ae ia fesoasoani atu lea i tina ma nisi lava e a’afia i sauaga fa’aleituaiga.

 

O le ala fo’i lea o le fa’atautaia o nei kosi e aoga tomai nei e sailia ai tamaoaiga tausi o aiga, e le tau o ai i latou e sailia ni galuega, ae amata mai ona suisui ma fa’atau atu lavalava e maua ai le tupe e tausia ai le aiga.

 

O le ta fa’atagata fo’i le isi tomai aoga tele, ua matua iloga ona aoga mo i latou o loo fa’atautaia lea ituaiga o galuega alofilima.

 

O nisi e maua nei tomai ua latou fa’ailoa mai le aoga tele ia i latou, mo le sailiga o se tupe maua mo latou lava fa’apea ma le tausiga o latou aiga.

 

Mai le tima’iga o tagata ina ia mafai ona fa’aleleia o latou silafia i le aoaoina i nei taleni, o le su’isu’i ma le ta faatagata, o le a mafai ona fa’aleleia ai lo latou silafia e maua ai ni galuega, pe mafai lava ona faia e i latou nei tautua lautele ma aoga mo le tausiga o latou aiga le tupe e maua mai ai.” O se tala lea a le afioga Mata’utia Liliu.

 

O nisi o lo’o tautuaina lava e le ASCADSV, ua iloga le mana’omia lava ona fa’atauaina o a latou taumafaiga i so’o se mea. O le isi lea latou fesoasoani o le latou fa’atalanoa lava lea o avanoa e faigaluega ai i latou, ma faufautua i sui uma ua a’afia fa’apea, ina ia le vave siilima i avanoa lelei e mafai ona latou tautua ai, ae ia tumau le fa’atuatua e latou te gafatia ona toe fuata’i se olaga fou.

 

Ona e vaivai le tamaoaiga maua e nisi, o le ala lea o le sailia fo’i o nei taleni fou e fa’aofi atu mo i latou ina ia gafatia ona nofo i le aiga ma sailia mai ai se isi vaega o le tamaoaiga tausi mo latou aiga.

 

Ua atoa nei le tolu tausaga o lo’o fa’atautaia lava latou aoga suisui ma ua fa’ateleina lava le tomai ua maua e i latou ua mae’a a’oa’oina mai e le latou Fa’alapotopotoga.

 

Ua va’aia fo’i le alumia o latou suisuiga ua mae’a faia, ma i le taimi nei, ua amatalia le vasega suisui fou lea a le ASCADSV ma le 27 o sui ua mae’a lesitalaina ai.

 

O lo ua maua pea nai avanoa o totoe mo lea vasega e ao ina fa’atumu mo le vasega i le aso Lulu nei ona tapunia ai lea o le vasega suisui mo le ono vaiaso. Peita’i o le vasega ta fa’atagata, ua tatala mai avanoa mo nisi o le tupulaga o lo ua avanoa mai a’oga ona o lea ua tu’ua a’oga. Afai ua leai se isi avanoa e maua, e mafai ona lesitala mai mo se avanoa i le ta fa’atagata. Fetaui lelei lava fo’i ma le uma ia Iulai 23, ae avanoa ai se isi taimi mo fanau ma aiga e fa’atino ai nisi fuafuaga a’o le’i toe amatalia le a’oga.

 

O le faia’oga mo lea aoga ta fa’atagata o Fetu Leota ma ua tele ana galuega matagofie e mafai ona maimoaina, pe afai e fia fa’aosofia ai lou naunau i lea faiva alofilima. O le vasega lava fo’i lea mo le au ta fa’atagata, o le a faia lava i le Ofisa autu o le ASCADSV i le Paka Liona.

 

O le tatalaga o nei vasega e lua, sa fa’atautaia lea i le aso ananafi ma sa fa’ataunuuina lea i le DYWA Center i Tafuna, ma e mafai lava ona fa’amauina sou avanoa i nei kosi mai lou vala’auina lea o le numera 252-4805, 699-0171.