Pago Pago - AMERIKA SAMOA

O le aso Lua, Setema 3, 2024, sa umusa ai le falea’oga fou a le Aoga Tulaga Muamua a le Mt. Alava i Vatia ae fa’apaia ai le fanua ua faamoemoe o le a faatu ai le fale ta’alo fou a le aoga.

Sa auai atu le afioga i le Kovana Lemanu P.S. Mauga, o taitai o Ekalesia, pulega a Matai o le afioaga, sui o le Kapeneta, faiaoga ma le ma’ave ‘ese’ese o le afioaga, i lenei faamoemoega fiafia.

O le susuga i le Faifeau Toeaina ia Afalupetoa Uta’i, o le Ekalesia Faapotopotoga Kerisiano a Amerika Samoa (EFKAS) na molia le talosaga o le aso ma sa ia fa’aleoina le Alofa o le Atua, e mafai ai mea uma.  Ae o le o tagata, ua mafai ai ona fausia le fale a’oga fou.  Ma na ia si’itia le faamanu i le Atua ina ua mafai ona fausia lenei falea’oga fou mo le fanau a’oga, aua le fa’aalualu i luma o a latou a’oa’oga.

I le saunoaga a le Faatonusili o le Matagaluega o Galuega Lautele ia Faleosina Voigt e tusa ai ma lenei fale fou, sa ia faamatala mai ai e faapea, o le fogafale pito i lalo, o lo’o iai ofisa mo faiaoga, o se potu mo se tausima’i, o umukuka ma potu ‘ai a le fanau faapea fale ta’ele.

Na ta’ua foi e Voigt le iai o ni lifi (elevators) i lenei fale fou, e mafai ai ona fa’aaoga e o’o atu ai i luga i le fogafale lua, lea o lo’o iai ni potu a’oga se lima.

O le lautele o le falea’oga fou, e 162 futu le umi ae 32 futu lona lautele.

O le kamupani faufale a le H&H sa manumalo i le tauofoga mo le faatinoina o le galuega, lea na faamae’aina i aso e 240 ma o le tau atoa o le galuega e $1.5 miliona.

I lana saunoaga faapitoa i le taeao o le aso Lua, na ave ai le fa’amalo a le afioga i le Kovana i le afioaga o Vatia ona ua tini taunu’u lenei faamoemoe.  Sa saunoa Lemanu, o lenei fale, e le mo le malo, ae mo alo ma fanau a le afioaga.  Na ia ta’ua le leva tele ona feagai Vatia ma galuega fita o le aveina o a latou fanau i a’oga i nu’u tuaoi, e pei o Afono ma Aua.  Ae i le fa’amae’aina o lenei galuega, o le a mafai ona fa’aa’o’oga alo ma fanau i totonu lava o le afioaga.

Sa fa’aleoina ai foi e le afioga i le Kovana ia se fale fou lea ua fuafuaina nei mo Mt. Alava, aua sa latou fale ta’alo.

Na saunoa Lemanu i le tele o auala ua faapea ona tautua ma foa’i ai tagata o Vatia i totonu o Amerika Samoa, e le gata i totonu o le malo, vaega’au, fono faitulafono ae faapea foi totonu o a’oga.  Na fa’aalia foi e le afioga i le Kovana e faapea, e le o foliga o le fale, ae o mea e tutupu i le anoifale, e pei o le aoaoina o fanau, fa’aaogaina o alagamanuia ma o le a faapea ona fa’amanuiaina ai le atunu’u.

O le afioga ia Gaoteote Palaie na avea ma fofoga o le aso, i le faaleoina o se agaga fa’afetai i le malo ona o lenei fuafuaga ua loa ona moemiti ai le afioaga, ae o lea ua tino mai, e le gata mo fanau a’oga ae faapea foi faiaoga.  Aua o lea o le a mafai ona a’oa’o e a latou lava faiaoga ia alo ma fanau o le nu’u ma o le a fa’aauau pea ona tautua Vatia ia Amerika Samoa.

