Pago Pago, AMERIKA SAMOA

SOUSOU LE VASA AVEA MA FA’AFITAULI E FAIGATA AI GALUEGA MO AUNUU

I le taimi nei ma le talosaga ua fa’auia mai aiga ma le ekalesia i Aunuu, ona o le a’afiaga o latou apitagalu i le maualuluga ma le malosi o le sofa’i atu o galu ma aupeau o le sami, ua fa’ailoa mai e le sui mamalu o le matagaluega o le Saogalemu Fa’alotoifale o le tatou atunuu, “Ona o le sousou lava o le vasa le e mafua ai ona faigata ona oo atu se malaga e asia nei mea uma mo se lipoti ina ia taga’i toto’a i ai ta’ita’i o le malo ma faia loa se fuafuaga fa’ata’alise mo le motu i Aunuu.”

“Lea ua tau maua mai se masele i le tatou lipoti o le tau e afua mai le afiafi o le aso Lulu ma ua fa’atulaga fo’i le asiasiga lea i le aso ananafi,” o le saunoaga lea a le sui o le Homeland Security ae ua le fia fa’amauina lona suafa mo lenei ripoti.

Ina ua toe fa’afesiligia le susuga Peter Taliva’a, ae ua saunoa mai o ia, “E moni o lea ua mae’a talanoa atu i le sui mamalu o le Matagaluega o le Saogalemu Fa’alotoifale ma ua fa’ailoa mai ia te a’u o le aso ananafi o le a asiasi atu ai ma fa’amau mai uma me aua fa’aleagaina ma le tulaga o i ai le apitagalu. O le masele lava e mafai ai ona lipea le apitagalu lea ua aia, e taumafai loa e faia a’o saogalemu lava tagata ma meatotino i aiga ma le ekalesia foi.”

E le gata i lea asiasiga, ae ua feso’ota’i fo’i le fa’atonu o le Homeland Security Samana Veavea ma le vasega o le aufaigaluega a le ASPA lea e galulue i le tele o galuega fa’atino a le ASPA I Aunuu, ma ua latou maua mai ai nisi fa’amaumauga aoga ma le lelei fo’i e tima’ia ai le latou galuega fa’aleleia o le apitagalu i Aunuu. O le isi vaega ua mua’I faia le latou fonotaga ma le Homeland Security o le Public Works aua o le ki atoa fo’i lea o galuega toe fa’aleleia mo le motu lea, o lo’o fa’amauina i lipoti a le matagaluega o galuega lautele a le Malo.

Fa’ailoa mai e Samana Veavea, faatonu o le Homeland Security, “E tauau e faatula’ia ese mai tagata i o latou fale o lo ua lamatia i lenei pagatia fa’anatura, ma ua tauau e fa’aaogaina falea’oga e nofoia e i latou nei ae se’i fa’aleleia le apitagalu.”

“Peita’i o nei fa’aiuga uma e le o mautinoa le fa’atautaiga, se’ia mae’a va’ai patino i latou ma faatautaia se lipoti maumaututu o le a’afiaga o le soifua pe a oo atu i le motu o Aunuu le latou aumalaga muamua.”

O le fa’amalo mo Taliva’a ona ole mataala, ua mafai ai ona ia talosagaina le fesaosoani tele a le malo i le va’ai mamao atu I a’afiaga e ono o’o i ai aiga ma le ekalesia ona o meatotino o le a afaina ma le soifua ina nei maumau.

CMC TAUOA, JOSEPHINE, TAMAU LONA FA’AILOGA MASTER CHIEF PETTY OFFICER  OLE FUAVA’A

O le tamaitai Toa Samoa, le Command Master Chief o le va’a tau USS Chung Hoon ua filifilia nei e avea ma sui e mauaina le fa’ailoga fa’apitoa o le “Master Chief Petty Officer of the Navy Delbert D. Black Leadership Award.”

O Tauoa na fili fa’apitoa mai le to’alima o sui na iloga o latou agava’a, o ta’ita’i ua mae’a umia fa’ailoga o le Command Master Chief a le US Navy atoa, ae o lo ua pale mai ai le alo o Amerika Samoa mai le afioaga o Fagaitua.

O le va’a tele lea e tafanaina misele le USS Chung Hoon DDG-93, olo’o fa’atulaga e taula lava i Hawaii, ma na mua’i avea le tamaitai Samoa ma Command Chief Master o lea va’a ia Aperila 2020, ae o lea ia pale i le fa’ailoga sailigata i le na’o le tasi le tausaga talu ona tula’i mai, ae o ia fo’I le ulua’I tamaitai Samoa lea ua ia maua lea ituaiga tulaga i le USNavy, poo le Fuava’a Tau a le malo tele.

E tusa ai ma le fa’amatalaga a lona ta’itai i le galuega, ua ia fa’ailoa ai, “O Tauoa o se tasi ua iloga e matua agavaa lava I le taitaia le auva’a ma o soo sana fa’atonuga e iloga ai lona agava’a ma lona iloa o ona faiva fa’ata’ita’i o e uma e faigaluega ma ia i lana sifi. E fa’afiafia tagata e galue, e mautinoa e ia o lo’o mataala ma mata’alia lana aufaigaluega i taimi uma e fa’atino ai tiute. Ua iloga fo’I o lana vaega e matua lelei atoatoa le fa’atinoga o latou tiute ma fa’amaumauga e tatau ona faia. Ua ausia e lana aufaigaluega le 18 masina e fa’atino ai tiute e aunoa ma se lape, Pacific Dragon 2020 ma le Pacific Rim 2020 [RIMPAC 2020].”

