Apia - SAMOA

O se aso o loimata maligi i le fiafia sa faatumulia ai le laumua a le Ekalesia Faapotopotoga Kerisiano a Samoa, i le Kolisi Fa’afaife’au a Malua, i le aso To’ona’i, Novema 30, 2024, ina ua i’u manuia taumafaiga a le vasega fa’au’u e to’a 30, ma mauaina ai a latou fa’ailoga.

O le sauniga fa’au’u sa faataunuuina i le malumalu ‘Malua Jubilee’ ma sa faapea ona tau’a’aoina fa’ailoga a le vasega fa’au’u, na aofia ai se to’atasi na ia ausia le ‘Diploma’ i mataupu faaleagaga (Theology), e to’a 15 na ausia le ‘Bachelor of Theology’.  E to’asefulu ma le tasi, na latou ausia faailoga o le ‘Bachelor of Divinity’, ae to’atolu sa mauaina le ‘Master of Theology’.

E ui i le to o uaga o faamanuiaga i lea taeao, ae peitai, sa le’i taofia ai le aofia potopoto o uo mamae ma aiga, e molimauina lea aso faapitoa mo le vasega fa’au’u.

O le afioga i le Taitaifono o le Komiti Faafoe a Malua, le susuga i le Faifeau Toeaina ia Asotasi Gu Time sa ta’ita’ia le sauniga a le vasega fa’au’u.  Ae o le Puleaoga o le Kolisi, le susuga ia Rev. Prof. Vaitusi Nofoaiga sa ia fofogaina le ripoti fa’alea’oa’oga o lenei tausaga.

Sa ia faaleoina lona agaga fa’afetai i le lagolago malosi a le ekalesia, faapea le atunu’u aota, i le kolisi ma ana polokalama.

Sa aofia foi i le saunoaga a le afioga Rev. Prof. Nofoa’iga ia le faamanatuina o le 180 tausaga a le kolisi, ma o se molimau lea i le a’afiaga o le a’oga i totonu o Samoa faapea le Pasefika atoa.

Na faapea foi ona fa’aleoina e le susuga i le taitai ia le agaga fa’afetai i le aufaigaluega faapea faiaoga o le Kolisi, e tusa ai ma la latou galuega punoua’i i lenei tausaga a’oga.

I sana upu fa’ala’ei’au mo le vasega fa’au’u, na saunoa ai Rev. Prof. Nofoa’iga ma u’una’ia ai le vasega fa’au’u ina ia fa’atumulia i latou i le loto maualalo ma le faatuatua, a’o latou feagai ai ma leisi la’asaga fou o latou olaga.  Sa ia fa’aalia le agaga fa’afetai i aiga ma uo faapea le ekalesia atoa, ona o la latou tapuaiga mamalu ua i’u manuia ai taumafaiga a le vasega fa’au’u.

O nisi o le vasega fa’au’u na mafai ona maua se avanoa e faasoa mai ai i le Samoa Observer, na aofia ai le susuga ia Caesar Utufua ma le faletua ia Norah McCarthy-Utufua ma sa o la fa’aalia le agaga fa’agae’etia ona o le alofa mutimutivale sa ta’ita’ia ai i la’ua i le fa tausaga ua tuanai atu.

E pei ona sa saunoa le faletua ia Norah, o le alofa mutimutivale o le Atua ona sa ‘ese ni o la manatu na iai ae e la te le’i ulufale atu i Malua, ae peitai o lesona ma tulaga uma ua o la aoaoina mai i lenei fa tausaga ua tuanai, ua sili ona taua.

Sa fa’aalia e le susuga ia Utufua e faapea, e le’i faigofie lenei faigamalaga.  Sa moni fa’afitauli na o latou feagai ae peitai, o faigauo ma mafutaga ua mafai ona mafana, o le a pele ia i la’ua, e o’o i le faavavau.

Na ta’ua e le susuga ia Utufua ma le faletua, ua mafai ona i’u manuia a la taumafaiga ona o taitaiga mai le lagi ma o le la faaiuga sa faia e ulufale atu i Malua, sa taitaiina i le faatuatua.

Sa o la faaleoina lo la agaga faafetai i o la tua’a ua fa’ilagi soifua, sa avea ma ta’iala i o la ola.  E le gata i lea, sa o la fa’aleoina lo la agaga faafetai i talosaga molia ma le lagolago malosi a nai o la tina, aiga ma nu’u.

Ua o la fa’ailoa mai, o o la faamoemoega, ua i le Atua ia.  Ua tu’uina atu lo la fa’atuatua i le Atua, e na te taitaiina i la’ua.

O le susuga ia Utufua ma le faletua, e malaga mai i afioaga o Nofoali’i, Moata’a, Falelatai, Apia, ma Falefa.