Ads by Google Ads by Google

To’atolu ua molia i le umia o fualaau faasaina ina ua taofi e Leoleo se Pikiapu


[ata: SN]
ausage@samoanews.com

Pago Pago - AMERIKA SAMOA

 

E to’atolu i latou na malaga i se ta’avale pikiapu ua molia e le malo i le umia faasolitulafono o vaega o fualaau faasaina, ina ua taofi e Leoleo le ta’avale i le solitulafono i luga o le alatele ae maua ai fualaau faasaina i totonu o le ta’avale.

 

O le masina na te’a nei na tutula’i uma ai i latou nei e to’atolu i luma o le afioga i le Tamaitai Faamasino ia Gwen Tauiliili-Langkilde mo le latou ulua’i iloiloga muamua.

 

O i latou nei e aofia ai William Savea, o ia lea na faafoeina le ta’avale pikiapu na taofi e Leoleo, ma ali’i e to’alua e aofia ai Peleti Ie’u ma Lole Finau.

 

Ua molia i latou uma nei ta’itasi i moliaga o le umia faasolitulafono o vaega o le pauta faasaina o le aisa, faapea ai ma le umia faasolitulafono o vaega o le pauta o le aisa ma le faamoemoe e tulei ma faatau atu i isi tagata, o vaega o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, pe faasala foi i faasalaga uma ia e lua.

 

O loo molia foi Finau i le moliaga o le taumafa ma le umia o se fagu o lo o i ai le ‘ava malosi i totonu o se ta’avale, o se solitulafono mama o le vaega A, lea e mafai ona faasala ai se tasi i le Toese mo le umi e le silia i le tausaga, pe faasala i le salatupe e le silia i le $1,000,pe faasala foi i faasalaga uma ia e lua.

 

E ta’i $15,000 lea ua faatulaga e le Fa’amasinoga e totogi ona faatoa mafai lea ona tatala i latou nei i tua mai le Toese i Tafuna.

 

Afai ae tatala i latou nei i tua, ua poloaina e le Fa’amasinoga i latou ina ia tausisi i tulafono uma a le malo, e aofia ai le faasa lea ona toe umia o fualaau faasaina poo le ‘ava malosi. Ua poloaina foi i latou ina ia aua ne’i toe faafesoota’i e le isi le tasi, ma ia fesootai vava lalata ma le latou loia i taimi uma lava.

 

I le aso na tula’i ai Savea mo le ulua’i taimi, na ia talosagaina ai le Fa’amasinoga Faaitumalo, tauala atu i lana loia fautua mo se avanoa e faataunu’u ai lana ulua’i iloiloga, ima ia maua ai fo’i le avanoa o le malo latou te folasia ai mau e lagolago ai le latou tagi faasaga ia te ia.

 

O le vaiaso na te’a nei na faataunuuina ai le ulua’i iloiloga lea a Savea. 

 

Ae mo Ie’u ma Finau, na manatu i laua e tu’u sa’o atu loa le la mataupu i luma o le Fa’amasinoga Maualuga e faagasolo ai a laua iloiloga, ma faatulaga ai loa se aso e faia ai le la faamasinoga autu.

 

O le vaiaso na te’a nei na tutula’i ai Ie’u ma Finau i luma o le Fa’amasinoga Maualuga ma la teena ai moliaga fa’asaga ia laua. O le masina o Tesema lea ua fa’atulaga e toe valaau ai le la mataupu. O le taimi nei, o lo o taofia pea Ie’u ma Finau i le Toese i Tafuna e le o mafai ona la totogiina le tupe na faatulaga e tatala ai i laua i tua mai le Toese i Tafuna.

 

TAGI A LE MALO 

 

O lenei mataupu na tofu atu i le Ofisa o Leoleo i Tafuna, ina ua taofi e Leoleo sa tiute i luga o le alatele i le poo le aso 8 o Setema 2021 se ta’avale pikiapu i le solitulafono i luga o le alatele ae maua ai fualaau faasaina.

 

Na logo e Leoleo mai le Ofisa o Leoleo i Tafuna ia Leoleo Suesue o le Vaega e Suesueina Mataupu tau i Fualaau Faasaina, e tusa ai o fualaau faasaina na maua i le ta’avale pikiapu na latou taofia i luga o le alatele, na maua ai loa le avanoa o Leoleo Suesue latou te fesiligia ai Leoleo na taofia le ta’avale na maua i ai fualaau faasaina.

 

Na taua e se tai o Leoleo sa tiute i luga o le alatele i le vaveao lea e faapea, ao latou tiute i luga o le alatele i Tafuna i le vaveao e pei ona taua, sa latou molimauina ai se ta’avale pikiapu o loo aga’i mai i Sisifo e alu i Sasa’e i se saoasaoa uiga ese, faapea ai ma le tele o moli faaopoopo i le pito i luma o le ta’avale pikiapu.

 

Talu ai vaaiga e pei ona taua, na manatu ai loa Leoleo e taofi le ta’avale ae sei fesiligia i le mafua’aga ua soona alu saoasaoa ai, aemaise ai le tele o molimau ua faapopoopo i le pito i luma o le ta’avale.

