Apia - SAMOA

Ua ripotia mai le te’ena e le Faamasinoga Maualuga i Samoa ia le talosaga a se tamaitai Filipaina sa lokaina mai i le malaevaalele i Faleolo ina ua maua ai ni fualaau faasaina, ina ia toe fo’i mai i Amerika Samoa e faatalitali ai lona faamasinoga.

E tusa ai ma le ripoti a le Samoa Observer, o lo’o molia nei ia Arriane Fae Timblique mai i Filipaina ma sa faamautu i Nu’uuli, i le maua ai o fualaau faasaina ma pulufana.  Ae o lo’o te’ena e le tamaitai faiaoga lea sa galue i le a’oga maualuga a Nu’uuli Voc-Tech, ia ona moliaga.

O lo’o taofi mau Timblique, o fualaau faasaina ma pulufana sa maua i lana ato, na tu’uina iai e se tagata.

Sa taumafai Timblique e talosagaina le faamasinoga, tauala atu i lana loia, o Vaisala Afoa, e avea ma se vaega o aiaiga mo le tatalaina o ia i tua, e fa’atali ai lona faamasinoga, ia lona toe fo’i mai i Amerika Samoa, ona e leai ni ona aiga i Samoa ma e leai se auala e mafai ona tausia ai o ia i se taimi umi.

O lo’o finau Timblique i le fita ma le faigata o le tulaga o le a o’o iai lona olaga, pe afai ae taofia o ia i Samoa e faatali ai lona faamasinoga ma sa ia ofoina atu foi le totogia o se vaega tupe e $5,000.

Ae peitai, sa te’ena e le itu a le malo ia le talosaga a le ua molia, ma sa finau le itu a le malo i le matuia o moliaga o lo’o molia ai Timblique ma e maualuga ai le avanoa e ono sola ese ai o ia.

Ma e le gata i lea, e le o iai se maliliega ma Filipaina, e mafai ai ona toe fa’afo’i mai o ia, pe afai ae sola i lona atunu’u moni.

O le aoauli o le aso Faraile, Iulai 5, 2024 na taunu’u ai Timblique i Samoa ma se faamoemoe e faimalaga atu i Filipaina.  Na mafai ona kilia lana uta i le vaega o Tiute.  Ae o le taeao o le aso Toonai na soso’o ai, ina ua toe agai atu le tamaitai i le malaevaalele i Faleolo mo lana faigamalaga i le Fiji Airways, e malaga atu ai i Fiti, Singapore ma Filipaina, sa taofia ai loa o ia.

I le faaleoina o lana faaiuga i le aso Faraile na se’i mavae atu nei, sa fa’aalia ai le alii Faamasino Sili ia Leiataualesa Daryl Clarke, le fai o sina maualuga o le tulaga ua talosagaina e le ua molia, e tusa lava pe na te totogia se tupe.

Sa ta’ua e Leaiataualesa ia le mamafa o moliaga ma afai ae faamaonia ona moliaga, e mafai ona nofosala ai o ia i le falepuipui.  Ae afai ae faatagaina o ia e tu’ua le atunu’u, e ono le toe fo’i mai o ia ma e tele se avanoa e mafai ai ona ia sola ese atu.

Na ta’ua foi e le afioga i le faamasino sili le mamao atu o le ua molia mai a’ao o faamasinoga a Samoa, pe afai ae talia lana talosaga, e toe fo’i mai i Amerika Samoa ma e le mafai foi ona fa’asa sa e le faamasinoga o ia, a’o iai i Amerika Samoa..

Ma na ta’ua foi e Leaiataualesa le leai o ni fa’amaoniga i ona luma, e faamautu ai le faia o ni maliliega i le va o Samoa e lua, e mafai ai ona toe fa’afo’i atu le ua molia, pe a finagalo mai ai faamasinoga a Samoa.

Na saunoa le afioga i le faamasino sili, e o’o mai loa le ua molia i Amerika Samoa, e le mafai ona toe taofia o ia mai lona toe fo’i atu i Filipaina.

O nei tulaga uma, na fa’aalia e le alii faamasino, e fa’afaigata ai ona taliaina o lana talosaga, e tusa lava pe na te totogia se sala tupe e $5,000.

O le aso 9 o Tesema, 2024 lea ua toe fa’aauauina ai le faamasinoga a Timplique.  Ae e tusa ai ma le talosaga a le ua molia, sa fautuaina e le alii faamasino ia le itu a le malo, e toe Iloilo a latou kalena, pe mafai ona toe tu’u mai i luma le faamasinoga a Timblique.

Ua mae’a ona fa’atulagaina se vaegatupe e totogi e mafai ona tatalaina ai i tua ia Timblique e faatalitali ai lona faamasinoga, ae ua te’ena lana talosaga ina ia mafai ona toe fo’i mai i Amerika Samoa.