Vaega e 2 

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 4.

************************************************

E ui ina fa’afaigata i le tina o teineiti e to’atolu, le fanau a le tamaloa gaosi falaoamata, ona tu’u atu si ana fanau e o i le fale o le alii mau’oa lea o lo’o fai mai e le mafai ona nofo ai se tagata i le po atoa ona o le pa u, ae peitai sa mafaufau le tina i lo latou matitiva ma le le tagolima, na i’u ai ina ona ioe, e o lana fanau teine.

Ae na muamua alu na’o le teine matua ma sa ia alu atu i le alii mau’oa ma ia talosagaina se avanoa e taumafai ai e saili le mafua’aga ua pa’o so’o ai le potu lea e i totonu o lona maota.

Na tau le talitonu le alii mau’oa i le teine matua ma ia fesili iai, “E lava lou loto tele e mafai ai ona e ala i le po atoa i totonu o le la potu, e pei o lo’o iai ni agaga leaga?”

Sa tali atu le teine matua, “O le a ou taumafai atu iai.  Ae na o le pau lava le tulaga ou te talosagaina, pe a tusa ai ma lou finagalo, o le fia maua lea o se mea’ai, ona ua ou galala i le fia ‘ai.”

Ua faapea ona taliaina e le alii mau’oa ia le talosaga a le teine matua ma ia fa’atonuina ia le kuka ina ia tapena se taumafataga tele mo le teine matua.  Ae na le gata iina, sa faapea foi ona faatonuina e le alii mau’oa ia ana auauna ina ia aumai ni la’au e tafu ai se afi ina ia mafai ona mafanafana ai le teine i totonu o le potu, faapea ma se moliga’o ina ia mafai ona fa’amalamalamaina ai le auala mo le teine matua.

Ma o le mea muamua lava na faia e le teine matua, o le fa’aola o le afi i totonu o le tafuna’i ma tu’u iai le ulo ma falai na ave atu ai ana mea’ai.  Ona ia teuina lea o luga o le laulau ‘ai ma lona moega.  

Sa fa’ate’ia le teine matua ina ua mae’a ana gaioiga ae ona fa’alogoina le ta mai o le 12, i le tulua o po ma ao.

[E FAIA PEA]