Pago Pago - AMERIKA SAMOA

1.7% SIITAGA O TAU O MEA’AI MASANI MO AIGA I FALEOLOA:

Ia i latou e le o agava’a i ni Food Stamps ma isi uma tufatufaga o lea ituaiga o mea taumafa i le atunuu, ua mautinoa ua faigata ona feso’ota’i le mana’omia ma le tau o oloa e masani ona fa’atau mo le aiga i le amataga o lenei masina.

Mai le tu’uaga o a’oga ua lagona atili ai le faigata lea ona sa fa’aopoopo le fanau i totonu o le li’o o aiga i aso ta’itasimo le 8 itula sa masani ona o ai i le a’oga.

Mai le fa’ai’uga o suesuega masani a le BFI a le matagaluega o Fefa’ataua’iga ua fa’amauina mai ai Iulai ua siitia ai le tau o oloa e masani ona fa’atau ma fa’aaoga i aso fai soo i tapenaga o mea taumafa a aiga ta’itasi o le atunuu i le 1.7%.

E 13 o nei mea  e 20 sa lisia mai e le BFI ua mae’a siitia ia Iulai ma ua fa’amauina ai lea siitaga i tau ua fa’atauina atu ai i le mamalu lautele mai faleoloa i le atunuu.

O le masina o Iulai i le tausaga ua te’a, ua faamauina mai ai le siitaga mai le 20.8% lea e mafai ona fa’ailoa mai e 1.8% i masina ta’itasi.

O mea’ai la nei ua lisia ma pasene ua siitia i ai: Vae Moa 6.6%, Apainu 5.3%, Aisikulimi 4.2%, Sosisi 3.1%, Saimini 3.0%, Fuamoa 2.6%, Ribs Pua’a 1.8%, Suka 1.2%, Pata 0.3%, I’a Fou 0.2%.

O nisi o mea’ai ua fa’amauina ua pa’u teisi lo latou tau ua aofia ai taro, fa’i mata, siusiupipi ma le I’a

O mea’ai e tolu e le’i suia o latou tau i lea vaitau ua aofia ai le fagu vai, apa i’a tuna ma le falaoa vela.

FEFAATAUA’I O A’ANO MANU FASI MA I’A -TALANOAINA E FA’AMAUTU ATILI

Ua fa’ailoa o lo’o ua naunau uma lava Amerika Samoa ma Samoa i sui usufono sa feiloa’i muamua ia Iulai 2022 mo feutaga’iga a le Atoa Samoa, ina ia vave soalaupule mataupu aoga sa mua’i fa’atulaga mo talanoaga ma faia i ai se fa’ai’uga vave ae fa’aaoga loa lea avanoa mo fefa’ataua’iga o aano o manufasi, I’a ma fua o fa’aeleeleaga e la’u mai i Samoa e fa’aaoga e le mamalu lautele iinei.

Sa auai atu le susuga le Fa’atonu o Fa’ato’aga i le ‘au malaga sa masii atu i Samoa, le susuga lea a Solialealofiotagaloa Iosua Mutini, ma feiloa’i ma le afioga La’auli Leuatea le Minisita o Fa’ato’aga ma Faigafaiva o le Malo o Samoa.

Ua fa’ailoa i se lipoti mai Apia se fa’amatalaga a le susuga le Minisita, “Ona o lo’o mafai ona gaosia se fisimili mo mea’ai a lafumanu i Amerika Samoa, ma o le a aoga tele lea mo Samoa aua e moomia ona fagaina lafumanu i lea ituaiga o mea ‘ai aoga mo le a’ano o manufasi aua le fofoga taumafa o le atunuu.’

“O lona uiga o le a avea Samoa ma se maketi e sapalai mai i ai e Amerika Samoa le Fisimili mo le fagaina o latou Lafumanu. Peita’i o lo ua i ai fo’i ma talanoaga e fa’ato’a fa’amautu a’ia’i i le fonotaga ia Oketopa 2022 i le isi fonotaga a Atoa Samoa, e toe tatala ai le Maketi mo sapalai mai o “A’ano Manu Fasi ma I’a” i totonu o Amerika Samoamai Samoa. I le taimi nei o lo’o tapunia lea avanoa lelei.” o La’auli lea.

