Pago Pago - AMERIKA SAMOA

I le iloiloga a le Komiti o le Soifua Maloloina a le Senate ma taitai o le LBJ, DOH ma le HDC (Hope Dialysis Center), i le vaiaso ua tuanai, sa finau malosi ai le afioga i le Senatoa ia Togiola T.A. Tulafono mo le vaega a le HDC, ma na o’o lava ina ona tu’ua’ia le LBJ i lo latou taumafai faia o tulaga uma, e tapunia ai le HDC, talu lava ona tatalaina.

Ina ua faatula’i mai lenei mataupu i le ulua’i aso o iloiloga a le Senate, e le taitaifono a le Komiti o le Soifua Maloloina, le afioga i le Senatoa ia Tuiasina Salamo Laumoli, sa saunoa ai Togiola i le iai o ni faamatalaga o lo’o salalau, e uiga i ni feutagaiga i le va o le LBJ ma le HDC, aua le fa’aauauina o talavai mo tagata fa’amama toto, mai i le HDC i le LBJ.

Ma ia talosagaina ai le Komiti o le Soifua Maloloina a le Senate, ina ia faia se su’esu’ega e uiga i nei tala salalau.

Ina ua tu’uina atu le avanoa i le afioga Togiola mo ni ana fesili, sa ia ulua’i fesiligia ia gasegase e to’a 41 mai i le HDC.  Na fia malamalama le afioga i le Senatoa, po o fea e o mai ai i latou, pe malaga mai atunu’u i fafo, po o ni tagatanu’u a Amerika Samoa.

Sa tali mai ia le sui o le HDC ia Saluafata Talili, mai i le to’a 41 lea, e na’o le to’alua e malaga mai atunu’u i fafo, ae o le 39 o tagata lava o lo’o nonofo i totonu o Amerika Samoa.

O lea na saunoa mai ai Togiola, e tu’u le toe talanoa e uiga i nei tagata, e pei o ni tagata mai atunu’u ese.  Ta’ua e le afioga i le Senatoa, o se tulaga le manaia i le fa’afofoga, ona e pei o ni tagata ese ae o o tatou lava tagata.

Sa toe fesili Togiola, po o fea e fai ai talavai faamama toto a tagata o le atunu’u e malaga mai i fafo, pe ana faapea e leai se HDC.

Na tali Talili, o le LBJ.

Na saunoa Togiola, e leai ni tiute o fa’aopoopoina mo le LBJ, aua ana le o ia gasegase nei e to’a 39 e faamama latou toto i le HDC, o lona uiga, e o mai i le LBJ.

Sa ia toe ta’ua foi ia tu’uaiga sa faia e fa’asaga i le aufaigaluega a le LBJ ma ia ta’ua le amataga, i le fa’ato’a fa’avaeina o le HDC, e to’atele nisi o gasegase sa o atu i le LBJ mo le amataga o a latou talavai, ae peitai, sa fetaia’i ma fa’afitauli, ina ua tete’e mai latou e le LBJ, se’ia vagana e tumau a latou talavai i le LBJ.

Ae na ta’ua e Togiola, o gasegase ia, o lo’o finagalo e fai a latou talavai i le HDC, ae o lo’o fai mai iai le LBJ, e le taliaina i latou i le LBJ seia vagana e fa’aauau a latou talavai i le LBJ.  Ma o le mafua’aga lea sa fa’afaigata ai ona taofiofi e le HDC ia a latou gasegase.

Na fesiligia e Togiola ia Talili, i sona malamalama iai, pe fa’afia ona tupu lea tulaga.  Sa tali Talili, na silia ma le fa’a sefulu (10).

Sa toe fesili Togiola, po o LBJ lea e mafua ai ona fa’aitiitia fuainumera o tagata e filifilia HDC e fai ai a latou talavai.  Na toe tali Talili, ioe.

Ona fesili lea o Togiola, po o le a le mafuaaga o lo’o tomumu ai pea i le toe aveina atu o gasegase, ae o le tulaga lea na manana’o ai.

Sa faapea ona tali mai le sui Faatonusili a le LBJ, o Maria Guyapa ma ia faapea mai, e le o tete’e e LBJ ni gasegase, ae peitai, sa fa’auilavea mai Togiola i le tali a Dr. Guyapa ma ia faailoa mai lona molimauina o le te’ena e LBJ o nisi o gasegase faamama toto.

Na fa’amalamalama e Dr. Guyapa, na iai ni gasegase sa feagai ma fa’afitauli i a latou talavai, na o’o atu i le ER ma e le’i te’ena i latou.

Sa fesili Togiola pe aisea? Pe sili atu ona maliliu i latou nai lo le togafitia.

Sa faamanino e Dr. Guyapa, e latou te le o taofia ni gasegase mai i le o’o atu i le LBJ i taimi o feagai ma fa’afitauli.  Ae peitai, ona o puipuiga i a’afiaga o le tulafono, e mafua ai ona o latou alo’ese mai i le taliaina o gasegase e iai fa’afitauli i le amataga o a latou talavai.

