Ads by Google Ads by Google

Lapataia faiaoga i le fa’aaoga le tatau o meatotino Ofisa o Aoga

ausage@samoanews.com

Ua tu’uina atu e le Fa’atonusili le tumau o le Matagaluega o Aoga a le malo ia Philo Jennings, sana tusi i tagata faigaluega a le Ofisa o Aoga, e lapataia ai tagata faigaluega o lo o latou fa’aaogaina meatotino a le Ofisa e fa’atino ai meaaoga mo le sailia o a latou fa’ailoga e ala i fesootaiga tau initaneti, ina ia taofia nei le toe fa’aaogaina o meatotino a le malo.

 

Na taua e Jennings i lana tusi e fa’apea, ua o o atu i lona Ofisa fa’asea i ni isi o tagata faigaluega a le Ofisa o Aoga, o lo o latou fa’aaogaina meatotino a le Ofisa o aoga e pei o masini computer e faia ai a latou meaaoga i taimi faigaluega a le malo, fa’apea ai ma taimi ua mae’a ai galuega a le malo e aofia ai ma fa’aiuga o vaiaso.

 

“Fa’amolemole i latou uma o lo o fa’atinoina lea tulaga, e toe fa’amanatu atu, e le fa’atagaina i le Ofisa o Aoga ona fa’aaoga meatotino e faia ai meaaoga, aemaise ai le faia o meaaoga i taimi faigaluega a le malo, fa’apea ai ma isi lava fo’i taimi avanoa”, o se vaega lea o le tusi a Jennings.

 

“Afai e te fia asiasi i soo se polokalame e saili ai faailoga eseese i luga o le initaneti, e mafai lava ona e fa’atinoina lena tulaga i sou taimi avanoa, pe fa’aaoga ai fo’i lau initaneti i lou fale, ae le fa’atagaina ona fa’aaoga ai meatotino a le Ofisa o Aoga”, o le lapataiga lea a Jennings i tagata faigaluega uma a le Ofisa o Aoga o lo o faia lea tulaga.

 

Na fa’amanino atili e Jennings i lana tusi e fa’apea, o taimi faigaluega a le malo e amata mai i le 7:30 i le taeao e oo atu i le itula e 4:00 i le afiafi. Sa ia taua atili fo’i e fa’apea, e leai se mafua’aga tatau e ala ai ona i ai pea tagata faigaluega ma fa’aaoga meatotino a le Ofisa o Aoga i le tuana’i ai o taimi faigaluega, aemaise lava pe a tuana’i le itula e 6:20 i le afiafi.

 

Na fa’ai’u le tusi a Jennings i lona talosagaina lea o tagata faigaluega uma a le Ofisa o Aoga, “ina ia latou fa’autagia lenei fa’aaliga taua”.

 

O se tasi lenei o mataupu na fesiligia e ni isi o faipule i totonu o le maota o sui i le 3 vaiaso talu ai, pe fa’ataga ona fa’aaoga e faiaoga ma isi tagata faigaluega a le Ofisa o Aoga meatotino a le Ofisa o Aoga e pei o masini computer ma le initaneti mo a latou su’esu’ega i mataupu o lo o latou tauaveina e saili ai a latou fa’ailoga.

 

Na taua e ni isi o faipule na latou lagaina lenei mataupu e fa’apea, o se tasi o fa’afitauli ua maitauina i le aoga a le latou nu’u, ua avea le fa’aaoga e faiaoga o masini computer e faia ai a latou meaaoga i le taimi e tuua ai aoga ma fa’asolo atu ai i le po ma itu ua soli atu ai e tagata ese lotoa o aoga, toe alu ai le eletise i le po atoa.

 

O fautuaga mai faipule sa latou lagaina lenei mataupu, na tu’u atu sa’o lea i le afioga i le faipule ia Vaetasi Tuumolimoli Saena Moliga, o le ta’ita’ifono o le Komiti o Aoga a le maota o sui, ina ia faia i ai se su’esu’ega.