Ads by Google Ads by Google

Toe faafo’i i Samoa le ali’i ua fa’alua ona nofosala i le Faaoolima

ausage@samoanews.com

Ua poloaina e le Fa’amasinoga Maualuga le ali’i o Hafiti Filimaua na te tuua Amerika Samoa ae toe fo’i atu i Samoa ma aumau ai mo le umi o lana nofovaavaaia e 10 tausaga, ina ua fa’alua ona nofosala o ia i le solitulafono o le fa’aoolima matuia.

 

O le tausaga e 2015 na tausala ai Filimaua i le solitulafono o le faaoolima i le tulaga muamua, ma nofovaavaaia ai loa o ia mo le 10 tausaga e aofia ai lona tuliina o masina e 40, e mafua mai i le fa’alavelave lea na ia fa’aaoga ai se uamea e sasa ai le ulu o se tasi o ona tausoga.

 

I le tausaga ua te’a 2019, na toe ta’usala ai fo’i o ia i le solitulafono o le faaoolima i le tulaga lua, e mafua mai i le fa’alavelave lea na ia faaaoga ai se agaese e fa’aoo ai manu’a i se isi fo’i ali’i o lona aiga.

 

O le vaiaso na te’a nei na tula’i ai Filimaua i luma o le Fa’amasinoga Maualuga mo le lauina o lana fa’asalaga. O le ali’i Loia Fautua lagolago ia Rob McNeill na tula’i mo Filimaua, ae o le ali’i Loia Sili lagolago ia Doug Lowe na tula’i mo le itu a le malo.

 

Na ulua’i tu’uaia Filimaua i le moliaga mamafa o le faaoolimai le tulaga muamua, o le vaega A o solitulafono mamafa, ae i lalo o se maliliega na sainia e le ua molia ma le malo, lea fo’i na talia e le Fa’amasinoga i le masina o Tesema 2019, na tali ioe ai Filimaua i le solitulafono o le faaoolima i le tulaga lua, o le vaega D lea o solitulafono mamafa, lea e mafai ona fa’asala ai se tasi i le Toese mo le umi e le silia i le 5 tausaga, pe fa’asala foi i le salatupe e le silia i le $5,000, pe faasala fo’i i fa’asalaga uma ia e lua.

 

I le tali ioe ai o Filimau, sa ia ta’utino ai e fa’apea, i le aso 23 o Aperila 2019, na ia faaoo ai manu’a tuga i se isi ali’i e ala i lona fa’aaoga o se agaese e sasa ai lona papatua ma ona tauau.

 

E to’alua molimau na valaau e McNeill a o le i tuuina atu le avanoa ia Filimaua e fa’atoese ai i luma o le Fa’amasinoga. O ia molimau e aofia ai le to’alua o Filimaua ma lona tuafafine. I molimau a i laua ia e to’alua, na la talosagaina ai le Fa’amasinoga mo se faasalaga mama mo Filimaua.

 

Na taua e le to’alua a Filimaua e fa’apea, o le ua molia, e na o ia lava e faigaluega e tausi ai lo latou aiga. Na taua e le Tina le mana’omia tele o Filimaua i le aiga mo le tausiga o le la fanau. O le molimau lava fo’i lea e tasi na tuuina atu e le tuafafine a Filimaua

 

Na fesili le Fa’amasinoga i le molimau poo fea o i ai o latou matua. Na tali le molimau, o lona Tina o lo o i Utah i Amerika, ae o le latou Tama ua maliu.

 

Na talosaga le loia a Filimaua i le Fa’amasinoga e silasila toto’a i le talosaga a le to’alua a le ua molia, i le mana’omia lea o Filimaua e faigaluega e tausi ai lona aiga. Na taua e McNeill i le Fa’amasinoga, o Filimaua na fanau i Samoa, ae o lona olaga atoa o Amerika Samoa, le nofoaga ua taua o lona nu’u moni.