Sa fesiligia e Togiola po o le a le mau a le LBJ, i tulaga o le tulafono.  Sa ia fesili, afai o gasegase o lo’o talavai i le HDC, ae tula’i mai se fa’alavelave faafuase’i, o le a le taliaina e le LBJ, ona o a’afiaga o le tulafono?

Sa toe tali mai Dr. Guyapa, e le te’ena e le LBJ se tasi, e tusa lava po o a fa’afitauli e tupu mai.

Ma na saunoa mai Togiola, ua atili nunumi lona mafaufau i le fesuisuia’i o faamatalaga a le sui Faatonusili.

O lea na taumafai atu ai le COO a le LBJ, ia Dr. Jean Anderson e faamanino le saunoaga a Dr. Guyapa, e ala i lona faapea mai, e le te’ena e le LBJ se gasegase.  Ae o lo latou atugaluga, ona e iai nisi o vaega o talavai a tagata o lo’o faamama toto, e le o gafatia e le HDC ona fofoina.

Ma e o atu nei gasegase i le LBJ ma ia fa’afitauli, e fautuaina i latou ina ia tumau i le LBJ e fa’aauau ai a latou talavai, ina ia vave fofoina so’o se fa’afitauli e tula’i mai i a latou talavai.

Na saunoa Dr. Anderson, o le mafua’aga lea e u’una’ia ai e le LBJ ia i latou e fai talavai i le HDC, ona a tupu mai se fa’alavelave, e ono afaina ai o latou soifua pe afai e tau malaga mai i le HDC i le LBJ.

Saunoa foi Dr. Anderson, e mafai e le LBJ ona tausia ona tagata fa’amama toto ma fa’afitauli e ono tula’i mai, pe afai e fa’aauau a latou talavai i le LBJ.

Na liliu Togiola i sui mai i le HDC ma faapea atu iai, ia o lena le mafuaaga ua le faamanuiaina ai a outou taumafaiga.  O lo’o ave e le LBJ a tou tagata.

Na tali mai Talili, o lo’o fa’aauau pea ona faia e le LBJ lea tulaga.  Sa ta’ua e Talili, e le o taliaina e le LBJ ia gasegase, pe a vala’au atu iai e o atu e aumai se gasegase mo ana talavai.

Sa faapea lona ona tu’uaia e Togiola ia Dr. Anderson i le pepelo.  Sa fa’aalia e le afioga i le Senatoa lona le fiafia i se tagata ae pepelo atu ia te ia. 

Ae na finau mai Dr. Anderson, e fai sina faigata ona ia malamalama i lea tu’ua’iga, ae o lea ua taliaina e le LBJ ia gasegase e 41 ia sa i le HDC.

Sa liliu atu le afioga Togiola ia King-Young  ma ia talosagaina se faamaninoga auiliili e uiga i le polokalama a le Medicaid.  Sa faapea foi ona ia toe fesiligia ia Talili po o fa’aauau ona faia ni talavai faamama toto i le HDC.  Na tali Talili, e leai.

Ona fesiligia lea e Togiola po o le a le fuafuaga a le HDC i a latou masini.  Sa tali Talili, o lea o le a lafoina i atunu’u i fafo.  Sa toe fesili Togiola pe fia masini, na tali Talili e 14 masini.

Sa fia malamalama Togiola pe fa’afia ona fesuiai sifi, na tali Talili e fa’afa. Na saunoa Togiola, o se tulaga pagatia tele lenei mo le teritori ma ona tagata o lo’o manaomia lenei auaunaga.

AUILIILIGA O LENEI MATAUPU

I se imeli na lafoina atu e le Faatonusili a le LBJ i le afioga i le alii Faipule ia Larry Sanitoa, e tali ai se imeli a le afioga i le Faipule, e tusa ai ma atugaluga a gasegase HDC e uiga i le tapunia o le HDC, sa ta’ua ai e Dr. Ledua le faia o ni feutagaiga i le va o taitai sinia a le falemai e soalaupuleina se fuafuaga le taliaina e le LBJ o gasegase mai i le HDC.

Sa ia ta’ua le iai o se fuafuaga le tumau e pei ona auiliiliina i le latou fa’aaliga fa’alauaitele lea sa tu’uina atu i vaega fa’asalalau, lea foi na tu’uina i luga o le uepesite a le LBJ.

Na ta’ua foi e Dr. Ledua le fa’akalenaina e le potu faamama toto a le LBJ ia taimi ma aso e mafai ona fa’ataunu’uina ai talavai a gasegase mai i le HDC.  E le gata i lea, ua mae’a ona saunia sapalai e manaomia ina ia tali ai o la tou manaoga.

Sa faapea foi ona aofia i le imeli a le Faatonusili a le LBJ ia se faamatalaga pu’upu’u e uiga i le fuafuaga tumau a le falemai ua fa’atulagaina mo gasegase faamama toto i totonu o le teritori.

E aofia ai ma se fuafuaga ina ia aveina atu lenei auaunaga i maota ma laoa, ae le toe tau malaga mai i le falemai.