Pago Pago - AMERIKA SAMOA

TALOSAGA E LE MALO IA LE STARKIST E FAU NI NOFOAGA E FAAMAUTU AI A LATOU TAGATA FAIGALUEGA MAI FAFO

O se tasi o tulaga sa fa’ata’atia i le fonotaga a le Atoa o Samoa lona lima, i le va o Samoa e lua, e pei ona alo atu iai i le amata o lenei masina, na ala mai i se talosaga mai i le malo o Amerika Samoa, i le pulega a le kamupani i’a o le StarKist Samoa, mo le fausiaina o ni fale, po o se nofoaga e mafai ona faamautu iai ana tagata faigaluega mai fafo.

Ua mafua lenei talosaga ona o seisi talosaga ua faaulufaleina e le StarKist, mo ni isi tagata faigaluega faaopoopo e to’a 500, lea ua faamoemoe e aumai mai i Samoa.

Sa faamaonia e taitai o le Malo o Amerika Samoa, i le Atoa o Samoa, ia le pasiaina o tagata mai Samoa e to’a 870, e malaga mai i Amerika Samoa, i lalo o le polokalama lea e fa’atagaina ai ona o latou faimalaga mai mo le fitu aso, e aunoa ma se pemita.  

O lenei polokalama sa fa’avaeina ina ia toe iloiloina ai tulaga o pemita, ina ia mafai ona fa’afaigofie femalagaiga i le va o Samoa e lua, lea na amata mai ia Oketopa 2023.

Ma i le va o Oketopa 2023 ma Aperila 2024 e to’a 1,371 tagata Nesionale a Amerika sa mafai foi ona fa’atagaina, e faimalaga atu i Samoa e aunoa ma ni pemita.

I se lipoti a le nusipepa o le Samoa Observer, o lo’o ta’ua ai le fuainumera e 1,222, o tagata faigaluega a le StarKist, na faimalaga maim ai Samoa, ma le to’a 119 lea ua toe fa’atagaina mai, i lenei masina.

I tulaga o pemita, ua iai se maliliega i le va o Samoa na lua, e toe siitia le aofaiga o aso e mafai ona faimalaga mai ai tagata mai i Samoa i Amerika Samoa, e aunoa ma se pemita, mai i le 7 aso, i le 10 aso.

LIPOTIA LE TUPUTUPU LELEI O FAAPUTUGA TUPE MO LITAEA A LE ASG – AE E IAI LONA

Ua mae’a nei su’egatusi o le Ofisa Litaea a Amerika Samoa (ASGERF) mo le tausaga tupe 2023, lea sa faatinoina e Moss Adams, ma e tusa ai ma le tala o le tupe mo le FY2023, lea sa tapunia ia Setema 30, 2023, e foliga mai o lo’o tulaga lelei e tusa ai ma tulafono tau tupe, lea o lo’o taliaina e le Malo Tele.

O se tasi o tulaga lelei ua fa’aalia i lenei su’esu’ega, o le faaopoopoga lea i le ‘total net’ a le ASGERF, lea ua siitia i le $14,546,547, i le va o le 2022 ma le 2023.  Ma ua mafua lea tulaga lelei ona o tulaga lelei i le maketi (favorable market conditions) ma se siitaga i tupe aoina (contribution rate), lea ua iai se tupe faaopoopo e $20,761,698.

Ae e ui i lenei tala fiafia, ae peitai, ua lipotia mai le pa’u o le tulaga aofia (net position) a le ASGERF, i le $37,349,096 i le tausaga e 2022 ma na maua ai le aofai atoa o le ‘net position’ i le 2023, ua na o le $172,688,865.  Ma va’aia ai se pa’u e 15% mai i lona ‘net position’ e $202,366,779 i le 2018, ma le aofaiga atoa o le tupe lusi e $22,157,658, talu mai lea tausaga.

