VAEGA 45

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

**************************

Na gata mai le tatou fagogo i le vaiaso ua mavae, ina ua fiu lava le alii faufau mea leaga o Iosefa, e tau faaleaga ia si mafine o Tepora, ae na toe lavea lava i ana maunu na fafau.  

Ua faatonu nei e le uo a Tavita lea e ana le fale o lo o fai ai le pati, ia le o ese o Iosefa ma lona toalua mai lona fale.  Ae tatao atu ai ma le lapataiga tau faamata’u a Tavita ia Iosefa, afai e na te faalogo i se fasi tala e uiga i mea ia na faamatala e Iosefa ia i latou, o salalau i lo latou aai, o le a iloa ai iina le iuga o Iosefa.

Ua alu nei Iosefa e su’e lona to’alua, ma o la o ese atu loa mai le fale o lo o faia ai le pati a le uo a Tavita.  Ae o lo o nofonofo pea Tepora, Tavita, o le uo a Tavita ma uso o le tina o Tepora, i totonu o le potu lea sa fai ai si a latou fono ma Iosefa.  Ua le gagana se tasi.

I le ogatotonu o le sa o a le vaega lea, na manu a’e ai se fesili; “E moni lau tala lea sa fai ia Iosefa?” o le fesili lea a se tasi o uso a le tina a Tepora.  Ua tau fai tilotilo uma le vaega lea ia Tavita?

“E moni lau saunoaga, o lo o tele aiga o Tepora e latou te puipuia o ia?  Aua e na o ma’ua aiga o Tepora o lo o soifua mai nei.”

Ua le tali Tavita ae ua na o le luelue o lona ulu, “Ioe”.

“O Tavita o se tagata e le so’ona lafo ni ana faamatalaga.  Ae o se tagata e mulimuli i ana upu,”  o le tali mai lea o le uo a Tavita, ina ua na malamalama i le uiga o le fesili a si loomatua.  “O mai tatou o e faamae’a lelei le tatou pati, ona ua fai sina leva o le po.”  O lana tala lea ma tulai ma taitai atu uso o tina o Tepora mai i le potu, ae ua tuua ai na o Tavita ma Tepora.

Na vaaia le maligi o loimata o le tamaitai o Tepora, ae o lo o tu pea Tavita ma pupula to’a atu ia te ia.

“Faafetai lava Tavita,” o le tala lea a Tepora ma si ona leo melotagi.  “Faafetai i lou loto malamalama.  Ua pei ua matu’u atu se avega mamafa mai lo’u tagata, ae faapea nai uso o lo’u tina, ona o lea ua mafai ona sasa’a atu nei faigata sa feagai ma i matou.”

“E o’o lava i au upu ia Iosefa, e tapuni ai lona gutu mai le toe faitatala atu i isi i lenei mea sa tupu ia te a’u, ou te le iloa pe mafai faapefea ona ou fa’aali atu ai lo’u agaga faafetai ia te oe ma le tou aiga.”

“E mafai ona faataunuu le mea sa ou fai atu ai ia Iosefa, o le avea lea o oe ma o’u to’alua faaipoipo,”  o le tali vave mai lea a Tavita.

E FAIA PEA!