Sa fa’aleoina e le afioga Gaoteote le agaga fa’afetai ia Lemanu ma le Faigamalo, i lo latou tali vave mai i le talosaga a le nu’u mo se falea’oga fou ae le gata i lea, o le latou fale ta’alo fou lea o le a amataina ona fausia.

O le tina fa’aleagaga ia Eseta Uta’i sa na ia taua’aoina le lipine, e tatala aloaia ai le falea’oga fou, ona soso’o ai lea ma le fa’apaiaina o le fanua ua faamoemoe e fausia ai le faleta’alo fou.

O le kamupani a le H&H lea lava o le a faatinoina foi lea galuega, ma e $935,000 le tau o lenei galuega.

Ae o le aso Lulu, Setema 4, 2024 sa aofia potopoto ai le afioaga o Alofau aua le umusaga o le latou faleta’alo fou lea ua tu nei i tafatafa o a latou falea’oga, i se sauniga lotu lea na auai atu ai le afioga i le Kovana Lemanu P.S. Mauga ma le faletua ia Ella, o Faatonusili o Ofisa ma Matagaluega a le malo, fanau aoga ma le aiga faiaoga, atoa ai ma taitai o le aoga tulaga muamua a Tuato’o (Alofau), ae le gata i lea, o taitai o le Ofisa Aoga autu a le malo o Amerika Samoa.

O le susuga i le Faafeagaiga ia Sanerivi Mulitalo, o le Ekalesia Faapotopotoga Kerisiano a Amerika Samoa sa ta’ita’iina le sauniga fa’aleagaga o lea aso.

Ae o le sui Faatonusili o A’oga Tulaga Muamua, le susuga ia Naeaulumanu’a Sanerivi Mulitalo na avea ma fofoga o le aso.

I lana saunoaga fa’aleagaga i lea taeao, sa talosagaina ai e le susuga i le Faafeagaiga ia faiaoga ma fanau aoga, ina ia iai se nofoaga o le Fa’aola i totonu o le fale fou aemaise i totonu o latuo agaga.  Sa fa’aleoina foi e le susuga Rev. Mulitalo ia se agaga o le fa’afetai i le afioga i le Kovana ona o lenei galuega matagofie ua fa’amae’aina mo Alofau.

I lana lauga faapitoa, sa fa’aalia mai ai e Lemanu e faapea, o lenei galuega, na amata mai i le nofoaiga a le afioga i le Kovana ia Lolo Moliga.  Ma o lana lea misiona ma sana miti, ina ia iai se fale faapenei mo Alofau.

Sa ta’ua e le afioga i le Kovana sona faamoemoega, o le a avea lenei fale fou ma sulufa’iga malu, e fa’ate’a ai loto mafatia, faia ai fa’atasiga fiafia ma uo aemaise ai, o le fausia o ni tala’aga fiafia i totonu o olaga a alo ma fanau o le nu’u.

Na lu’itauina e le afioga i le Kovana ia fanau aoga ina ia fa’aleleia atili a latou aoaoga e pei o nisi o taitai o le atunu’u, sa faafaileleina atu o latou olaga a’oa’o i totonu o nei potu aoga.

Sa ta’ua e Lemanu, o se tasi o nei taitai, o le afioga i le Senatoa ia Togiola T.A. Tulafono, lea foi na avea ma Kovana o le malo.

I le taua’aoina atu o le tusi pasi o lenei galuega, i le Faatonusili o A’oga a le Malo, sa fa’ailoa mai ai e le Faatonusili o le Matagaluega o Galuega Lautele ia Faleosina Voigt, le kamupani sa faataunu’uina le galuega, o le APECS (Asian Pacific Engineering and Construction Services) ma o le tau atoa o le galuega, e $853,150.

O le afioga ia To’ia na avea ma fofoga o le nu’u ma le afioaga, i le faaleoina o se faafetai i le Kovana ma le Faigamalo ona o lenei fale fou, lea o le a fai ma se aoga i le afioaga e le gata i tulaga o aoaoga, ae faapea le nu’u atoa.

O le faletua a le Kovana ia Ella Mauga sa na ia taua’aoina le lipine na tatala aloaia ai lenei fale fou.