Apia - SAMOA

Ua ave’eseina mai nei i luma o le faamasinoga ia le mataupu i le va o le itumalo #1 Salega ma le susuga ia Afualo Lelea Fauatea po o Lelea Fatu, lea e pulea le kamupani fau fale o le KJA Contractors, lea o lo’o tu’uaia ai Afualo i lona solia o aiaiga o se konakarate.

O le aso Gafua na se’i mavae atu nei (i Samoa), na o’o atu ai lenei mataupu i luma o le Faamasinoga Maualuga ma le afioga i le Faamasino Sili ia Fepulea’i Ameperosa Roma, lea sa fa’aulu atu ai ma se faamatalaga a Afualo, e talifuaitau ai tu’uaiga ua faia faasaga ia te ia.

O le susuga i le loia ia Fuimaono Sefo Ainu’u, na tula’i mo le ua molia, ae o susuga ia Fuimaono Sarona Ponifasio o le loia mo le itumalo Salega #1 ae peitai, sa tula’i le tamaitai loia o Ann Matalasi i luma o le faamasinoga, e suitulaga mo Ponifasio.

Na fa’atonuina e le afioga i le Faamasino Sili le fa’ao’oina atu o lenei mataupu ina ia mataituina e sui e soalaupuleina sona faaiuga, ona toe fa’ao’o atu ai lea i luma o le faamasinoga ia Novema 18.

E tusa ai ma fa’amaumauga o lenei mataupu, na atoa le tausaga talu ona totogiina Afualo mo le galuega a le itumalo, ae peitai, e leai se galuega sa faatinoina.  O le tupe na totogi ia Afualo, e mo sapalai ma le leipa.

I le tausaga e 2022 na fa’amatu’u atu ai e le malo i le itumalo a Salega #1 ia se vaegatupe e $200,000 o se vaega o le latou $1 miliona mo polokalama tau atina’e a le malo, ina ia mafai ai ona fausia se ofisa i totonu o le itumalo.

Ae ia Ianuari 2, 2023, na fa’ao’oina atu ai e Afualo se pili e $120,000 I le itumalo, mo le ata o le ofisa faapea lona fausiaina.  Ae o le 10% o le galuega, e totogi pe a mae’a le galuega, lea na taumateina e fa’amaeina i vaiaso e 16.

I le aso 30 o Ianuari, 2023, sa toe maua ai e le itumalo a Salega #1 ia seisi pili mai ia Afualo mo le totogi atoa o le galuega.  Ma na ta’ua ai le tu’uina mai o le fa’atagana mai i le Minisita o le Itumalo, le susuga ia Fepuleai Faimata Sua, e totogi ai lea pili.

E le gata i lea, sa ta’ua ai le tuai ona amataina o le galuega, ona o lo’o iai se fa’afitauli i le fanua o Fai’aai, lea sa faatulagaina e fausia ai le ofisa a le itumalo.  Ae i se taimi mulimuli ane, na toe fa’ailoa atu e Fepuleai ia Afualo, ua mae’a ona fofoina le faafitauli i le fanua.

Ae ua fiu le itumalo e talosaga Afualo ina ia amataina loa le galuega, ae peitai, e le’i faia lea tulaga.

I se taimi mulimuli ane, na nofo malamalama le itumalo, o Afualo lea o lo’o galue i Amerika Samoa ma na faimalaga mai le afioga i le Faipule ia Fepuleai, i Amerika Samoa, ia Novema 2023, se’i o la feiloai ai ma Afualo, ma fa’ao’o mai se talsoaga mai i le itumalo, ina ia toe fo’i atu Afualo e amata loa le galuega, aua o lea ua mae’a ona totogi le vaega muamua o le galuega.