Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

TULIMATA’I E AMATA LE GALULUE FAATASI MA LE FAIGAMALO FOU

Na fa’aalia e le afioga i le sui Faipule o Amerika Samoa i Uasigitone, ia Uifa’atali Amata lona fa’afeiloa’ia o le pasiaina o vaegatupe feterale, e o’o atu lava i le ogatotonu o Mati, e aofia ai ma vaegatupe e fesoasoani i fa’alavelave fa’afuase’i faalenatura, i nofoaga i totonu o le Iunaite Setete faapea atunu’u ua mafatia ona o lologa ma mafui’e.

Sa ia ta’ua le toe amataina i le masina fou ona galulue punoua’i ia le Konekeresi i pili fa’asoasoa mo le faaiuga o le tausaga.

O le aso Faraile ua tuanai, na taunu’u ai le Maota o Sui i se maliliega i vaega ma’oti ma pasiaina ai se pili e taofia ai le malo mai i le tapunia o le tele o galuega ale malo.  Ma sa faapea foi na palotaina e le Senate, ia le fa’ao’oina atu o lenei pili taua i le alii Peresetene o Amerika, mo le sainia ina ia mafai ona avea ma tulafono.

Sa fa’aalia e Amata lona agaga fiafia ona o le a leai se puniala i le fa’aauauina pea ona fa’agasolo mai o fesoasoani mai i le malo feterale, e pei o le ‘Farm Bill extension’ ona o se vaegatupe o lo’o fa’alagolago malosi ai le teritori i ana polokalama o taumafa e aoga mo le tino maloloina ma isi polokalama a le Ofisa o Faatoaga.

FILIFILI LE KOVANA FOU A AMERIKA SAMOA E AVEA MA TOTINO O LE ITU RIPAPILIKANA

O le aso Gafua, Tesema 23, 2024, na fa’alauiloa mai ai e le afioga Pulaalii Nikolao Pula, le kovana filifilia a Amerika Samoa faatasi ai ma le kovana a le atu Mariana, o Arnoldd Palacios, sa la fuafuaga e auai atu i le itu Ripapilikana, e pei ona sa fa’alauiloa mai i se fa’aaliga fa’alauaitele a le Taitaifono a le Komiti o le itu Ripapilikana, o Michael Whatley.

Sa ta’ua e Whatley, ua talu lava ona manumalo ia Peresetene Trump ia Novema, ua matua’i maualuga lava le tulaga ua o’o iai le latu itu ma ua toe malamalama le lumanai o Amerika.

Sa fa’aalia e Whatley lona agaga fiafia e fa’afeiloa’i atu ia Kovana Pula ma Kovana Palacios, i le avea ai o i la’ua ma ni totino fou i totonu o le latou itu.

MALELEGA A LE AFIOGA I LE AO MAMALU O LE MALO SAMOA

I sana malelega mo le nofo sauniuni o tagata o Samoa, e faamanatuina le Kerisimasi, sa saunoa ai le susuga ia Tuimalealiifano Vaaleto’a Sualauvi II, le Afioga i le Ao Mamalu o le Malo o Samoa, i le autu moni o le Kerisimasi, ma ia vi’ia le fanau mai o lo tatou Fa’aola, o Iesu Keriso.

Sa saunoa o ia e faapea, i le lalolagi uma, o le alofa, o le feau taua lea o le Kerisimasi, o le tulaga lea o lo’o faapea ona aumaia faatasi ai loto ma agaga o le toatele, i le alofa fa’a Atua, o le foa’i ma le fa’asoa atu i isi, faapea le manatuaina, faamagalo atu ma le faaleleia ma isi.

Na ia faaleoina lona agaga fa’afetai i susuga i Fa’afeagaiga o fata faitaulaga eseese, ona o la latou tiute fai pea, e fafaga ma faamalosia ai ola faaleagaga o le atunu’u.

TO’A 53 FA’AU’U MAI I LE POLOKALAMA O LE COHORT STEM A LE IUNIVESITE O HAWAII

E to’a 53 nisi o faiaoga ma taitai aoga a le teritori, ua faapea ona i’u manuia mai a latou aoaoga mai i le polokalama o le COHORT 36, a le Iunivesite o Hawaii.

Ma na fa’atumulia le Fale Laumia i le aso Tofi o le vaiaso ua tuanai, i uo ma aiga, sa mafai ona auai atu e molimauina le taunu’uga manumalo a. i latou nei.