I le taimi nei o le faia lava o fa’ai’uga a le fono a Atoa Samoa, e taumafai loa le tatou faigamalo tuto’atasi e amata fa’ataunuu loa, nai lo le tele na’ua o le talanoa i ai, ae le fa’atinoa.

LE’I AGAVA’A DPS - PUE LAISENE AVETA’AVALE E FA’AAOGA I FAFO

O lea ua oo i le taimi o le ta’utinoga a le Fa’atonu o le Matagaluega o le Saogalemu Fa’alotoifale, Samana Veavea, peita’i ua faaali patino mai e lea fa’atonu, “E le’i agava’a lava le tatou matagaluega o le Puipuiga o le Saogalemu Lautele, DPS ina ia pu’ea e i latou Laisene Aveta’avale e mafai ona fa’aaoga mo femalaga’iga i fafo atu o Amerika Samoa.”

I le masina o Iulai 2022 na mua’i molimau ai le susuga le Sui Komesina o Leoleo Terry Letuli ma ia fa’ailoa, o le masina o Oketopa 2022 lea ua sauni le Matagaluega o le Puipuiga o le Saogalemu Lautele e tapu’e ai Laisene Aveta’avale o le mamalu o le atunuu e mafai ona fa’aaoga e pei o sou tusi folau e fa’amaonia ai oe i so’o se setete ma teritori o Amerika.

Lea la ua fete’ena’i nei lea saunoaga ta’utino a le Sui Komesina ma le fa’atonu o le Saogalemu Fa’alotoifale o le atunuu.

O le ta’utinoga a le Fa’atonu o le Homeland Security, Semo Ve’ave’a sa faia lea ina ua fesiligia i le taimi na tau fa’apasia ai lana Tupe fa’asoa mo lana matagaluega i iloiloga a le fono faitulafono.

O le sui na fa’akonekarate mai mo le tapenaga o nei Laisene Aveta’avale e taualoa i isi setete ma teritori uma o le Malo Tele, ua toe taliu nei i fafo, ae le’i gafatia e le DPS ona pu’e ma taua’ao mai i le mamalu o aveta’avale i le atunuu nei ituaiga o Laisene Aveta’avale.

Peita’i o lo’o ua i ai nei se taimi o totoe e mafai ai ona fa’amae’a e Amerika Samoa ona tapena nei ituaiga o Laisene Aveta’avale ma taua’ao atu i ona tagatanuu ua talosagaina. O le Masina o Me 2023 lea e fa’amuta ai lea avanoa, ma afai e oo atu lava i lena masina e le’i faataunuuina lava lea tautua mo tatou tagata, o le a le toe faaaogaina lava se laisene ave ta’avale i Amerika Samoa e te pasi ai i so’o se malaeva’alele i le Iunaite Setete. Ua toe lava o Amerika Samoa e le o taualoaina lona laisene ave ta’avale e avea ma se fa’ailo e fa’amaonia ai lona sui i so’o se setete ma teritori o le Iunaite Setete atoa.

O le a se mea o taofia ai pea lea tautua e le o mafai ona fa’atino? Tali mai, “Ua leva ona mae’a fa’atutu masini komipiuta ma masini lolomi mo lea tautua e oo lava i le so’otaga ma le sapalai atoa o ituaiga pepa e lolomia i ai fa’amaumauga, peita’i e i ai le pasiga e tatau lava ona fa’atino mulimuli e siakia atoa ai nei mea uma, aua e oo lava i ofisa i fafo atu o le tatou atunuu, o le a mafai ona fesootai mai ma fa’amaumauga uma i luga o nei laisene o le a pasia lelei mo le fa’amaoniga o so’o se sui aveta’avale i fafo.”

O le sui e ao ona pasia nei mea uma ona fa’ato’a fa’aaoga ai lea, o le pasiga mai fafo e fa’ato’a agava’a ai loa le tatou matagaluega e fa’atino lea tautua mo le mamalu lautele o e fa’afoe ta’avale afi ma va’a i le teritori.