I tulaga o tupe aoina (contributions) mai i tagata faigaluega i le tausaga 2023, e $14,282,478, o se sitepu agai i luga lea, mai i le $11,290,906 i le 2022.  Ae o tupe aoina (contributions) mai i totino o le ASGERF, ua siitia mai i le $5,901,088 i le $4,460,237 i tausaga lava ia e tasi.  Aofaiga o ‘contributions’ o le 2023, ua o’o atu i le $20,183,566 pe a faatusatusa atu i le $15,751,143 i le 2022.

O tulaga i tupe fa’aalu, ua siitia mai i le $1,362,263 mai i le $27,236,032 i le $28,598,295 i tausaga ua tuanai.  I le 2023 foi, o peimeni mo penefiti, ua na o le $8,414,729 ae i tausaga i tua atu, sa o’o atu i le $11,454,889.

O lo’o ua va’aia pea le fai o sina si’isi’i o tupe fa’aalu (general and administrative expenses), mai i le $1,883,846 i le tausaga tupe FY2022; i le $,904,036 i le tausaga tupe FY2023.  Ae o le aofaiga o tagata faigaluega a le malo o lo’o aofia (covered) i vaegatupe litaea, ua pa’u i le 4,763 i le 2023, mai i le 5,155 i tausaga muamua atu.  Ae o le aofaiga atoa o ‘beneficiaries’ ua faaopoopoina mai i le 1,998, ile 1,994.

Ma ua toe pasiaina nei ia le afioga i le Peresetene o le Senate, ia Tuaolo Manai Fruean, e fa’aauauina pea lona tofiga o le Taitaifono o le Komiti Faafoe a le ASGERF.  Ma sa ia faaleoina i luma o le latou laulauafono, le fa’aauau pea ona tulaga lelei ia tala o le tupe a le ASGERF, e ui lava ina iai nisi o taimi e fa’afaigata ai ona fai sana malologa, i le mataituina o le ‘market’, lea o lo’o inivesi ai nei vaegatupe.

O le a fa’aauauina nei le tofiga taitai a le afioga Tuaono, seia o’o atu i le 2029.

Ua faapea foi ona lipotia mai le fa’amavae o le Faatonusili a le Ofisa a le ASGERF, le susuga ia Vaitautolu I’aulualo Faafetai Talia, mai lona tofiga taitai, aua lona faamoemoe mo le Palota ia Novema, lea o lo’o tausinio atu iai mo le tofiga Kovana.  O Caroline Wendt lea ua avea nei o ia ma sui Faatonusili o lenei ofisa.

REGGIE MA FA’AALIGA O LE GAOSIA O LE SIAPO

O le aso Lulu o le vaiaso ua mavae, Me 15, 2024 sa fa’atautaia ai e le faletua ia Reggie Meredith Fitiao ia se fa’aaliga ata ma se fiafia tele, i le Aloha Ballroom Company, e fa’aali pe faatino ai foi le gaosiga o le Siapo faapea ma le faalauiloaina o lona tala’aga.

O Reggie, o le Faatonusili o le faalapotopotoga ua ta’ua o le ‘Fa’asamoa Arts”.  Ma o le vaiaso ua mavae, sa faatalanoaina ai foi o ia e le vaega faasalalau a le Hawaii News Now (HNN).

O le tamaitai ia Reggie ua lauiloa o ia i totonu o Amerika Samoa, e le gata i ata tusia ae faapea foi le tomai i le gaosiga o le siapo.  O lenei taleni o le gaosiga o siapo, o se taleni sa tu’u lima ma tu’u gutu mai i tina o lona aiga i Leone, lea na amata mai i lona ‘great-grandmother’ o Saiselu Tuimalealiifano Meredith.

Ma sa ta’ua o Reggie, o lona tuagane, o Tony Meredith, sa faavaeina le ‘Aloha Ballroom Company’ lea sa mafai ai ona fa’aaogaina e Reggie mo lana fa’aaliga ata ma taleni.

Ua ia nofo sauni atu foi, e ta’ita’ia le aumalaga o le ‘au fai siapo a Amerika Samoa, mo le fa’aaliga o Tu ma Aganuu a le Pasefika 2024, lea o le a faataunu’uina i Honolulu, Hawaii i le masina o Iuni o le tausaga nei.