Le ali’i vetereni ia Fiatau Tauanu’u sa tautua i le US Navy mo le 9 tausaga, e aofia ai ma tausaga fitu o le taua i Vietnam, peita’i. Peita’i, e le’i faigofie le auaunaga i le vevesi o lea taua tele, sa pito i to’atele ai fitafita Amerika na maumau ai o latou ola.

I sana fa’amatalaga, “O le va’a tau sa ou i ai i luga e fa’afa lelei ona fa’atonu ina ia o’o i totonu o le DMC sone e i le tuaoi lelei o Vietnam ina ia tu’ia e le matou va’a nofoaga o lo’o fa’ato’ateleina i ai le ‘au tau a Vietnam.

“O se misiona e iloa lelei, e tulua lava le oti ma le toe fo’i mai. Peita’i, ona o a’u o le inisinia, ma e ao ina va’aia fa’aleleia fana e la’u atu mo fitafita a le Maligi ma le Army, e le fa’afiti i tiute o le mana’omia ona manumalo mai, ma sefe mai le soifua o nisi fitafita e to’atele a Amerika.”

Sa va’ai o ia i le tele o le ola maumau, i itu e lua o le taua, o le latou va’a fo’i sa i ai i luga, o ituaiga va’a ia e fausia i le u’amea e sili ona anagata, e fa’atolu na lavea i pulufana a le itu taua na latou tau, ae le’i pa ai le va’a, na toe fa’ao’o ane i le nofoaga o vaega au a Amerika i Filipaina ma toe faia ai lipea o lea va’a. O isi taimi na lavea mulimuli ai fo’i le va’a lava lea e tasi, ma lipea ai i Iapani.

Na tauto Tauanu’u i Hawaii ina ua mae’a fa’au’u mai o ia mai le McKinley High. Ua tu’ua e ia lana tautua i le Fuava’a Tau a Amerika a’o ia umia le tulaga MM2 e tutusa lelei ma le E5 i fa’asologa o tulaga i le vaega au. Ua mafana le mafutaga ma Ramona Tominiko Tauanu’u ma e to’a 10 o la’ua alo, ua alaala tumau nei i Faganeanea.

Sgt Taga’i Masaniai mai le afio’aga o Vatia, o se alo o Te’e Masaniai Sr, sa tautua i le  Fuava’a Tau a le Malo tele, ma e o uma fo’i i latou ma ona uso i le laina o Fitafita tau a le Malo tele i le Vaega a le Maligi Koa.

Ua litaea mai o ia, e na’o le tolu tausaga o lana tautua i le US Marine Corp, peita’i, e matua maualuga fa’ailoga ma matati’a sa ia umia ma ausia a’o tautua o ia e afua i le taimi tonu ua a’asa atili ma fa’ai’u ai le taua i Vietnam.

Ua litaea aloa’ia mai o ia, ma fa’ailoga E5, e le’i tupu muamua lea matatia i se fitafita o tausinio i lona vaitaimi i le Vaega Au. Maua ma fa’amau fa’ailogaina lana pine, “Maligi o le Masina” ia Novema 1974 i Okinawa i Iapani. Na ulufale i le Maligi i lana MOS o le Infantry 0311, peita’i, o iina sa ia fa’atuina ai se matati’a i lona gafatia ona tamo’e i le 3 maila i le na’o le 17 minute. Sa ia mauaina ma o lo’o ia te ia pea, le fa’ailoga ma tusi e fa’ailo ai, ana Meritorious Awards.

Na su’e e ia le su’ega i Santa Ana e ulufale ai, peita’i na Boot Camp i San Diego i le tausaga 1974 ae ua atoa le 19 o ona tausaga. O lona pou sa ulua’i tiute ai, o le leoleoina lea o le Embassy o Amerika i Saigon, ile taimi ua ave’esea fa’amalosi ai Peresetene Richard Nixon o Amerika, ae tula’i mai Gerald Ford, ma faia ai lana fa’ai’uga, “Ia ave’esea mai Vaega Au a Amerika mai Vietnam.”

O le va’a sa tiute ai o ia ma lana vaega na ia ta’ita’ia o le USS Delluth, ma o le va’a fa’amoemoeina lea e la’u ese mai ai fitafita, ae ese ai fo’i ma le to’atele o tagatanu’u o Vietnam ua fia sulufa’i mai i Amerika po’o se isi lava atunu’u e maua ai le filemu.

“I se tasi o matou malaga e tusa ma le 900 tagata sulufai na aumai fa’atasi ai, ma sa fa’atonuina i matou e tu’u uma lava i latou na i le nofoaga a le vaega au a Amerika i Filipaina. Ua ou va’aia le tele o le oti, o so’o se ituaiga o oti, o nisi e oti ona o le taumafaiga e sulufa’i mai ia o ese mai Vietnam, a’o nisi ona ua fasia fa’atagata o taua ma nisi e lavevea a’o fia saili se mapusaga e lalafi ai,” o se toe tepa lea a Masaniai i le taimi o tautua i le Maligi.

Sa ia talosaga litaea i le 1977, ae o’o mai i Samoa e tausia nai ona matua i le 1980. Faia ai lona aiga iinei, ma maua ai se fanau e to’a 5. Ua i ai fo’i lona suli ua toe ofo i le Maligi Koa, ma ua fo’i manuia mai ana malaga e lua i Iraq, o le ali’i lea o Nephi Benson Masaniai.

O Vaimapu O’Brien sa tutua i le US Army o le 28 tausaga pa a tu’ufa’atasia lana tautua i a’ai o vevesi ma lana tautua fa’a-Fitafita Fa’aleoleo a le US Army Reserve i Amerika Samoa nei.

O ia sa avea ma se tasi o ulua’i Fitafita fa’aleoleo a le tatou US Army Reserve iinei lea na fa’atula’ia i le 1981. Ona avea fo’i lea o ia ma se tasi o ulua’i fitafita fa’aleoleo na masi’i atu sa’o mai iinei mo le misiona i Iraq i le tausaga e 2004.

I lona avea ai ma Fitafita a le Vaega Au na ulufale iinei ae fa’atauto uma i latou i Hawaii, ma faia ai koleniga amata i Fort Bennings i Georgia ma lana MOS Infantry/Engineering. Na litaea o ia i le tausaga e 2010, ae mua’i galue o ia i le Public Works vaega a le Highway ae le’i avea ma Fitafita a le US Army.

I sona manatu fa’aalia, sa ia fa’ailoa mai, “Fa’afetai i fitafita uma lava, i latou ua mapu mai le tautua, ae maise i latou o lo’o fa’aauauina faiva i tafa o taua, ma nofoaga o vevesi i fafo atu o tatou atunu’u. Fa’afetai e tou te le o fa’avaivai i le faiva ina ia mautinoa lo tatou saogalemu i o tatou laueleele ma na fo’i atunu’u o vevesi, ia tausia le fealofani ma le nofo lelei. Ia manuia lava le Aso mo Vetereni uma ae maise o Fitafita o Taua uma a Amerika ma malo aufa’atasi o lo’o galulue pea.”

Sa ia fa’ailoa mai ona alofa’aga fa’apitoa mo lona atali’i matua o Afasa O’Brien ua litaea fo’i mai le US Army ina ua mae’a ana malaga e lua i Iraq. O lona atali’i lona lua Jeremiah O’Brien ma Lafogaula  ma le ali’i o Nemaia ll lea o lo’o alaala i Fort Sill i Oaklahoma ma tautua ai pea. Ia manuia le aso o Vetereni uma ma Fitafita o Taua a Amerika i so’o se mea o fa’aaunu’ua ai.