Pago Pago - AMERIKA SAMOA

FESOASOANI TAU TUPE MO FANAU AOGA A AMERIKA SAMOA

O le aso Tofi o le vaiaso ua tuanai, na feiloai ai tamaitai Failautusi o le Ofisa o le Initeria, ia Carmen G. Cantor ma fanau aoga mai aoga maualuluga o lo’o auai i le polokalama o le Close-Up, se polokalama o lo’o faatupeina e le Ofisa o le Initeria mo fanau aoga o teritori ma nisi motu o le Pasefika.

 I le masina o Aperila 2024, na foa’iina ai e le Ofisa o le Initeria ia se vaegatupe e $1 miliona, tauala atu i lana polokalama o le ‘Technical Assistance’ mo le Faavae o le Close Up.  O lenei vaegatupe e mo le faatulagaina o ni avanoa mo fanau aoga ma faiaoga mai i teritori ma ni isi o motu o le Pasefika, e a’oa’o atili ai e uiga i le faagasaloga o faiga faamalo a Amerika, e ala lea i lo latou asiasi atu ma auai i ni fonotaga ma taitai o le malo.

E latou te maua ai foi le avnaoa e asia nisi o mata’aga lauiloa i tala faasolopito a le malo tele.

I le latou asiasiga ma Cantor, sa mafai ona soalaupuleina ai e fanau aoga ma le sui Failautusi ia le tiute taua a le Initeria i totonu o teritori ma ni isi o motu o le Pasefika.

FAAULUFALE SE PILI MO TUPE FESOASOANI MO FAIFA’ATOAGA

O se pili na fa’ato’a faaulufaleina i totonu o le Konekeresi a le Malo Tele, o le a mafai ona faatulagaina ai ni tulafono mo faifa’atoaga mo leisi lima tausaga, atina’eina o puipuiga faaletaumafa (food security) faapea ma tupe e fesoasoani mo Amerika Samoa.

Ua saunoa mai le afioga i le Faipule a Amerika Samoa i totonu o le Konekeresi, le afioga ia Uifaatali Aumua Amata, o lenei pili (Farm Bill), o le a faapea ona faatulagaina ai tulafono mo le gaosiga o taumafai i totonu o Amerika, ae o le a faapea ona fesoasoani malosi i le teritori, aemaise i tulaga tau tupe.

O le a fesoasoani foi lenei pili i polokalama tau i taumafa maloloina (nutrition program), lea o lo’o faafoeina e le malo o Amerika Samoa.

Sa fa’aalia e Uifaatali lona lagolago malosi i lenei pili aua tulaga o ‘food security’ a le teritori.  Ma sa ia fa’aalia foi lona agaga fa’afetai i le Taitaifono o le Komiti o Faatoaga, le susuga ia Glenn “GT” Thompson, mo le tu’ufa’atasia ma le faaulufaleina o lenei pili.

O le tausaga e 2017 na faimalaga mai ai Thompson ma sana aumalaga mai i le Laumua i Uasigitone, e asiasi mai i fa’ato’aga ma vaomatua o Amerika Samoa.

MALIU LE PAILATE O SE VAALELE NA PA’U I GATAI O VAITELE, SAMOA

O le 2:30 i le aoauli o le Aso Gafua, Me 27, 2024 (Aso Sa lea i Amerika Samoa), na tulai mai ai se faalavelave i gatai o le afioaga o Vaitele, i Samoa, ina ua pa’u se vaalele i totonu o ogasami o Samoa, ma maliu ai le alii pailate, le susuga ia Philip Meredith.

E tusa ai ma se ripoti mai i le Samoa Observer, o le mae’a ai o le malologa o le aoauli a le aufaigaluega a le kamupani o le Bluebird, na o latou va’aia ai lenei vaalelei o lele faata’amilomilo i gatai tonu o Vaitele, ma i’u ai ina pa’u i totonu o le sami ma amata ai ona magoto.

Sa ta’ua e se tasi o le aufaigaluega a le Bluebird, sa mafai ona o latou agai atu ma fesoasoani i le aumaia i uta o le alii pailate, ae peitai, ua le mafai ona fa’asaoina lona soifua.

Sa taumafai foi le vaega a leoleo, e si’i a’e i luga le va’alele, ae peitai, sa le’i manuia a latou taumafaiga.