Pago Pago - AMERIKA SAMOA

Ua fa’ao’oina atu nei e le Ofisa Vaalele a Samoa, le Samoa Airways, sa latou talosaga i le Matagaluega o Femalagaiga a le malo tele o Amerika, ina ia mafai ona toe fa’afouina la latou maliliega, e mafai ai ona fa’aauauina femalagaiga a le ofisa vaalele, i le va o Samoa ma motu o le teritori o Amerika Samoa.

O le aso 11 o Ianuari, 2025, lea o le a fa’amutaina ai le maliliega o iai nei, e pei ona ta’ua i se ripoti mai i le Samoa Observer.

Ia Tesema 20, sa fa’aulu ai e le loia a le Samoa Airways, o Charles F. Donley II, se talosaga i le Matagaluega o Femalagaiga a Amerika, mo le fa’atagana e fa’aauau ai le auaunaga a le Ofisa Vaalele.  Ma na fa’amamafaina ai e Donley ia le taua o lenei auaunaga, e le gata i feso’ota’iga i le va o atunu’u, ae faapea foi tulaga mana’omia vave mo Manu’a.

Ua faapea ona u’una’ia e le malo o Amerika Samoa ia le Samoa Airways ina ia fa’aauau pea la latou auaunaga, ma ia ta’ua ai le tulaga pagatia o le a o’o ai tagata o le teritori pe afai ae motusia le auaunaga a lenei ofisa vaalele, aemaise ai le limiti o auaunaga tau femalagaiga i luga o le ‘ea i totonu o le teritori.

O lo’o fa’amamafaina foi i totonu o le talosaga a le Samoa Air ia le taua o la latou auaunaga, aua le soifua maloloina ma le saogalem o tagata o Manu’a, aua e le tele ni auala mautu e mafai ona feso’ota’i ai Tutuila ma Manu’a.

Aemaise ai taimi o le ave’esea fa’afuase’i o tagata mai i Manu’a, i taimi o fa’alavelave fa’afuase’i, po o si’iga gasegase fa’afuase’i.

O lo’o ta’ua i le tusi talosaga a le ofisa vaalele e faapea, a aunoa ma le tautua a le Samoa Air, o le a leai se isi auala o le a faapea ona femalaga’i ai tagata o le atunu’u, se’ia vagana faigamalaga i luga o le sami, lea e 60 maila le mamao i le va o motu e lua, ma le sou o le sami ile tele o taimi.

Ua ta’ua ai foi le mana’omia tele o lenei auaunaga, aua le saogalemu ma le soifua maloloina o tagata o Manu’a.

I le va o masina o Ianuari ma Novema, 2024 sa fa’ataunu’uina ai e le Samoa Air ia ni faigamalaga e 531, sa tau’aveina ai ni tagata femalaga’i e 5,588 ma le faitau selau pauna o uta.

E le gata i lea, sa feagai le ofisa vaalele ma ni malaga fa’afuase’i e iva, mo gasegase, ma e fa’amautuina ai le taua tele o la latou auaunaga i lea itu o le Pasefika.

Afai ae pasia pe taliaina foi lenei talosaga a le Samoa Air, ua iai sa latou fuafuaga e fa’aauauina a latou faigamalaga i le va o Tutuila ma Manu’a, e ala i le fa’aaogaina o la latou vaalele e 19 nofoa.  Ma o le a fa’aauau pea ona fa’atulagaina a latou faigamalaga e tusa ai ma mana’oga o tagata, o tagata la’u uta faapea ma fa’alavelave fa’afuase’i e ono tula’i mai.

Ua fa’aalia mai foi e le Samoa Air lona loto malie e taliaina aso 180 ‘initial approval’ ae ta’atia ia aso o totoe o le maliliega tuai.

E tusa ai ma tulafono a le malo tele o Amerika, e mafai e le Matagaluega o Femalagaiga ona fa’atagaina se va’alele mai atunu’u ese ona tu lau’ele’ele i totonu o fanua o Amerika po o ona teritori, i lalo o ni aiaiga faapitoa, e aofia ai;

1.  Le tautuaina o mana’oga a le mamalu lautele

2.  O se fa’alavelave fa’afuase’i ma e iai ni mana’oga faapitoa e manaomia ai lenei auaunaga

3.  Ua mae’a ona uia uma ala faaletulafono e maua ai se auaunaga mai isi ofisa vaalelel a Amerika

4.  O tulaga pagatia e ono tula’i mai pe afai ae le taliaina le talosaga

O lo’o ua taofi le ofisa vaalele a le Samoa Air, ua mafai ona ausia uma e la latou ofisa ia aiaiga uma e pei ona ta’ua i luga.

O lo’o ua finau mai foi le ofisa vaalele, i le leai lava o seisi ofisa vaalele a Amerika e mafai ona faatinoina lenei auaunaga mana’omia, ma le taua tele o le fa’aauauina o la latou auaunaga, aemaise lava mo tagata i Manu’a.

Ua nofo fa’atalitali nei le ofisa vaalele mo le fa’ai’uga mai i le ofisa o femalagaiga i Amerika.  Ae i le tulaga lelei o la latou auaunaga faapea ai ma le lagolago malosi a le malo o Amerika Samoa, mo le fa’aauauina o la latou auaunaga, ua toe fa’amautu mai i la latou taumafaiga le taua o feutagaiga fa’avaomalo, mo le fofouna o nei faafitauli tau i femalagaiga.