O nei mea uma ua ausia e lana aufaigaluega, e le faigofie peita’i ua ausia e i latou ausia agava’a e mo’omia mo lea vaega o tomai moomia mo le fa’atinoga o galuega i  va’a tau, ae maise lava i vaitau nei o le Covid-19.

O le fa’ailoga lenei o lo’o avea ma fa’amanatuga o se tasi o ali’I folau o le Fuava’a Master Chief Gunners Mate Delbert Black.Sa tautua o ia i lea tofiga mai ia Ianuari 13, 1967 se’ia oo i le taimi na litaea ai o ia i lona aso fanau ia Aperila 01, 1971. O lana amio o le fiafia e faigaluega fesoasoani atu i tiute o tuu I nisi ma lona tausoa atu o tiute ua tuuina i nisi o uso a fitafita na matua iloga ona va’ava’ai toto’a i ai le vasega o command master chiefs o lona vaitau ma latou filifilia ai o ia e fa’asuafaina ai lea fa’ailoga taua.

“O le tausaga lenei ua sili ona faigata i le to’atele, peita’I i le matau atu I le galulue ma le fa’atinoga o faiva o le vaega lenei, ua iloga ai, e leai se mea faigata e le’i gafatia e i latou ona fa’ataututu ma manumalo mai ai.” O se tala lea a le ali’i CMCPetter Officer Russell Smith. “O lana fa’amalosi i lana vaega ma onosa’i e fa’atino le galuega i le malosi ma le tomai e gata ai, ua avea ma mea lelei na’ua e fa’ata’ita’i uma atu i ai lana aufaigaluega. Fa’amalo atu ia te oe Master Chief Tauoa.”

Ua fa’ailoa mai fo’i se manatu o le ali’I pule i va’atau tetele nei o le Fuava’a Tau a le US Navy i le Pasefika, FMC James Honea, “O Tauoa o le fatu lea o le USS Chung-Hoon, ua matua mautu ia te ia le fa’amoemoe ma le talitonuga o lana aufaigaluega, e mafai ona avea o ia ma soo upu mol ana aufaigaluega i soo se mea i soo se taimi. E matua aoga i lana aufaigaluega lona agaga loto maulalo ma lona taumafai e fa’atino so’o se mea lava e mafai ai ona mautinoa e fa’afiafiaina lana aufaigaluega i taimi uma. E mautinoa lava le faigaluega fiafia ma le saogalemu lana aufaigaluega i so’o sana sifi lava.”

TAUNUU SUI O LE DOD - SUESUEGA O FA’AMAUMAUGA O MEA UA MAUA I AUA

Ua to’ai i fanua le aumalaga o sui mai le Matagaluega o le Puipuiga Lautele o le Iunaite Setete o Amerika [DOD] ina ia latou fa’aauau sailiiliga ma suesuega e tatau ona fa’atino i mea ua maua ane i eleele o Aua sa sua mo le fausia o le ala mai Aua i Afonotele.

O se mea e alagatatau ona faia ma ua fa’afeso’ota’ia lea fo’i sailiga e le Matagaluega o le Saogalemu Fa’alotoifale o le tatou atunuu, lea e ta’ita’ia e le susuga Samana Veavea.

Ua fa’ailoa e Samana na to’ai taunuu mai le aumalaga lea i le aso Gafua lea na malaga mai i le va’alele a le USCoast Guard C-130 lea e masani ona fa’aaogaina e faia ai sailiiliga a le Coast Guard i le tatou sone fagota.

E to’atolu sui o lo ua malaga mai i le va’alele lea mai Hawaii, ma o lo’o nofoia nei e i latou le faletalimalo ma fa’atautaia ai latou tui suesue ina ne’i malaga mai i latou ma le fa’ama’i Covid-19. O le masani lea ua i ai, e fitu aso, pe tuu lava fo’i i le faitalia o le vaega a le DOH poo le a le taimi tonu e mafai ai ona tatala i latou nei i tua e fa’ataunuu le latou galuega i le atuunuu.

Pe a mae’a ona faia suesuega o le afuaga o le tanumia ai o nei mea i eleele o le afioaga o Aua ona latou toe taumafai lea e fa’ataoto se ala lelei e mafai ai ona ti’aia fa’aletulafono nei mea uma,ma fa’apa ai. O le a latou saunia fo’i se lipoti atoatoa mo le silafia e le vaega ale DOD ma le malo o Amerika Samoa fa’apea le afio’aga, e tusa o nei mea ua suesueina mae’ae’a

I le taimi nei, ua latou aumaia uma lava mea faigaluega e mo’omia e i latou mo le suesuega lenei. Ua fa’ailoa mai o loo i ai aiga o loo tulata i le nofoaga e ono a’afia ai i nei mea e ao ina tia’ia ma fa’apa, ma o lo ua fa’ailoa mai, e le mafai ona fa’apaina lea mea i le nofoaga o maua ai nei. O le a fuafua lelei e le aumalaga ua oo mai le nofoaga tonu e fa’apa ma tia’ia ai lea meatau.