 

E ui i le matuia o gaioiga sa faia e le ua molia, ae na talosaga McNeill mo se faasalaga mama faanofovaavaaia, ina ia maua ai se avanoa e toe fo’i atu ai le ua molia i tua e fa’aleleia lona olaga ma tausi lona aiga.

 

Mo le mataupu muamua lea o lo o nofovaavaaia ai Filimaua mo le 10 tausaga, na talosaga McNeill i le Fa’amasinoga ina ia toe faia se teuteuga i tuutuuga o lea faasalaga, ae aua nei faaleaogaina le avanoa o lo o nofovaavaaia ai Fiilmaua.

 

Na faafetaia e le loia a le malo le faamatalaga a le to’alua a Filimaua atoa ai ma lona tuafafine. Na taua e le loia a le malo e faapea, na te lagonaina fo’i tulaga mafatia ua feagai ma le aiga, ona ua leai se isi e faigaluega e maua mai ai se tupe e tausi ai le fanau.

 

Peita’i, e le mafai fo’i ona alo le vaai a le malo i le matuia o le moliaga ua nofosala ai le ua molia, aemaise ai lona le usitaia o tuutuuga o lana nofovaavaaia. Na faamanatu e le loia a le malo i le Fa’amasinoga e fa’apea, o lea ua nofosala Filimaua i le moliaga mamafa o le faaoolima i le tulaga lua, a o lea faatoa 4 tausaga talu ona tuuina atu lana nofovaavaaia talu mai le faalavelave muamua, lea fo’i sa ia faaaogaina ai se aupega mata’utia e faaoo ai manu’a i se tasi o lona aiga.

 

Na lagolago e le malo talosaga a le itu tete’e.

 

Na taua e le Fa’amasinoga e fa’apea, o gaioiga e pei ona nofosala ai Filimaua, ua atagia mai ai, o ia o se tagata faatupu vevesi toe mata’utia lana amio, na te fa’aaogaina a’upega mata’utia e faatino ai lona ita pe a tula’i mai ni feeseeseaiga i le va o ia ma se isi tagata.

 

“Ua mae’a ona iloilo e le Fa’amasinoga le talosaga a lou to’alua ma lou tuafafine i le tulaga pagatia ua i ai lou aiga talu ona taofia oe i le Toese, peita’i, o lo o taga’i fo’i le Fa’amasinoga i le saogalemu o tagata lautele o le atunu’u mai gaioiga e te faia pe a e ita. O le mafua’aga lea e tatau ai ona sa’o ma amiotonu sa matou fa’aiuga e tuuina atu mo oe,” o le saunoaga lea a le Fa’amasinoga.

 

“Na nofovaavaaia oe mo le 10 tausaga i le 2015, ma matou tuuina atu ai le avanoa mo oe e te fo’i ai i lou aiga e toe fuata’i se isi taeao fou mo lou olaga. Na e talosaga mai mo se avanoa, sa matou tuuina atu le avanoa. A o lea faatoa 4 tausaga o lau nofovaavaaia, a o lea ua toe molia mai oe i le ituaiga solitulafono lava lea e tasi, lona uiga, ua le o toe i ai se isi avanoa o totoe mo oe.”

 

Mo le moliaga o le faaoolima i le tulaga lua, e 5 tausaga lea ua nofovaavaaia ai Filimaua i lalo o tuutuuga e ao ona ia usita’i i ai. O ia tuutuuga e aofia ai lona tuliina o masina e 20 i le Toese i Tafuna. A mae’a ona tuli lea fa’asalaga, ona ia tuua lea o Amerika Samoa ae toe fo’i atu i Samoa ma aumau ai mo le umi o lana nofovaavaaia.

 

Mo le mataupu lea o lo o nofovaavaaia ai mo le 10 tausaga, o lo o tumau pea lona nofovaavaaiai lea mataupu, ae tasi le tuutuuga ua faaopoopo i ai e le  Faamasinoga, o lona tuua lea o le atunuu ma aumau ai i fafo atu mo le umi e 10 tausaga o la nofovaavaaia.