E le i mafai e le itu a le malo ona fa’amaonia le moliaga mamafa o le talepe fale i le tulaga muamua sa latou tu’uaia ai le ali’i o Naseri Lemoa, ina ua tu’uina mai le fa’aiuga a le Vaega Iloilo Iuga i le aso Lulu na te’a nei, e le nofosala le ua molia i le moliaga mamafa e pei ona tu’uaia ai o ia e le malo.

Ua tatalaina nei i tua ia le ali’i o Lemoa, 20 tausaga le matua e fa’atali ai le aso 27 Iuni e lau ai lona fa’asalaga i luma o le fa’amasinoga maualuga, ina ua ta’usala o ia e le Vaega Iloilo Iuga i moliaga mama e tolu: tu fua i le fale po o le fanua o le isi tagata; inupia ae le i atoa lona 21 tausaga, ma le fa’aleagaina o meatotino a se isi tagata i le tulaga tolu.

O le fa’aiuga a le Vaega Iloilo Iuga ina ua mae’a ona latou fa’afofoga i molimau tauto a i latou uma sa valaau e molimau mo lenei mataupu, atoa ai ma fa’afinauga fa’ai’u a loia, aemaise ai le tulafono sa fa’atulaga atu e le fa’amasinoga e fa’avae ai i luga la latou fa’aiuga.

I le fa’aiuga la ua tu’uina mai e le Vaega Iloilo Iuga, ua manino mai ai le le mafai e le malo ona latou fa’amaonia elemeni o le solitulafono mamafa o le talepe fale i le tulaga muamua, lea sa latou tu’uaia ai Lemoa i le ulua’i taimi na fa’atoa latou failaina ai lenei mataupu.

Na taua e le loia a le malo ia Tony Graf i lana ulua’i fa’afinauga e fa’apea, i le vaveao o le aso 2 Oketopa 2012 i Ottoville, na ulufale fa’amalosi ai Lemoa i totonu o le fale o le aiga na a’afia, e ala i lona sasae o le screen wire o le faitoto’a o le Fale Ta’avale, ona ia to ese lea o fa’amalama ae oso i totonu o le potu malolo, ma ia fa’atinoina ai le solitulafono o lona tago lea i le manava o se teineititi sa moe i luga o le nofoa i totonu o le potu malolo.

Ae na taua e le loia a Lemoa o Douglas Fiaui i le Vaega Iloilo Iuga e fa’apea, na mafua ona ulufale Lemoa i totonu o le fale o lona aunty na a’afia, o le fia maua lea o se mea e moe ai, ina ua fefe e alu i lo latou aiga, ina ne’i iloa o ia e lona tina o lo o ‘ona.

Sa  tete’e malosi Lemoa ma lana loia i le moliaga o le talepe fale i le tulaga muamua.

Na finau Fiaui e fa’apea, e tasi lava le mafua’aga na ala ai ona ulufale Lemoa i totonu o le fale o lona aunty, o le fia maua o se mea e moe ai, ae le i fa’apea na ulufale ona o lona mana’o e fa’atino ai se solitulafono.

Na taua fo’i e Fiaui e fa’apea, ana maua se avanoa o leoleo na agai atu i le taimi na tula’i mai ai le fa’alavelave e fesiligia ai Lemoa i le mafua’aga o lona ulufale i totonu o le fale o le aiga, atonu e fa’amalamalama e le ua molia le mafua’aga, peita’i o le mea sa tupu, na ona taunu’u lava o leoleo, taofia fa’apagota loa ma le ua molia ae auina atu i le ofisa mo isi a latou suesuega.