 

Na aga’i atu Leoleo e fia talanoa i le ave ta’avale e tusa ai o le mafua’aga ua taofi ai le ta’avale, peita’i ina ua vili i lalo e le ae ta’avale le tioata o lana faitoto’a, na muamua lava tau le vaai a Leoleo i se apa pia o le ituaiga o le Busch ice o loo tatala, o loo tu i le va o le ave ta’avale ma le nofoa o le pasese. O le taimi fo’i lea na faalogoina ai e Leoleo le leo o se tagata o loo nofo i le nofoa pito i tua, o le mafua’aga lea na faatonu ai loa e Leoleo le ta’avale e vili i lalo faamalama o faitoto’a pito i tua o le ta’avale.

 

Ina ua vili i lalo e le ave ta’avale le tioata o faitoto’a pito i tua, na vaaia ai e Leoleo se ali’i o loo nofo i le nofoa pito i tua, o loo uu i lona lima se apa pia o le ituaiga o le Busch ice ua uma tatala, faatasi ai ma isi apa pia e 2 e lei tatalaina o loo taatitia i ona tafatafa.

 

Talu ai le vaaiga na iloa e Leoleo, na faatonu ai loa le pasese lea e sau i fafo ma le ta’avale. O le pasese lea na mulimuli ane faamaonia lona suafa, o ia Lole Finau, le isi o lo o to’atolu ai i latou o loo molia i lenei mataupu.

 

O le ave ta’avale na mulimuli ane faamaonia, o lona igoa o William Savea, ma le isi alii sa nofo i le nofoa o le pasese, na mulimuli ane faamaonia lona igoa, o ia o Peleti Ie’u.

 

I tulaga o le faatinoina o galuega a Leoleo, na faatonuina ai i latou uma nei ina ia aga’i atu i le Ofisa o Leoleo i Tafuna, ae o le a taofia i lalo o le vaaiga a Leoleo le ta’avale, ona o lea ua maua ai le apa pia ua uma ona tatala.

 

Talu ai o le susuga a Finau lea na maua i ai le apa pia ua uma ona tatala, o le mafua’aga lea na faia ai le faaiuga e taofia o ia ma molia i le taumafaina o le ‘ava malosi o totonu o se ta’avale o loo malaga, atoa ai ma lona umia o se apa pia ua matala i totonu o se taavale. 

 

A o le i auina atu Finau i le Ofisa o Leoleo i Tafuna, na muamua saili e Leoleo lona tino poo i ai ni a’upega mata’utia. Na saili e Leoleo le tino o Finau maua ai se ato lanu uliuli laititi i le taga o lona ofu. I totonu o lea ato na maua ai e Leoleo fualaau faasaina atoa ai ma mea e fa’aaoga i latou e aafia i le tuleiina atu o fualaau faasaina i isi tagata.

 

O mea na maua i totonu o le ato lea sa uu e Finau e aofia ai straws ua uma ona ta tipi tulimanu o loo i ai vaega o le pauta faasaina o le aisa; sa maua ai fo’i pepa iila laiti o loo i ai vaega o le pauta faasaia o le aisa, faapea ai ma le tele o tama’i pepa iila e fa’aaoga e utu i ai le aisa ma faatau atu, ma le tinoitupe e $270.

 

Na saili e Leoleo le ta’avale na maua i ai i lalo o le nofoa o le pasese se paipa tioata o loo i ai vaega o le pauta faasaina o le aisa. O le taimi lea na faatonu ai loa e Leoleo isi ali’i e to’alua o le pasese, o Savea ma Ie’u ina ia tuuina atu o laua tagata e su’e e Leleo mo ni aupega poo nisi fualaau faasaina.

 

Na saili e Leoleo le tino o Ie’u ma maua i ai pepa iila laiti o lo o i ai vaega o le pauta faasaina o le aisa, ma le tino i tupe e $114. Sa maua ai fo’i pepa iila laiti e masani ona fa’aaoga e utu ai fualaau faasaina, faapea ai afi peninisi ma pepa taai.

 

E leai se mea na maua i le tino o Savea ina ua sailia o ia e Leoleo. 

 

Ae ina ua fesiligia e Leoleo ia Finau e tusa ai o le ata uliuli sa ia te ia, lea na maua i ai fualaau faasaina, na tali Finau, o le ato uliuli lea na tuu atu e Savea ia te ia e nana i lalo o le nofoa pito i tua o le ta’avale ina au taofi e Leoleo le latou ta’avale. Na taua e Finau, o Savea e ana le ato uliuli lea sa ia te ia.

 

O le tali lava fo’i lea e tasi a Ie’u ina ua fesiligia e Leoleo e uiga i lenei mataupu. Na ta’utino Iesu, o le paipa tioata ma isi uma mea sa maua i totonu o le ta’avale faatasi ai ma ia, o mea uma lava ia a Savea, na tago tuu atu ia te ia ina ua taofia e Leoleo le latou ta’avale. 

 

Na matua teena malosi e Savea molimau a Ie’u ma Finau fai mai o ia e ana fualaau faasaina sa maua i totonu o le ta’avale. Na taua e Savea i Leoleo e faapea, o mea uma lava na maua i totonu o le ta’avale, o fualaau faasaina uma ia e patino ia Ie’u ma Finau.

 

O i laua ia na alu e piki mai i Vaitogi na ia vaaia ai Finau o loo uuina mai se ato uliuli ma se mea e tai foliga o se paipa tioata sa ia vaaia o tu’u e Ie’u i le taga o lona ofu sa fiaia.